ଗ୍ରାମାଞ୍ଚଳରେ ମିଳିବ ପ୍ରି-ସ୍କୁଲ୍‌ର ସୁବିଧା: ଖୋଲିବ ୨୫ ହଜାର ସ୍କୁଲ

ଭୁବନେଶ୍ବର : ନୂତନ ଶିକ୍ଷା ନୀତି-୨୦୨୦ ଆଧାରରେ ୩ରୁ ୫ ବର୍ଷ ବୟସର ପିଲାମାନଙ୍କ ପାଇଁ ପ୍ରାକ୍ ବିଦ୍ୟାଳୟ(ପ୍ରି-ସ୍କୁଲ୍‌) ପ୍ରତିଷ୍ଠା ହେବାକୁ ଯାଉଛି। ନାଳନ୍ଦା ଲର୍ଣ୍ଣିଂ ସହଯୋଗରେ ବେସରକାରୀ ବିଦ୍ୟାଳୟ ଓ ଶିଶୁ କଲ୍ୟାଣ ସଂଘ ସମଗ୍ର ଭାରତରେ ୨୫ହଜାର ବିଦ୍ୟାଳୟ ପ୍ରତିଷ୍ଠା କରିବାକୁ ଯୋଜନା କରିଛି। ଏହା ବ୍ୟତୀତ ଏକତ୍ର ଏକ ପ୍ରି-ସ୍କୁଲ୍‌ ଖୋଲିବାର ଲକ୍ଷ୍ୟ ରହିଛି। ଏଥିପାଇଁ ସମସ୍ତ ଶିକ୍ଷକଙ୍କୁ ଉନ୍ନତ ପ୍ରଶିକ୍ଷଣ ଦିଆଯିବ। ବିଶେଷକରି ଗ୍ରାମାଞ୍ଚଳରେ ଶିଶୁମାନେ ପ୍ରି-ସ୍କୁଲ୍‌ର ସୁବିଧା ପାଇବେ। ଏନେଇ ଶନିବାର ଦିନ ବେସରକାରୀ ବିଦ୍ୟାଳୟ ଓ ଶିଶୁ କଲ୍ୟାଣ ସଂଘ ପକ୍ଷରୁ ହୋଟେଲ ନ୍ୟୁ ମ୍ୟାରିଅନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀ ଏହି ସୂଚନା ଦିଆଯାଇଛି।

ଆସୋସିଏସନର ରାଷ୍ଟ୍ରୀୟ ସଭାପତି ସୟଦ ସାମେଲ ଅହମ୍ମଦ କହିଛନ୍ତି ଯେ ବେସରକାରୀ ବିଦ୍ୟାଳୟ ଓ ଶିଶୁ କଲ୍ୟାଣ ସଂଘର ଦଶମ ଜାତୀୟ ପରିଷଦ ମିଟ୍ ଆସନ୍ତା ଜୁନ୍ ୨ରେ ପୁରୀ ଚାରିଅଟ ରିସୋର୍ଟରେ ଅନୁଷ୍ଠିତ ହେବ। ଏହା ୫ ତାରିଖ ପର୍ଯ୍ୟନ୍ତ ଚାଲିବ। ଏହି ସମ୍ମିଳନୀରେ ଦେଶର ୨୮ଟି ରାଜ୍ୟର ୩୦୦ ରୁ ଅଧିକ ପ୍ରତିନିଧି ଅଂଶଗ୍ରହଣ କରିବେ। କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟ ଅତିଥି ଭାବରେ ଯୋଗଦେବାର କାର୍ଯ୍ୟକ୍ରମ ରହିଛି। ତାଙ୍କ ସହିତ ରାଜ୍ୟର ମନ୍ତ୍ରୀ ଓ ପ୍ରଶାସନିକ ଅଧିକାରୀମାନେ ମଧ୍ୟ ଯୋଗ ଦେବେ। ଭାରତର କୋଣ ଅନୁକୋଣରୁ ପ୍ରତିନିଧି ତଥା ଶିକ୍ଷାବିତ୍‌ମାନେ ନିଜ ନିଜ ରାଜ୍ୟରେ ସୃଷ୍ଟି ହେଉଥିବା ବିଦ୍ୟାଳୟ, ଶିକ୍ଷା, ଛାତ୍ର ଓ ଶିକ୍ଷକମାନଙ୍କ ସହ ଜଡ଼ିତ ସମସ୍ୟା ଉପରେ ଆଲୋଚନା କରିବେ। ଏହା ସହିତ ନୂତନ ଶିକ୍ଷାନୀତି, ଶିକ୍ଷା ଅଧିକାର, ଦେଶରେ ବେସରକାରୀ ବିଦ୍ୟାଳୟଗୁଡ଼ିକର ସମସ୍ୟା ଇତ୍ୟାଦି ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା ହେବ। ସାମ୍ବାଦିକ ସମ୍ମିଳନୀରେ ଓଡ଼ିଶା ରାଜ୍ୟ ସଂଘର ସଭାପତି ଜୟଶ୍ରୀ ମହାନ୍ତି, ସାଧାରଣ ସମ୍ପାଦିକା ଚିଦାତ୍ମିକା ଖଟୁଆ, ନାଳନ୍ଦା ଲର୍ଣ୍ଣିଂର ପ୍ରତିଷ୍ଠାତା ନିର୍ଦ୍ଦେଶକ ତାମଲ ମୁଖାର୍ଜୀ ଉପସ୍ଥିତ ଥିଲେ।