ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଆଜି ପୁଣି ଏକ ଅଭାବନୀୟ ଘଟଣା ଘଟିଛି । ଅସ୍ତ୍ରୋପଚାର ପରେ ଜଣେ ଗର୍ଭବତୀ ମହିଳାଙ୍କ ମୃତ୍ୟୁକୁ ନେଇ ଚିକିତ୍ସାଳୟରେ ଉତ୍ତେଜନା ପ୍ରକାଶ ପାଇଛି । ପରିବାରବର୍ଗ ମହିଳାଙ୍କ ଶବ ଧରି ଜିଲ୍ଲା ମୁଖ୍ୟ ଚିକିତ୍ସାଳୟ ଫାଟକ ସମ୍ମୁଖରେ ଧାରଣାରେ ବସିଥିଲେ ।
Sambad is now on WhatsApp
Join and get latest news updates delivered to you via WhatsApp
ମୃତ ମହିଳାଙ୍କ ପରିବାରବର୍ଗଙ୍କ ଅଭିଯୋଗ ଅନୁସାରେ, ରଣପୁର କଳାମାଟିଆର ପୂର୍ଣ୍ଣଚନ୍ଦ୍ର ସାହୁଙ୍କ ଗର୍ଭବତୀ ପତ୍ନୀ କଳ୍ପନା ସାହୁ (୨୦)ଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ଓ ପ୍ରସୂତୀ ବିଭାଗରେ ଭର୍ତ୍ତି କରାଯାଇଥିଲା। ଗତକାଲି ସଂଧ୍ୟାରେ କଳ୍ପନାଙ୍କ ଅସ୍ତ୍ରୋପଚାର କରାଯାଇଥିଲା । ଡାକ୍ତର ଅନୀତା ଲେଙ୍କା ଏହି ଅସ୍ତ୍ରୋପଚାର କରିଥିଲେ । ଅସ୍ତ୍ରୋପଚାରର ୨-୩ ଘଣ୍ଟା ପରେ କଳ୍ପନାଙ୍କ ଅସହ୍ୟ ଯନ୍ତ୍ରଣା ହେବାରୁ ଏନେଇ ଡାକ୍ତର ଲେଙ୍କାକୁ ଜଣାଇଯାଇଥିଲା। ହେଲେ ସେ ଏହା ସ୍ୱାଭାବିକ ବୋଲି କହି କୌଣସି ଗୁରୁତ୍ୱ ଦେଇନଥିଲେ । ଆଜି ସକାଳେ କଳ୍ପନାଙ୍କ ଗୁରୁତର ହେବାରୁ ଶରୀରରେ ଅମ୍ଳଜାନ ହ୍ରାସ ପାଉଛି କହି ଚିକିତ୍ସା କରୁଥିବା ଡାକ୍ତର ଭୁବନେଶ୍ୱର ଏମ୍ସକୁ ରେଫର କରିଥିଲେ । ହେଲେ ଏମ୍ସ ଆସିବା ପରେ ଏଠାରେ କଳ୍ପନାଙ୍କ ମୃତ୍ୟୁ ଘଟିଥିଲା ।
ପରେ ସନ୍ଧ୍ୟା ପ୍ରାୟ ସାଢ଼େ ୬ଟା ବେଳେ କଳ୍ପନାଙ୍କ ମରଶରୀର ଧରି ତାଙ୍କ ପରିବାରବର୍ଗ ଚିକିତ୍ସାଳୟ ସମ୍ମୁଖରେ ଧାରଣାରେ ବସିଥିଲେ । ସୂଚନା ପାଇ ଟାଉନ୍ ଥାନା ପୁଲିସ ଓ ଚିିକିତ୍ସାଳୟ କର୍ତୃପକ୍ଷ ସେଠାରେ ପହଂଚି ତାଙ୍କୁ ବୁଝାଶୁଝା କରିଥିଲେ ।
ଏନେଇ ମୃତ କଳ୍ପନାଙ୍କ ଭାଇ ରତିକାନ୍ତ ପ୍ରଧାନ କହିଛନ୍ତି ଯେ କଳ୍ପନାଙ୍କ ମୃତ୍ୟୁ ଘଟିବା ପରେ ତାଙ୍କୁ ଏମ୍ସ୍ ରେଫର କରାଯାଇଥିଲା । ଡାକ୍ତରଙ୍କ ପକ୍ଷରେ ଏଭଳି ଅବହେଳା ଅନ୍ୟ କାହା ପ୍ରତି ନଘଟୁ। ଯେଉଁ ପିଲାଟି ଜନ୍ମ ହୋଇଛି, ତା’ର ସଠିକ ଚିକିତ୍ସା କରାଯାଉ । ଦୋଷୀ ଡାକ୍ତରଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । ପ୍ରତିକ୍ରିୟାରେ ଏଡିଏମ୍ଓ (ମେଡିକାଲ୍) ବିଶ୍ୱମୋହନ ମିଶ୍ର କହିଛନ୍ତି ଯେ, ଚିକିତ୍ସାର ଅବହେଳା ନେଇ ତଦନ୍ତ କରାଯିବ ଓ ତଦନ୍ତ ରିପୋର୍ଟ ଆଧାରରେ ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏହାସହ ସରକାରଙ୍କ ନିୟମାନୁସାରେ, ମୃତକଙ୍କ ପରିବାରକୁ ସହାୟତା ଦିଆଯିବ ।