ଚନ୍ଦାହାଣ୍ଡି: ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ ପାଟଖଲିଆ ପଂଚାୟତ ଗୋଉରଝରିଆ ଗ୍ରାମର ଲଳିତା ପୋଟା (୩୫) ନାମ୍ନୀ ଜଣେ ପ୍ରସୂତୀ ରାସ୍ତା ଅଭାବରେ ଗାଁକୁ ୧୦୮ ଆମ୍ବୁଲାନ୍ସ ଯାଇ ନପାରିବାରୁ ସେ ଠିକଣା ସମୟରେ ଚିକିତ୍ସା ପାଇ ନ ପାରି ରବିବାର ଦିନ ଉମରକୋଟ ହସପିଟାଲରେ ଚିକିତ୍ସାଧିନ ଅବସ୍ଥାରେ ଆଖିବୁଜି ଦେଇ ଥିବା ନେଇ ପରିବାର ପକ୍ଷରୁ ସୂଚନା ଦିଆଯାଇଛି । ଗଉରଝରିଆ ଗ୍ରାମବାସୀଙ୍କ ପ୍ରତି ପ୍ରଶାସନର ଏତାଦୃଶ୍ୟ ଖାମଖିଆଲ ମନୋଭାବକୁ ବିଭିନ୍ନ ମହଲରେ ନିନ୍ଦା କରାଜିବା ସହ ତୁରନ୍ତ ଜିଲ୍ଲା ପ୍ରଶାସନ ଏକ ସ୍ୱତନ୍ତ୍ର ଦ୍ରୁଷ୍ଟି ଦେଇ ଗ୍ରାମକୁ ପକ୍କା ରାସ୍ତା ନିର୍ମାଣ ଦିଗରେ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରକାଶ ଥାଉକି ଗତ ୧୧ ତାରିଖ ଦିନ ଗୋଉରଝରିଆ ଗ୍ରାମର ଧନୁ ପୋଟାଙ୍କ ସ୍ତ୍ରୀ ଲଳିତା ପୋଟା ପ୍ରସୂତୀ ଜନିତ ଜ୍ୱର ହେବାରୁ ଚିକିତ୍ସା ପାଇଁ ଚନ୍ଦାହାଣ୍ଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ନେବା ପାଇଁ ୧୦୮କୁ ଫୋନ କରି ଥିଲେ । ଗୋଉର ଝରିଆ ଗ୍ରାମକୁ ରାସ୍ତାରେ ନଦୀ ପଡିବା ସହ ରାସ୍ତା କାଦୁଅରେ ପଚ୍ ପଚ୍ ରହି ଥିବା ଫଳରେ ଗ୍ରାମକୁ ୧୦୮ ଗାଡି ଯାଇନପାରି ରାସ୍ତାରେ ଅଟକି ରହିବାରୁ ବାଧ୍ୟ ହୋଇ ପାରିବାର ଲୋକେ ଏକ ଖଟିଆ ସାହାଯ୍ୟରେ ୪ କିମି କାଦୁଅ ରାସ୍ତାରେ ନଦୀ ପାର କରି ଚନ୍ଦାହାଣ୍ଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ପୀର ପ୍ରସାଦ କବି ଶତପଥୀ ଚିକିତ୍ସା କରିବା ପରେ ସ୍ୱାସ୍ଥ୍ୟର ଅବସ୍ଥା କିଛି ପରିମାଣରେ ସୁଧାର ଆସିଥିଲା । ଅଧିକା ଚିକିତ୍ସା ପାଇଁ ଲଳିତାଙ୍କୁ ଉମରକୋଟ ହସପିଟାଲକୁ ରେଫର କରାଯାଇ ଥିଲା । ଆଜି ଚିକିତ୍ସାଧିନ ଅବସ୍ଥାରେ ସେ ଆଖିବୁଜି ଦେଇଛନ୍ତି। ତାଙ୍କର ଏକ ସାତ ମାସର ଛୁଆ ରହିଛି ।