ଜୟପୁର: ୨ ଲକ୍ଷ ୧୦ହଜାର ଟଙ୍କା ଚୋରି କରିଥିବା ଅଭିଯୋଗରେ ଘରୋଇ ଫାଇନାନ୍ସ କମ୍ପାନିର ଜଣେ କର୍ମଚାରୀଙ୍କୁ ଗିରଫ କରିଛି ବୈପାରିଗୁଡା ପୁଲିସ | ୨ମାସ ତଳେ ଘଟଣା ଘଟିଥିବା ବେଳେ ଆଜି ଅଭିଯୁକ୍ତକୁ ଗିରଫ କରିଛି ପୁଲିସ | ଅଭିଯୁକ୍ତଙ୍କ ନାଁ ସରୋଜ କୁମାର ସାମନ୍ତରାୟ ବୋଲି ଜଣା ପଡ଼ିଛି। ସେ ଜୟପୁରର ବାଲିପେଟା ସାହିର ବାସିନ୍ଦା ବୋଲି ବି ଜଣାଯାଇଛି | ଗିରଫ ପରେ ଅଭିଯୁକ୍ତଙ୍କଠାରୁ ୧,୫୦,୦୦୦ଟଙ୍କା ଜବତ କରିବା ସହ ତାକୁ କୋର୍ଟ ଚାଲାଣ କରାଯାଇଥିଲା |
Sambad is now on WhatsApp
Join and get latest news updates delivered to you via WhatsApp
କୋର୍ଟରେ ହାଜର ହେବା ପରେ ଅଭିଯୁକ୍ତ ସରୋଜ କହିଛନ୍ତି ଯେ, ୨,୧୦,୦୦୦ଟଙ୍କା ନେଇ ଫେରୁଥିବା ବେଳେ କିଛି ଅଜଣା ଯୁବକ ଆସି ତାଙ୍କ ଠାରୁ ଟଙ୍କା ଛଡ଼ାଇ ନେଇଥିଲେ| ସେ ଟଙ୍କା ଚୋରି କରି ନାହାନ୍ତି ବୋଲି ବି ସଫେଇ ଦେଇଛନ୍ତି |
ମିଳିଥିବା ସୂଚନା ମୁତାବକ, ୨ମାସ ତଳେ ଘରୋଇ ଫାଇନାନ୍ସ କମ୍ପାନିର କର୍ମଚାରୀ ସରୋଜ କୁମାର ସାମନ୍ତରାୟ ୨,୧୦,୦୦୦ଟଙ୍କା ନେଇ ଫେରୁଥିବା ବେଳେ ବୈପାରିଗୁଡାଠାରେ କିଛି ଯୁବକ ତାଙ୍କଠାରୁ ଟଙ୍କା ଛଡ଼ାଇ ନେଇଥିବା କଥା ସେ ନିଜ ମାଲିକଙ୍କୁ ଜଣାଇଥିଲେ | ଏହା ପରେ କମ୍ପାନିର ମାଲିକ ବୈପାରିଗୁଡା ପୁଲିସ ଷ୍ଟେସନରେ ଏକ ଅଭିଯୋଗ କରିଥିଲେ | ଅଭିଯୋଗ ପରେ ପୁଲିସ ତଦନ୍ତ ଆରମ୍ଭ କରି ସରୋଜ କୁମାର ସାମନ୍ତରାୟଙ୍କୁ ଡାକି ଘଟଣା ବିଷୟରେ ପଚାରଉଚରା କରିଥିଲା | ଏହି ସମୟରେ ପୁଲିସ ସରୋଜଙ୍କ ଉପରେ ସନ୍ଦେହ କରି ଯାଞ୍ଚ କରିବା ପରେ ତା’ ଠାରୁ ୧ ଲକ୍ଷ ୫୦ହଜାର ଟଙ୍କା ଜବତ କରିଛି |