କୋଭିଡ୍ ପରୀକ୍ଷା ପାଇଁ ଲାଗୁଥିବା ସମୟ, ଦେୟ ସଂପର୍କରେ ତଥ୍ୟ ଦିଅ: ହାଇକୋର୍ଟ
କଟକ: ରାଜ୍ୟର ସମସ୍ତ ଜିଲ୍ଲାରେ ସ୍ବାସ୍ଥ୍ୟ ଭିତ୍ତିଭୂମିର ବିକାଶ ଉପରେ ହାଇକୋର୍ଟ ଗୁରୁତ୍ବାରୋପ କରିଛନ୍ତି। ଆଜି ଏ ସଂପର୍କିତ ଜନସ୍ବାର୍ଥ ମାମଲାର ଶୁଣାଣି ସମୟରେ ହାଇକୋର୍ଟ ରାଜ୍ୟରେ ବିଭିନ୍ନ ଜିଲ୍ଲାର ସହରାଞ୍ଚଳ ଓ ଗ୍ରାମାଞ୍ଚଳର କେଉଁ ସ୍ଥାନରେ ସବୁ ସରକାରୀ ଓ ଘରୋଇ ସ୍ବାସ୍ଥ୍ୟସେବା ବ୍ୟବସ୍ଥା ରହିଛି, କେଉଁଠି ଆରଟିପିସିଆର ଓ ଆଣ୍ଟିଜେନ ଟେଷ୍ଟ ହେଉଛି, ଜଣେ ବ୍ୟକ୍ତି ଟେଷ୍ଟ ପାଇଁ କେଉଁ ସ୍ଥାନକୁ କିଭଳି ଭାବେ ଯିବ ସେ ନେଇ ହାଇକୋର୍ଟ ଜାଣିବାକୁ ଚାହଁଥିଲେ। ପ୍ରତି ଜିଲ୍ଲାରେ କେତେ ଆରଟିପିସିଆର ଓ ରାପିଡ ଆଣ୍ଟିଜେନ ଟେଷ୍ଟ କିଟ୍ ରହିଛି, ଏପରି କିଟ୍ ଦ୍ବାରା ଟେଷ୍ଟ କରିବା ପାଇଁ କେତେ ସଂଖ୍ୟକ ଆଶା କର୍ମୀ ଓ ପାରାମେଡିକାଲ କର୍ମଚାରୀ ତାଲିମପ୍ରାପ୍ତ ହୋଇଛନ୍ତି, ଗ୍ରାମଞ୍ଚଳରେ ଆରଟିପିସିଆର ଓ ରାପିଡ ଆଣ୍ଟିଜେନ୍ ଟେଷ୍ଟ ଫଳାଫଳ କେତେ ସମୟରେ ମିଳୁଛି ସେ ନେଇ ହାଇକୋର୍ଟ ରାଜ୍ୟ ସରକାରଙ୍କ ନିକଟରୁ ଜବାବ ତଲବ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସହରାଞ୍ଚଳ ଓ ଗ୍ରାମାଞ୍ଚଳରେ ଘରୋଇ ବ୍ୟବସ୍ଥାରେ ଆରଟିପିସିଆର ଓ ରାପିଡ ଆଣ୍ଟିଜେନ ଟେଷ୍ଟ ପାଇଁ ଜଣେ ବ୍ୟକ୍ତିଙ୍କୁ ପ୍ରକୃତରେ କେତେ ଟଙ୍କା ଦେବାକୁ ପଡୁଛି ସେ ନେଇ ମଧ୍ୟ ସ୍ପଷ୍ଟ କରିବାକୁ ହାଇକୋର୍ଟ କହିଛନ୍ତି। ପ୍ରାଥମିକ ଭାବେ ଦୁଇଟି ଜିଲ୍ଲା କଳାହାଣ୍ଡି ଓ ନବରଙ୍ଗପୁରକୁ ଏଥି ପାଇଁ ଚୟନ କରିଛନ୍ତି ହାଇକୋର୍ଟ। ଏହି ଦୁଇ ଜିଲ୍ଲାର ଉପରୋକ୍ତ ପ୍ରସଂଗରେ ତଥ୍ୟ ସତ୍ୟପାଠ ମାଧ୍ୟମରେ ଦାଖଲ ପାଇଁ ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦିଆଯାଇଛି। ମାମଲାର ପରବର୍ତ୍ତୀ ଶୁଣାଣି ସେପ୍ଟେମ୍ବର ୧୫କୁ ଧାର୍ଯ୍ୟ କରାଯାଇଛି। ମୁଖ୍ୟ ବିଚାରପତି ଡକ୍ଟର ଜଷ୍ଟିସ ଏସ.ମୁରଲୀଧର ଓ ଜଷ୍ଟିସ ବି.ପି.ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ସଂଜୀବ ଯୋଶୀଙ୍କ ଆବେଦନର ଶୁଣାଣି କରି ଏପରି ନିର୍ଦ୍ଦେଶ ଦେଇଛନ୍ତି। ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ସୁକୁମାର ପାଟଯୋଶୀ ଓ ଆଇନଜୀବୀ ଏସ.କେ.ନନ୍ଦ ମାମଲା ପରିଚାଳନା କରୁଛନ୍ତି।