ବେଲପାହାଡ଼: ପିଆଜ ଖାଇବାର ଲାଳସା ସାମ୍ନାରେ ବଳି ପଡ଼ିଲା ମାନବିକତା | ପିଆଜ ନ କିଣି ମାଗଣାରେ ପିଆଜ ବୋହି ନେବାର ମାନସିକତା ନେଇ ଏମିତି ଏକ ଭିଡିଓ ଭାଇରାଲ ହୋଇଛି, ଯାହାକି ଲୋକଙ୍କ ଚିନ୍ତାଧାରା ପ୍ରତି ଅଙ୍ଗୁଳି ନିର୍ଦ୍ଦେଶ କରିଛି | ଜଣେ ପିଆଜ ବେପାରୀଙ୍କ ଅସୁବିଧାକୁ ସାମାନ୍ୟ ଭୃକ୍ଷେପ ନ କରି ତାଙ୍କ ପିଆଜକୁ ଲୋକ ବୋହିନେଇଛନ୍ତି | ଝାରସୁଗୁଡା ଜିଲ୍ଲା ବେଲପାହାଡ଼ ଅଂଚଳରେ କିଛି ଏଭଳି ଏକ ଘଟଣାର ଭିଡିଓ ସାମ୍ନାକୁ ଆସିଛି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ବେଲପାହାଡ଼ ଫାଟକ ନିକଟରେ ପରିବା ଦୋକାନ କରିଥିବା ବିକ୍ରମ ମେହେର ନିଜ ଦୋକାନକୁ ଗତକାଲି ସନ୍ଧ୍ୟାରେ ସାଇକେଲ ମାଧ୍ୟମରେ ଏକ ବସ୍ତା ପିଆଜ ଆଣୁଥିଲେ | ହଠାତ ଏହି ସମୟରେ ପିଆଜ ବସ୍ତାଟି ଖୋଲିଯିବାରୁ ରାସ୍ତା ଉପରେ ପିଆଜ ଢ଼ାଳି ହୋଇଯାଇଥିଲା | ବିକ୍ରମ ସାଇକେଲ ରଖି ପିଆଜ ଗୋଟାଇବାକୁ ଯାଉଥିବା ବେଳେ କିଛି ଲୋକ ପିଆଜ ନେବାକୁ ଚାଲିଆସିଥିଲେ |
ବ୍ୟବସାୟୀଙ୍କ ପିଆଜକୁ ନିଜ ବ୍ୟାଗରେ ପୁରାଇ ବୋହି ନେଇଯାଇଥିଲେ | କେବଳ ନିଜେ ନେଇ ନଥିଲେ ବଡ ପାଟିରେ ଚିତ୍କାର କରି ପିଆଜ ନେବାକୁ ଅନ୍ୟ ଲୋକଙ୍କୁ ମଧ୍ୟ ଆମନ୍ତ୍ରଣ କରିଥିଲେ | ପିଆଜ କିଲୋ ପିଛା ୧୨୦ ଟଙ୍କାରୁ ଖସି ୬୦ ଟଙ୍କାରେ ପହଁଚିଥିବା ବେଳେ ପିଆଜ ବିକ୍ରି କରି ନିଜ ପରିବାର ଚଳାଉଥିବା ଜଣେ ବ୍ୟବସାୟୀଙ୍କ ପିଆଜ ନେଇଯିବା ଘଟଣା ଚର୍ଚ୍ଚା ସୃଷ୍ଟି କରିଛି |