ପୁରୀ ଲୋକସଭା ନିର୍ବାଚନମଣ୍ଡଳୀ : ମଇଦାନରେ ତିନି ମୁଖପାତ୍ର

ପୁରୀ : ପୁରୀ ଲୋକସଭା ନିର୍ବାଚନ ମଣ୍ଡଳୀ ଏବେ ସବୁ ଦଳର ଫୋକସ୍‌ରେ ରହିଛି। ୧୯୯୮ରୁ ବିଜେଡି ଗଡ଼ ଭାବେ ରହି ଆସିଥିବା ପୁରୀରେ ଏଥର ତିନି ପ୍ରମୁଖ ଦଳର ମୁଖପାତ୍ରଙ୍କ ଲଢ଼େଇ ହେବ। ବିଜେଡି, ବିଜେପି ଓ କଂଗ୍ରେସର ଏହି ମୁଖପାତ୍ରମାନେ ମଧ୍ୟ ବୃତ୍ତିରେ ଓକିଲ (ବିେଜଡି), ଡାକ୍ତର(ବିଜେପି) ଓ ସାମ୍ବାଦିକ (କଂଗ୍ରେସ) ଭାବେ ରାଜ୍ୟବାସୀଙ୍କ ମଧ୍ୟରେ ଜଣାଶୁଣା।

ପୁରୀ ଲୋକସଭା ଆସନର ଇତିହାସ ଦେଖିଲେ ସବୁବେଳେ ଅଣକଂଗ୍ରେସ ହାତରେ ଏହି ଆସନ ରହିଛି। ତେବେ ବିଜେଡି ଗଠନ ହେବା ଦିନଠୁ ଏହି ଆସନ ବିଜେଡି ଦଖଲରେ। ପ୍ରଥମେ ବ୍ରଜକିଶୋର ତ୍ରିପାଠୀ ଏହି ଆସନକୁ ୨୦୦୯ ପର୍ଯ୍ୟନ୍ତ ଦଖଲ କରିଥିଲେ। ବ୍ରଜ ବିଜେଡିରୁ ବିଦା ହେବା ପରେ ସୁପ୍ରିମ୍‌କୋର୍ଟ ଓକିଲ ପିନାକୀ ମିଶ୍ର ୨୦୦୯ ଓ ୨୦୧୪ରେ ଏଠାରେ ବିଜୟର ବାନା ଉଡ଼ାଇଛନ୍ତି।

ଓକିଲଙ୍କ ବିଜୟର ବାନା ବା ବିଜେଡିର ବିଜୟ ବାନାକୁ ରୋକିବା ପାଇଁ ବିଜେପି ଏଠାରେ ପ୍ରାର୍ଥୀ କରିଛି ଜଣାଶୁଣା ଡାକ୍ତର ତଥା ଦଳର ମୁଖପାତ୍ର ସମ୍ବିତ ପାତ୍ରଙ୍କୁ। ସେ ଦଳର ଜାତୀୟ ମୁଖପାତ୍ର ସହ ଜଣେ ଭଲ କୁହାଳିଆ ନେତା। ପେଶାରେ ଡାକ୍ତର ଥିବା ସମ୍ବିତ ବିଜେପିର ଗେରୁଆ ବାନା ପୁରୀରେ ଉଡ଼ାଇବେ ବୋଲି ଆଶା ରଖିଛନ୍ତି।

ଓକିଲ-ଡାକ୍ତରଙ୍କ ମଧ୍ୟରେ କଡା ଟକ୍କର ହେବାକୁ ଥିବା ବେଳେ ଏବେ କଂଗ୍ରେସ ମଇଦାନକୁ ପଠାଇଛି ଜଣେ ସାମ୍ବାଦିକଙ୍କୁ। ଦଳର ରାଜ୍ୟ ସ୍ତରରେ ବେଶ କୁହାଳିଆ ନେତା ଭାବେ ପରିଚିତ ସତ୍ୟପ୍ରକାଶ ନାୟକ ପୁରୀ ରଣଭୂମିକୁ ଓହ୍ଲାଇଛନ୍ତି। ରାଜ୍ୟ କଂଗ୍ରେସର ମୁଖପାତ୍ର ଥିବା ଶ୍ରୀ ନାୟକ ଏବେ ଓକିଲ ଓ ଡାକ୍ତରଙ୍କୁ ମୁକାବିଲା କରିବେ। ପୁରୀ ତାଙ୍କ ପାଇଁ ନୂଆ ହୋଇଥିଲେ ମଧ୍ୟ ସାମ୍ବାଦିକତା କାଳରେ ପୁରୀର ଅନେକ ବିକାଶ ପ୍ରସଙ୍ଗକୁ ନେଇ ସେ ଲଢ଼ିଛନ୍ତି। ଏବେ ସେହି ଅଭିଜ୍ଞତାକୁ ସେ କାମରେ ଲଗାଇବେ ବୋଲି ତାଙ୍କ ସମର୍ଥକମାନେ କହିଛନ୍ତି। ପୁରୀ ଲୋକସଭା ଆସନରୁ ପ୍ରମୁଖ ତିନି ଦଳର ତିନି ମୁଖପାତ୍ରଙ୍କ ଲଢ଼େଇରେ କିଏ ବାଜି ମାରିବ ତାହା ଏବେ ସବୁଠି ଚର୍ଚ୍ଚାର ବିଷୟ ହୋଇଛି।