ପୁରୀ : ଦୁଇବର୍ଷ ପରେ ବଡ଼ଦାଣ୍ଡକୁ ଫେରିଥିଲା ସେଇ ଭାବୋଚ୍ଛ୍ବାସମୟ ପରିବେଶ। ହରିବୋଲ-ହୁଳହୁଳି-ଜୟ ଜଗନ୍ନାଥ ଧ୍ବନୀରେ ପ୍ରକମ୍ପିତ ହେଉଥିଲା ଗଗନ ପବନ। କିଏ ଖୁସିରେ ବାହା ପ୍ରସାରୀ ନାଚୁଥିଲା, ପୁଣି କିଏ ବଡ଼ଦାଣ୍ଡର ପବିତ୍ର ଧୂଳିରେ ଲୋଟି ପଡ଼ୁଥିଲା। ଆଖିରେ ଆଖିରେ ଚାଲିଥିଲା ଭାବ ଦିଆନିଆ। ଦୁଇବର୍ଷ ପରେ ରଥ ଉପରେ ମହାପ୍ରଭୁଙ୍କୁ ଦେଖିବା ବେଳେ କୋହ ସମ୍ବରଣ କରିପାରୁ ନଥିଲେ ଭକ୍ତ। ଆଖିରୁ ନିଗିଡ଼ି ଆସୁଥିଲା ଅଭିମାନର ଅଶ୍ରୁ। ବଡ଼ଦାଣ୍ଡ ବି ଯେମିତି ଛାତି ଉପରେ ଏତେ ଭକ୍ତଙ୍କୁ ପାଇଁ ଖୁସି‌ରେ ଆତ୍ମହରା ହୋଇଉଠୁଥିଲା। ଏ ମହାମିଳନର ଦୃଶ୍ୟ ଥିଲା ଅନନ୍ୟ, ଅବର୍ଣ୍ଣନୀୟ।
Advertisment
ଭକ୍ତି ଓ ଆବେଗମୟ ପରିବେଶ ମଧ୍ୟରେ ବି ବାରି ହୋଇ ପଡ଼ୁଥିଲା କିଛି ଅଭାବବୋଧ। ପୂର୍ବ ଆକଳନ ସତ ହୋଇଥିଲା। ଭକ୍ତଙ୍କ ଆଗମନ ୧୦ଲକ୍ଷ ଅତିକ୍ରମ କରିଯାଇଥିଲା। ଭକ୍ତ ସିନା ବିଶ୍ବାସରେ ବଡ଼ଦାଣ୍ଡକୁ ଧାଇଁ ଆସିଥିଲେ, କିନ୍ତୁ ବ୍ୟବସ୍ଥାଗତ ତ୍ରୁଟି ପାଇଁ ବହୁ ଭକ୍ତଙ୍କୁ କଲବଲ ହେବାକୁ ପଡ଼ିଥିଲା। ଏସବୁ ସତ୍ତ୍ବେ ଅନୁକୂଳ ପାଗ ସଦୟ ହୋଇଥିଲା। ତେଣୁ ଭକ୍ତମାନେ ମହାପ୍ରଭୁଙ୍କୁ ଦର୍ଶନ କରିବା ସହ ରଥ ଟାଣିବାର ଅଭିପ୍ସାକୁ ବି ପୂରଣ କରିପାରିଥିଲେ। ରଥ ଟାଣି ଗୁଣ୍ଡିଚା ମନ୍ଦିରରେ ପହଞ୍ଚାଇବା ପରେ କ୍ଳାନ୍ତ ଭକ୍ତମାନେ ଶରଧାବାଲିରେ ଶୋଇଯାଇଥିଲେ। ସନ୍ଧ୍ୟାସୁଦ୍ଧା ରଥ ଶ୍ରୀଗୁଣ୍ଡିଚା ମନ୍ଦିରରେ ଲାଗିବା ପ‌ରେ ସ୍ଥାନୀୟ ଲୋକଙ୍କ ସୁଅ ଛୁଟିଥିଲା। ରଥାରୂଢ଼ ମହାପ୍ରଭୁଙ୍କୁ ଦେଖି ଅନେକ ଛଳଛଳ ହୋଇ ଯାଉଥିଲେ। ଅନେକ ରଥ ନିକଟରେ ଭଜନ ଗାଉଥିବା ବେଳେ ସେବାୟତମାନେ ଗୀତଗୋବିନ୍ଦ ଗାଇ ଆବେଗମୟ ପରିବେଶ ସୃଷ୍ଟି କରିଥିଲେ।

publive-image ରଥ ସମ୍ମୁଖରେ ଭକ୍ତଙ୍କ ସଂକୀର୍ତ୍ତନ

ଗୀତଗୋବିନ୍ଦ ଗାଇଲେ ସେବାୟତ, ମନେପଡ଼ିଲେ କ୍ରିଷନ୍‌ କୁମାର

ମହାପ୍ରଭୁ ଶ୍ରୀଗୁଣ୍ଡିଚା ମନ୍ଦିର ନିକଟରେ ପହଞ୍ଚିବା ପରେ ସେବାୟତମାନେ ଗୀତଗୋବିନ୍ଦ ଗାନ କରିଥିଲେ। ରଥ ସମ୍ମୁଖରେ ସେବାୟତମାନଙ୍କ ଦ୍ବାରା ଏହି ଭାବପୂର୍ଣ୍ଣ ନୈବେଦ୍ୟ ବେଶ୍‌ ରୋଚକ ଅନୁଭବ ଦେଇଥିଲା। ଭକ୍ତମାନେ ବି ସେବାୟତଙ୍କ ସହ ଗୀତଗୋବିନ୍ଦ ଗୁଣୁଗୁଣେଇଥିଲେ। ମାତ୍ର ଚଳିତ ବର୍ଷ ଏହି ଗୀତଗୋବିନ୍ଦ ଅବସରରେ ଶ୍ରୀଜଗନ୍ନାଥ ମନ୍ଦିର ପ୍ରଶାସନର ପୂର୍ବତନ ମୁଖ୍ୟ ପ୍ରଶାସକଙ୍କ ଅନୁପସ୍ଥିତି ବାରି ହୋଇ ପଡ଼ୁଥିଲା। ରଥ ସଫଳତାର ସହ ଗୁଣ୍ଡିଚା ମନ୍ଦିରରେ ପହଞ୍ଚିବା ପରେ ଏବଂ ବାହୁଡ଼ାରେ ଶ୍ରୀମନ୍ଦିର ନିକଟରେ ଲାଗିବା ପରେ କ୍ରିଷନ୍‌ କୁମାର ମଧ୍ୟ ସେବାୟତଙ୍କ ସହ ମିଶି ଗୀତଗୋବିନ୍ଦ ଗାନ କରୁଥିଲେ। ମାତ୍ର ଚଳିତ ବର୍ଷ ରଥଯାତ୍ରା‌ରେ କ୍ରିଷନ୍‌ କୁମାରଙ୍କ ଅଭାବ ଅନୁଭବ ହୋଇଥିଲା।

ଦୃଷ୍ଟିହୀନ ଭକ୍ତ ‌ଉପଭୋଗ କଲେ ରଥଯାତ୍ରା
ସେମାନେ ଦେଖିପାରୁନଥିଲେ ସତ, କିନ୍ତୁ ମହାପ୍ରଭୁ ରଥରେ ଗୁଣ୍ଡିଚା ଘର ଯିବା ବେଳେ ହରିବୋଲ ହୁଳହୁଳି ପଡ଼ିବା ମାତ୍ରେ ହାତ ଯୋଡ଼ି ମୁଣ୍ଡିଆ ମାରୁଥିଲେ। ଦେଖିପାରୁ ନଥିଲେ ହେଁ ରଥଯାତ୍ରାର ଏହି ମହାର୍ଘ ଅବସରକୁ ସେମାନେ ଉପଭୋଗ କରି ତୃପ୍ତ ହୋଇଥିଲେ। ବଳଗଣ୍ଡି ସ୍କୁଲ୍‌ର ତିନି ମହଲା ଉପରେ ଦିବ୍ୟାଙ୍ଗଙ୍କ ଦର୍ଶନ ପାଇଁ ହୋଇଥିବା ସ୍ବତନ୍ତ୍ର ଟେଣ୍ଟରେ କିଛି ଦୃଷ୍ଟିହୀନଙ୍କ ସମେତ ପ୍ରାୟ ୮୦ ଜଣ ଦିବ୍ୟାଙ୍ଗ ରଥଯାତ୍ରା ଉପଭୋଗ କରିଥିଲେ। ସ୍ବେଚ୍ଛାସେବୀ ସତ୍ୟନାରାୟଣ ସାହୁଙ୍କ କହିବା ମୁତାବକ, ସେଠାରେ ଦିବ୍ୟାଙ୍ଗମାନଙ୍କୁ ଜଳଖିଆ ଓ ମଧ୍ୟାହ୍ନ ଭୋଜନ ଦିଆଯାଇଥିଲା। ମୋଟ ୨୬ ଜଣ ସ୍ବେଚ୍ଛାସେବୀ ନିୟୋଜିତ ହୋଇଥିବା ବେଳେ ବଳଗଣ୍ଡି ଟେଣ୍ଟରେ ୧୦ ଜଣ ଥିବା ବ‌େଳେ ମାଳତୀପାଟପୁର, ତାଳବଣିଆ ଓ ରେଳଷ୍ଟେସନରେ ଅନ୍ୟ ସ୍ବେଚ୍ଛାସେବୀମାନେ ଉପସ୍ଥିତ ଥିଲେ। ବସ୍‌ ଓ ଟ୍ରେନ୍‌ ଯୋଗେ ଆସୁଥିବା ଦିବ୍ୟାଙ୍ଗମାନଙ୍କୁ ବ୍ୟାଟେରି ଅଟୋ ଯୋଗେ ବଳଗଣ୍ଡି ଟେଣ୍ଟକୁ ଆଣିଥି‌ଲେ।

ରଥଯାତ୍ରାରେ ସ୍ମାରକୀ ଡାକ ମୋହର
ରଥଯାତ୍ରା ଅବସରରେ ଡାକ ବିଭାଗ ପକ୍ଷରୁ ଲୋକାର୍ପିତ ହୋଇଛି ରଥଯାତ୍ରା ସ୍ମାରକୀ ଡାକ ମୋହର। ଦୁଇବର୍ଷ ପରେ ଭକ୍ତଙ୍କୁ ନେଇ ରଥଯାତ୍ରା ବିଭିନ୍ନ ଦୃଷ୍ଟିକୋଣରୁ ସ୍ବତନ୍ତ୍ର ହୋଇଥିବାରୁ ଏହି ‌ଡାକ ମୋହର ପ୍ରସ୍ତୁତ କରାଯାଇଥିଲା। ଆଜି ପୁରୀ ମୁଖ୍ୟ ଡାକ କାର୍ଯ୍ୟାଳୟ ପରିସରରେ ଓଡ଼ିଶା ଡାକ ମଣ୍ଡଳର ମୁଖ୍ୟ ପୋଷ୍ଟମାଷ୍ଟର ଜେନେରାଲ ଶୁଭେନ୍ଦୁ ସ୍ବାଇଁ, ପୁରୀ ଡିଭିଜନ ପୋଷ୍ଟ ଅଫିସ୍‌ର ସୁପରିଟେଣ୍ଡେଣ୍ଟ ବିପିନ ବିହାରୀ ମହାନ୍ତି, ପୁରୀ ହେଡ୍‌ ପୋଷ୍ଟ ଅଫିସ୍‌ ପୋଷ୍ଟମାଷ୍ଟର ଆରତି ଚୌଧୁରୀ ଏହି ସ୍ବତନ୍ତ୍ର ମୋହରକୁ ଉନ୍ମୋଚନ କରିଥିଲେ। ଏହାକୁ କିଣିବା ଲାଗି ବହୁ ଡାକ ଟିକେଟ୍‌ ପ୍ରେମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା।