ଓଡ଼ିଶାର ଦୁର୍ଗମ ଅଞ୍ଚଳରେ ଗୁଣାତ୍ମକ ଶିକ୍ଷା ପହଞ୍ଚି ପାରିଛି : ଧର୍ମେନ୍ଦ୍ର
ଶିକ୍ଷା କ୍ଷେତ୍ରରେ ମୋଦୀ ସରକାରଙ୍କ ପଦକ୍ଷେପ ନେଇ କେନ୍ଦ୍ର ମନ୍ତ୍ରୀଙ୍କ ଟ୍ୱିଟ୍
ଜାତୀୟ ଶିକ୍ଷା ନୀତି ଓ ଜାତୀୟ ନିଯୁକ୍ତି ସଂସ୍ଥା ଲୋକଙ୍କ ଜୀବନରେ ପରିବର୍ତ୍ତନ ଆଣିବ
Sambad is now on WhatsApp
Join and get latest news updates delivered to you via WhatsApp
ଭୁବନେଶ୍ୱର : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର ଶିକ୍ଷା କ୍ଷେତ୍ରରେ ଉଡାନ୍, ପ୍ରଗତି, ଆଇସିଟି ଆଧାରରେ ଶିକ୍ଷା ଏବଂ ଅନଲାଇନ ଶିକ୍ଷା ପ୍ରଦାନ କରିବା ପାଇଁ ସ୍ୱୟମ୍ ଭଳି ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି। ଏହା ସାରା ଦେଶ ତଥା ଓଡ଼ିଶାର ଦୁର୍ଗମ ଅଞ୍ଚଳରେ ଗୁଣାତ୍ମକ ଶିକ୍ଷା ପ୍ରଦାନ କରିବାର ଦୂରଦୃଷ୍ଟିକୁ ପୂରଣ କରୁଛି ବୋଲି କହିଛନ୍ତି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
ଶିକ୍ଷା କ୍ଷେତ୍ରରେ ମୋଦୀ ସରକାରଙ୍କ ପଦକ୍ଷେପ ସମ୍ପର୍କରେ ଶ୍ରୀ ପ୍ରଧାନ ଟ୍ୱିଟ୍ କରି କହିଛନ୍ତି ଯେ ପ୍ରଧାନମନ୍ତ୍ରୀ ଓଡ଼ିଶାର ଉଜ୍ଜ୍ୱଳ ଭବିଷ୍ୟତ ପାଇଁ ଶିକ୍ଷା କ୍ଷେତ୍ରରେ ବିକାଶକୁ ଗୁରୁତ୍ୱ ଦେଇ ଆସୁଛନ୍ତି। ଓଡ଼ିଶାରେ ବୌଦ୍ଧିକ ପୁଞ୍ଜିକୁ ଅଧିକ ସୁଦୃଢ଼ କରିବା ପାଇଁ ଏଠାରେ ଆଇଆଇଟି, ଆଇଆଇଏମ୍, ଆଇଜର, ସିପେଟ୍ ଏବଂ ଏନ୍ଏସ୍ଟିଆଇ ପରି ଜାତୀୟ ସ୍ତରର ଶିକ୍ଷାନୁଷ୍ଠାନ ପ୍ରତିଷ୍ଠା କରିଛନ୍ତି। ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା(ପିଏମକେଭିୱାଇ)ରେ ଓଡ଼ିଶାର ୨.୭ ଲକ୍ଷରୁ ଅଧିକ ଯୁବକଯୁବତୀ ନାମ ପଞ୍ଜୀକରଣ କରିବା ଭାରତ ସରକାରଙ୍କ ଓଡ଼ିଶା ତଥା ଭାରତକୁ ଦକ୍ଷ ମାନବ ସମ୍ବଳର ପେଣ୍ଠସ୍ଥଳୀ କରିବା ନିମନ୍ତେ ଥିବା ଅଦମ୍ୟ ପ୍ରଚେଷ୍ଟାକୁ ପ୍ରତିଫଳିତ କରୁଛି। ସମାଜର ଆର୍ଥିକ ଦୁର୍ବଳ ଶ୍ରେଣୀଙ୍କ ପାଇଁ ୧୦ ପ୍ରତିଶତ ସଂରକ୍ଷଣର ବ୍ୟବସ୍ଥା ଓଡ଼ିଶାର ମୌଳିକ ସୁବିଧାରୁ ବଞ୍ଚିତ ଥିବା ଶ୍ରେଣୀର ଯୁବପିଢ଼ିଙ୍କ ଆଶା ଓ ଆକାଂକ୍ଷାକୁ ପୂରଣ କରୁଛି । ଭାରତୀୟ ଶିକ୍ଷା ବ୍ୟବସ୍ଥାରେ ନୂଆ ଜାତୀୟ ଶିକ୍ଷା ନୀତି (ଏନଇପି) ମାଧ୍ୟମରେ ବୈପ୍ଳବିକ ପରିବର୍ତ୍ତନ ଆଣିବା ହେଉ କିମ୍ବା ଜାତୀୟ ନିଯୁକ୍ତି ସଂସ୍ଥାର ଗଠନ ହେଉ, ମୋଦୀ ସରକାର ଭାରତର ଶିକ୍ଷା କ୍ଷେତ୍ରରେ ସୁଧାର ଆଣି ଲକ୍ଷାଧିକଙ୍କ ଜୀବନରେ ପରିବର୍ତ୍ତନ ଆଣିପାରିଛନ୍ତି। ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ସମସ୍ତଙ୍କ ନିକଟରେ ଗୁଣାତ୍ମକ ଶିକ୍ଷା ପହଞ୍ଚାଇବା ଏବଂ ଗୁଣାତ୍ମକ ଶିକ୍ଷାର ମାନରେ ଅଭିବୃଦ୍ଧି ଆଣିବା ଓ ଏକବିଂଶ ଶତାବ୍ଦୀର ଦକ୍ଷତା ବିକାଶ ମାଧ୍ୟମରେ ଭାରତକୁ ବିଶ୍ୱ ଜ୍ଞାନର ମହାଶକ୍ତି କରିବା ପାଇଁ ନିରନ୍ତର କାର୍ଯ୍ୟ କରୁଛନ୍ତି ।
ଦେଶରେ ଥିବା ଶିକ୍ଷାନୁଷ୍ଠାନର ରାଙ୍କିଙ୍ଗ୍ରେ ସୁଧାର, ବିଶ୍ୱସ୍ତରୀୟ ବିଶ୍ୱବିଦ୍ୟାଳୟ ପ୍ରତିଷ୍ଠା, ଉଜ୍ଜ୍ୱଳ ଭବିଷ୍ୟତ ପାଇଁ ଯୁବପିଢ଼ିଙ୍କ ଦକ୍ଷତା ବିକାଶ, ନିୟାମକ ସଂସ୍ଥାରେ ସଂସ୍କାର ଏବଂ ବିଦ୍ୟାଳୟରୁ ବିଶ୍ୱବିଦ୍ୟାଳୟ ପର୍ଯ୍ୟନ୍ତ ଶିକ୍ଷା ଦାନରେ ଢାଞ୍ଚାଗତ ସଂସ୍କାର ଆଣି ଭାରତ ସରକାର ଶିକ୍ଷା କ୍ଷେତ୍ରର ପୁନରୁଦ୍ଧାର କରୁଛନ୍ତି। ସଶକ୍ତ ଏବଂ ଆତ୍ମନିର୍ଭର ଭାରତ ନିର୍ମାଣ ପାଇଁ ଗୁଣାତ୍ମକ ଶିକ୍ଷା ନିତ୍ୟାନ୍ତ ଆବଶ୍ୟକ ବୋଲି ମୋଦୀ ସରକାର ବିଶ୍ୱାସ କରନ୍ତି। ଭାରତକୁ ବିଶ୍ୱଗୁରୁ କରିବା ଓ ମୂଳ ସଂସ୍କୃତି ସହ ଜଡ଼ିତ ଦେଶର ଛାତ୍ରଛାତ୍ରୀଙ୍କୁ ବିଶ୍ୱସ୍ତରର ଗଢ଼ି ତୋଳିବା ପାଇଁ ସରକାର ପ୍ରତିଶ୍ରୁତିବଦ୍ଧ ବୋଲି ଶ୍ରୀ ପ୍ରଧାନ କହିଛନ୍ତି।