ଧାମନଗର: ଧାମନଗର ଅଂଚଳରେ ମଦ, ଗଞ୍ଜେଇ ଓ ଧଳା ଜହର କାରବାର ହେଉଥିବା ବେଳେ ଧାମନଗର ପୁଲିସ ନକଲି ଜର୍ଦ୍ଦା କାରଖାନା ଉପରେ ଚଢ଼ଉ କରି ବିପୁଳ ପରିମାଣର ନକଲି ଜର୍ଦ୍ଦା ଜବତ ହେବ ସହ ଜଣକୁ ଗିରଫ କରିଛି ପୁଲିସ।
ଧାମନଗର ଥାନାଠାରୁ ୫ଶହ ମିଟର ଦୂରରେ ହବିବିନଗରଠାରେ ସେକ୍ ହାସିମ୍‌ ଘରେ ଦୀର୍ଘ ବର୍ଷ ଧରି ବିଭିନ୍ନ ବ୍ରାଣ୍ଡର ନକଲି ଜର୍ଦ୍ଦା ତିଆରି କରି ଲକ୍ଷ ଲକ୍ଷ ଟଙ୍କାର ବେପାର କରୁଥିବା ବେଳେ ଧାମନଗର ଥାନା ଅଧିକାରୀ ବନମାଳୀ ବାରିକ ଉକ୍ତ କାରଖାନାରେ ସନ୍ଧ୍ୟାରେ ଚଢ଼ଉ କରି ପ୍ରାୟ ୨ଲକ୍ଷରୁ ଊର୍ଦ୍ଧ୍ୱ ଟଙ୍କାର ନକଲି ଜର୍ଦ୍ଦା ସାମଗ୍ରୀ ଓ ଯନ୍ତ୍ରାଂଶ ଜବତ କରିଛନ୍ତି। ଏଥିରେ ୨ବସ୍ତା ଓ ୪ବାଲତି ନକଲି ଜର୍ଦ୍ଦା, କେମିକାଲ ବୋତଲ, ପିପରମେଣ୍ଟ, ଜରି ୩ବସ୍ତା, ଜରି ସିଲେଇ ମେସିନ୍‌, କଟର ମେସିନ୍‌, ଜର୍ଦ୍ଦା ଟିଣ ଆଦି ଜବତ କରାଯାଇଥିଲା। ଘଟଣା ସ୍ଥଳରୁ ଘର ମାଲିକ ଫେରାର ହୋଇଯାଇଥିବା ବେଳେ ନକଲି ଜର୍ଦ୍ଦା କାରବାର କରୁଥିବା ହବିବିନଗରର ସେକ୍ ସାହିଲଙ୍କୁ୍ ପୁଲିସ ଗିରଫ କରିଛି। ଅନ୍ୟମାନେ ଫେରାର ହୋଇଯାଇଛନ୍ତି। ଏଏସ୍‌ଆଇ ମୋନାଲିସା ପ୍ରଧାନଙ୍କ ଅଭିଯୋଗ କ୍ରମେ ୩୨୮/୨୨ରେ ଏକ ମାମଲା ରୁଜୁ କରି ତଦନ୍ତ ଜାରି ରହିଛି।