ନାଇଜରରେ ଭାରତର ପ୍ରଥମ ସ୍ନାତକୋତ୍ତର ଭେଷଜ ଓ ରେଡିଓଲୋଜିକାଲ୍ ଫିଜିକ୍ସ ପାଠ୍ୟକ୍ରମ
ଖୋର୍ଦ୍ଧା: ଜଟଣୀ ନିକଟରେ ଥିବା ଭାରତ ସରକାରଙ୍କ ଜାତୀୟ ବିଜ୍ଞାନ ଓ ଗବେଷଣା ପ୍ରତିଷ୍ଠାନ (ଏନ୍ଆଇଏସ୍ଇଆର୍)ରେ ରାଜ୍ୟର ପ୍ରଥମ ଭେଷଜ ଓ ରେଡିଓଲୋଜିକାଲ୍ ଫିଜିକ୍ସ ପାଠ୍ୟକ୍ରମ ୧୦ଜଣ ରାଜ୍ୟ ଓ ରାଜ୍ୟ ବାହାରର ଛାତ୍ରଛାତ୍ରୀଙ୍କୁ ନେଇ ଆରମ୍ଭ ହୋଇଛି । ଏହି ପାଠ୍ୟକ୍ରମ କର୍କଟ ରୋଗ ଚିକିତ୍ସାକ୍ଷେତ୍ରରେ ଗବେଷଣା ଓ ନିଯୁକ୍ତିର ଏକ ନୂତନ ଆଶା ସଂଚାର କରିବ ବୋଲି ପ୍ରସିଦ୍ଧ ଭାବା ଆଣବିକ ଗବେଷଣା କେନ୍ଦ୍ରର ବୈଜ୍ଞାନିକ ତଥା ନିର୍ଦ୍ଦେଶକ ଅଜିତ କୁମାର ମହାନ୍ତି ପାଠ୍ୟକ୍ରମର ଉଦ୍ଘାଟନ ଭାବେ ଯୋଗ ଦେଇ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ନିର୍ଦ୍ଦେଶକ ଶ୍ରୀ ମହାନ୍ତି କହିଛନ୍ତି ଯେ ପୂର୍ବେ ରେଡିଓଲୋଜିରେ ଡିପ୍ଲୋମା ପାଠ୍ୟକ୍ରମ ଥିଲା, କିନ୍ତୁ ୧୯୬୨ ମସିହାରେ ପ୍ରତିଷ୍ଠିତ ଭାବା ଆଣବିକ ଗବେଷଣା ମଧ୍ୟରେ ସ୍ନାତକୋତ୍ତର ପାଠ୍ୟକ୍ରମ ନଥିଲା । ଦେଶରେ ପ୍ରଥମ ଥର ପାଇଁ ଏହି ପାଠ୍ୟକ୍ରମ ଓଡ଼ିଶାର ନାଇଜରରେ ଆରମ୍ଭ ହେବା ଏକ ଗୌରବର କଥା । ଏହି ପାଠ ପଢ଼ିବା ପରେ ବିଦ୍ୟାର୍ଥୀଙ୍କୁ ୧ ବର୍ଷ ବିଭିନ୍ନ ବୃହତ୍ ଓ ପରିଚିତ ଗବେଷଣାକେନ୍ଦ୍ର ଓ ଚିକିତ୍ସାଳୟରେ ଇଂଟେର୍ନସିପ୍ର ସୁଯୋଗ ମିଳିବ ।
ନାଇଜରର ନିର୍ଦ୍ଦେଶକ ସୁଧାକର ପଣ୍ଡା ଏହି ଅବସରରେ ନିଜର ପ୍ରତିକ୍ରିୟାରେ କହିଛନ୍ତି ଯେ ଗତ ୪ ବର୍ଷ ଧରି ଏହି ପାଠ୍ୟକ୍ରମ ନାଇଜର-ଓଡ଼ିଶାରେ ଆରମ୍ଭ କରିବାକୁ ସେ ପ୍ରୟାସ କରିଥିଲେ । ଆଜି ପ୍ରଥମ ବ୍ୟାଚ୍ର ପ୍ରଥମ ଦିନ । ଯେଉଁଯେଉଁ ସ୍ଥାନରେ କର୍କଟ ରୋଗ ପାଇଁ ବିକିରଣ (ରେଡିଏସନ୍) ଚିକିତ୍ସା କରାଯାଏ ସେଠାରେ ମେଡିକାଲ୍ ଫିଜିସିଷ୍ଟଙ୍କ ଆବଶ୍ୟକତା ହୁଏ । ଦେଶରେ ସ୍ନାତକୋତ୍ତର ଫିଜିସିଷ୍ଟଙ୍କ ସଂଖ୍ୟା ନଗଣ୍ୟ । ଏଣୁ ଏହି ପାଠ୍ୟକ୍ରମ ସେହିକ୍ଷେତ୍ରର ଆବଶ୍ୟକତା ପୂରଣ କରିବା ସହ ନୂତନ ନିଯୁକ୍ତିର ସୁଯୋଗ ସୃଷ୍ଟି କରିବ । ନାଇଜରର କୁଳସଚିବ ଅଭୟ କୁମାର ନାୟକ କହିଛନ୍ତି ଯେ ୨୦୨୧ ଅଗଷ୍ଟ ମାସରେ ଏହି ପାଠ୍ୟକ୍ରମ ଆରମ୍ଭ କରିବାର ଯୋଜନା ହୋଇଥିଲା, ଏହାର ଠିକ୍ ୧ ବର୍ଷ ପରେ ପ୍ରଥମ ବ୍ୟାଚ୍ରେ ୧୦ଜଣ ଛାତ୍ର ନାମାଙ୍କନପତ୍ର ଦାଖଲ କରିଛନ୍ତି । ସେମାନଙ୍କ ମଧ୍ୟରୁ ଓଡ଼ିଶାର ୩ ଜଣ, ପଶ୍ଚିମବଙ୍ଗରୁ ୩ଜଣ, ହରିଆଣା, ରାଜସ୍ଥାନ, ମଧ୍ୟପ୍ରଦେଶ ଆାଦି ରାଜ୍ୟରୁ ଅନ୍ୟ ଛାତ୍ରଛାତ୍ରୀମାନେ ଅଛନ୍ତି ।
ସେହିଭଳି ପଦାର୍ଥ ବିଜ୍ଞାନର ପ୍ରଫେସର ତଥା ସିଏମ୍ଆର୍ପିର ସଂଯୋଜକ ବେଦାଙ୍ଗଦାସ ମହାନ୍ତି କହିଛନ୍ତି ଯେ ଭେଷଜ ପଦାର୍ଥ ବିଜ୍ଞାନୀଙ୍କ ଦାୟିତ୍ୱ ହେଉଛି ବିକିରଣ ଚିକିତ୍ସା ଓ ନିରାକରଣ ସହିତ ଉଚ୍ଚମାନର ଉପକରଣ ଚୟନ, ରକ୍ଷଣାବେକ୍ଷଣ ଓ ସ୍ଥାପନ ଯୋଜନା, ଏହି ପାଠ୍ୟକ୍ରମ ଏହି ସମସ୍ତ ଆବଶ୍ୟକତାକୁ ଯଥାର୍ଥରେ ପୂରଣ କରିବ । କାର୍ଯ୍ୟକ୍ରମରେ ଆଚାର୍ଯ୍ୟ ହରିହର କକର୍ଟ କେନ୍ଦ୍ରର ପ୍ରଫେସର, ନାଇଜରର ଅନ୍ୟ ଅଧ୍ୟାପକ, ଅଧ୍ୟାପିକା ଓ କର୍ମଚାରୀମାନେ ଉପସ୍ଥିତ ଥିଲେ ।