ମହିଳା ସ୍ୱାସ୍ଥ୍ୟକର୍ମୀ ପ୍ରଶିକ୍ଷଣ କେନ୍ଦ୍ରରେ ପ୍ରଥମ ବର୍ଷ ଛାତ୍ରୀଙ୍କୁ ରାଗିଂ ଅଭିଯୋଗ
ଦେବଗଡ଼: ଭୁବନେଶ୍ବରସ୍ଥିତ ବିଜେବି କଲେଜ ଛାତ୍ରୀ ରୁଚିକା ମହାନ୍ତିଙ୍କ ଆତ୍ମହତ୍ୟା ଘଟଣା ଥମିନଥିବାବେଳେ ଆଜି ଦେବଗଡ଼ ମହିଳା ସ୍ୱାସ୍ଥ୍ୟକର୍ମୀ ପ୍ରଶିକ୍ଷଣ କେନ୍ଦ୍ରରେ ପ୍ରଥମ ବର୍ଷ ଛାତ୍ରୀଙ୍କୁ ରାଗିଂ ହୋଇଥିବା ନେଇ ଅଭିଯୋଗ ହୋଇଛି । ତେବେ ସଂପୃକ୍ତା ଛାତ୍ରୀଙ୍କ ଭାଇ ଦୁଷ୍ମନ୍ତ କିଷାନ ଏନେଇ ଦେବଗଡ ସିଡିଏମଓ ଡା. ସାଧନା ଦାଶଙ୍କୁ ଲିଖିତ ଅଭିଯୋଗ କରିଛନ୍ତି । ଲିଖିତ ଅଭିଯୋଗ ପାଇବା ପରେ ସିଡିଏମଓ ଶ୍ରୀମତୀ ଦାଶ ଘଟଣାର ତଦନ୍ତ ଆରମ୍ଭ କରିଥିବା ଜଣାପଡିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ସମ୍ବଲପୁର ଜିଲ୍ଲା ଭୋଜପୁର ପଞ୍ଚାୟତ ଅନ୍ତର୍ଗତ ଖୁଣ୍ଟଲାବାହାଳ ଗ୍ରାମର ବିବାହିତା ଛାତ୍ରୀ କଳ୍ପନା ଦେବଗଡ ମହିଳା ସ୍ୱାସ୍ଥ୍ୟକର୍ମୀ ପ୍ରଶିକ୍ଷଣ କେନ୍ଦ୍ରରେ ପ୍ରଥମ ବର୍ଷ ଛାତ୍ରୀ ଭାବେ ପଢୁଛନ୍ତି । କଳ୍ପନାଙ୍କୁ ଗତ ୩ମାସ ହେଲା ୪ ଜଣ ସିନିୟର ଛାତ୍ରୀ ମାନସିକ ନିର୍ଯ୍ୟାତନା ଦେଉଥିବା ତାଙ୍କର ଭାଇ ଦୁଷ୍ମନ୍ତ ଅଭିଯୋଗ କରିଛନ୍ତି ।ଏହାସହିତ ଉକ୍ତ ଛାତ୍ରୀଜଣକ ଘଟଣା ସଂପର୍କରେ ଆଣ୍ଟି ରାଗିଂ ସ୍କାର୍ଡକୁ ମଧ୍ୟ ସୂଚନା ଦେଇଛନ୍ତି । ଉକ୍ତ ଘଟଣା ସଂପର୍କରେ ଦୁଷ୍ମନ୍ତ ଦେବଗଡ ସିଡିଏମଓଙ୍କ ନିକଟରେ ଲିଖିତ ଅଭିଯୋଗ କରିବା ପରେ ପ୍ରଶିକ୍ଷଣ କେନ୍ଦ୍ରରେ ସିଡିଏମଓ ଶ୍ରୀମତୀ ଦାଶ ଏବଂ ପ୍ରଶିକ୍ଷଣ କେନ୍ଦ୍ରର କର୍ମଚାରୀମାନେ ଘଟଣାର ତଦନ୍ତ ଆରମ୍ଭ କରିଛନ୍ତି । ଦୋଷୀ ଛାତ୍ରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନହେଲେ ଥାନାରେ କରିବେ ଅଭିଯୋଗ କରିବେ ବୋଲି ଛାତ୍ରୀଙ୍କ ଭାଇ ଦୁଷ୍କନ୍ତ ପ୍ରକାଶ କରିଛନ୍ତି ।