ରାହୁଲଙ୍କ ପ୍ରତିଶ୍ରୁତି: ରାଜ୍ୟର ୩୦ ଲକ୍ଷ ଯୁବବର୍ଗଙ୍କୁ ନିଯୁକ୍ତି ଦେବୁ

ଭଦ୍ରକ: କଂଗ୍ରେସ ନେତା ରାହୁଲ ଗାନ୍ଧୀ ଭଦ୍ରକର ସିମୁଳିଆଠାରେ ଏକ ଜନସଭାକୁ ଗୁରୁବାର ସମ୍ବୋଧିତ କରିଛନ୍ତି। ରାହୁଲ ବିଜେପି ଏବଂ ବିଜେଡିକୁ ଟାର୍ଗେଟ କରିଛନ୍ତି। ବିଜେପି ଏବଂ ବିଜେଡି ମଧ୍ୟରେ ସମ୍ପର୍କ ଥିବା ସେ ଅଭିଯୋଗ କରିଛନ୍ତି। ଦୁଇ ଦଳର ଚିନ୍ତାଧାରା ସମାନ ଥିବା ସେ କହିଛନ୍ତି। ବିଜେପି ସମ୍ବିଧାନକୁ ଶେଷ କରିବାକୁ ଚାହୁଁଛି।

ପୃଥିବୀର କୌଣସି ଶକ୍ତି ଭାରତୀୟ ସମ୍ବିଧାନକୁ ନଷ୍ଟ କରି ପାରିବ ନାହିଁ ବୋଲି ସେ କହିଛନ୍ତି। କଂଗ୍ରେସ କ୍ଷମତାକୁ ଆସିଲେ ଅଗ୍ନିବୀର ଯୋଜନାକୁ ରଦ୍ଦ କରିବ। ଏହା ସହିତ ରାଜ୍ୟର ୩୦ ଲକ୍ଷ ଯୁବବର୍ଗଙ୍କୁ ନିଯୁକ୍ତି ପ୍ରଦାନ କରାଯିବ।

ଜୁନ୍ ୪ରେ ଆମେ କ୍ଷମତାକୁ ଆସିଲେ ମହାଲକ୍ଷ୍ମୀ ଯୋଜନା ଆରମ୍ଭ କରିବୁ। ଜୁନ୍ ୫ରେ ମହିଳାଙ୍କ ବ୍ୟାଙ୍କ ଖାତାକୁ ୮,୫୦୦ଟଙ୍କା ପଠାଯିବ ବୋଲି ସେ କହିଛନ୍ତି। ଏହା ସହିତ ଚାଷୀଙ୍କ ଋଣ ଛାଡ କରାଯିବ। ମୁଁ ବିଜେପି ବିରୋଧରେ ଲଢୁଛି ବୋଲି ମୋ ବିରୋଧରେ ୨୪ ମାମଲାର ଜାରି ରହିଥିବା ସେ କହିଛନ୍ତି।

ଇଣ୍ଡିଆ ମେଣ୍ଟ ସରକାର ଗଣମାଧ୍ୟମର କଥା ଶୁଣିବନି ବରଂ ଚାଷୀ, ଗରିବ, ଯୁବକ, ଆଦିବାସୀ ଓ ପଛୁଆ ବର୍ଗଙ୍କ କଥା ଶୁଣିବ । ୯୫% ଲୋକଙ୍କ ସରକାର ହେବ ଇଣ୍ଡିଆ ମେଣ୍ଟ ସରକାର । ମୋଦୀଙ୍କ ଭଳି ୧% ଲୋକଙ୍କ ପାଇଁ ସରକାର କରିବୁନି ।

ବିଜେପି ଓଡ଼ିଶାର ଅପମାନ କରିଛି । ମହାପ୍ରଭୁ ଶ୍ରୀଜଗନ୍ନାଥଙ୍କୁ ଅପମାନିତ କରିବା ସହ ପ୍ରତିଟି ଓଡ଼ିଆଙ୍କୁ ଅପମାନିତ କରିଛନ୍ତି ବିଜେପି ନେତା । ନରେନ୍ଦ୍ର ମୋଦୀ କହୁଛନ୍ତି, ମୁଁ ଭଗବାନଙ୍କ କାମ କରୁଛି । ବିଜେପି ଦଳର ନେତା କହୁଛନ୍ତି, ମହାପ୍ରଭୁ ଶ୍ରୀଜଗନ୍ନାଥ ମୋଦୀଙ୍କ ଭକ୍ତ । ଏମାନଙ୍କର ଚିନ୍ତାଧାରରେ କେତେ ଅହଙ୍କାର ଭରି ରହିଛି । ବିଜେପି ନେତା କହୁଛନ୍ତି, ମୋଦୀଙ୍କ ପାଇଁ ଭଗବାନ କାମ କରୁଛନ୍ତି । ସମ୍ବିଧାନକୁ ବଞ୍ଚାଇବାକୁ ଲୋକଙ୍କ ସରକାର ଗଠନ କରିବାକୁ ଆହ୍ୱାନ ଦେଇଛନ୍ତି ରାହୁଲ ଗାନ୍ଧୀ ।

ଅଦାନୀ ଓ ଅମ୍ବାନୀଙ୍କୁ ସାଧାରଣ ଲୋକଙ୍କ ଟଙ୍କା ଦେଇଛନ୍ତି ମୋଦୀ । ସେମାନେ ବିଦେଶରେ ବ୍ୟବସାୟ କରୁଛନ୍ତି, ବଙ୍ଗଳା କିଣୁଛନ୍ତି । କିନ୍ତୁ ଏହି ଟଙ୍କା ଓଡ଼ିଶାର ମହିଳାଙ୍କୁ ଆମେ ଦେବୁ । ମହିଳା ମାନେ ଏହାକୁ ବିଭିନ୍ନ ଉପାୟରେ ଖର୍ଚ୍ଚ କରିବେ । ଓଡ଼ିଶାର ଚାଷୀ ଓ ଶ୍ରମିକଙ୍କୁ ମଧ୍ୟ ସବୁ ପ୍ରକାର ସୁବିଧା ଯୋଗାଇଦେବୁ । ଚାଷୀଙ୍କର ଋଣ ଛାଡ କରିବୁ । ଚାଷୀଙ୍କ ପାଇଁ ଋଣ ଛାଡ ଉଦ୍ୟୋଗ କରିବୁ । ଯେତେବେଳେ ଚାଷୀଙ୍କୁ ଋଣ ଛାଡର ଆବଶ୍ୟକତା ପଡିବ ସେତେବେଳେ ଏହି ଉଦ୍ୟୋଗର ନିର୍ଦ୍ଦେଶରେ ଭାରତ ସରକାର ଚାଷୀଙ୍କ ଋଣ ଛାଡ କରିବ । ଯୁବକଙ୍କୁ ଅଗ୍ନିବୀର ଯୋଜନା ବହୁତ କଷ୍ଟ ଦେଇଛି । ଇଣ୍ଡିଆ ମେଣ୍ଟ ସରକାର ହେଲେ  ଶ୍ରମିକଙ୍କୁ ମନେରଗାରେ ଦୈନିକ ପାରିଶ୍ରମିକ ୪୦୦ ଟଙ୍କା ମିଳିବ । ଯୁବକଙ୍କୁ ପେହେଲି ନୌକରି ପକ୍କି ଯୋଜନାରେ ନିଯୁକ୍ତି ମିଳିବ ଏବଂ ଆକାଉଣ୍ଟରେ ବାର୍ଷିକ ୧ ଲକ୍ଷ ଟଙ୍କା ମିଳିବ ।