ଭୁବନେଶ୍ବର : ନିର୍ବାଚନ ଆଚରଣ ବିଧି ବଳବତ୍ତର ଥିବା ବେଳେ ରେଳ ବିଦ୍ୟୁତକରଣ ଅଫିସକୁ ଭୁବନେଶ୍ବରରୁ ବେଙ୍ଗାଲୁରୁ ସ୍ଥାନାନ୍ତର କରିବା ନିଷ୍ପତ୍ତି ଦୁର୍ଭାଗ୍ୟଜନକ। ଏହା ବିରୋଧରେ ବିଜେଡି ନିର୍ବାଚନ ଆୟୋଗଙ୍କୁ ଭେଟି ଫେରାଦ ହେବ। ଆଜି ବିଜେଡି ସାଧାରଣ ସମ୍ପାଦକ (ଗଣମାଧ୍ୟମ ବ୍ୟାପାର) ମାନସ ମଙ୍ଗରାଜ ପ୍ରେସ୍ ବିଜ୍ଞପ୍ତି ଜରିଆରେ ଜଣାଇଛନ୍ତି, ବିଜେପି ନେତୃତ୍ବାଧୀନ କେନ୍ଦ୍ର ସରକାରଙ୍କ ଏପରି ଆଚରଣ ବିଧି ଉଲଂଘନ ନେଇ ନିର୍ବାଚନ ଆୟୋଗଙ୍କ ପାଖରେ ବିଜୁ ଜନତା ଦଳ ଅଭିଯୋଗ କରିବ। ସ୍ଥାନାନ୍ତରକୁ ରୋକିବା ସହ ନିର୍ବାଚନ ଆଚରଣ ବିଧି ଉଲଂଘନ ପାଇଁ ବିଜେପି ସରକାର ଯେଉଁ ପଦାଧିକାରୀମାନେ ଏଥିରେ ସଂପୃକ୍ତ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିବ। ଓଡ଼ିଶାରେ ଆଉ ରେଳ ପ୍ରକଳ୍ପ କାମ ସମ୍ପୂର୍ଣ୍ଣ ହୋଇ ନ ଥିବା ବେଳେ କର୍ଣ୍ଣାଟକ ଭୋଟ ହାତେଇବା ପାଇଁ ବିଜେପି ସରକାର ଓଡ଼ିଶା ପ୍ରତି ପୁଣି ଥରେ ବୈମାତୃକ ମନୋଭାବ ଦେଖାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ମଙ୍ଗରାଜ କହିଛନ୍ତି, ରେଳ ବିଦ୍ୟୁତକରଣ ଅଫିସ ଭୁବନେଶ୍ବରରୁ ବେଙ୍ଗାଲୁରୁ ସ୍ଥାନାନ୍ତର କରିବା ନେଇ ଗତକାଲି ବିଜୁ ଜନତା ଦଳ ନିନ୍ଦା କରି ବିବୃତି ରଖିଥିଲା। କିନ୍ତୁ ବିଜେପି ଏହି ପ୍ରସଙ୍ଗରେ ସମ୍ପୂର୍ଣ୍ଣ ଭାବେ ନିଜର ହାତ ଧୋଇ ଦେଇ ଭୁବନେଶ୍ବରରୁ ରେଳବାଇ ବିଦ୍ୟୁତକରଣ ଅଫିସ ସ୍ଥାନାନ୍ତରକୁ ଯୁକ୍ତିଯୁକ୍ତ ଦର୍ଶାଇଥିଲା। ଏଥିରୁ ଗୋଟିଏ କଥା ସ୍ପଷ୍ଟ ହେଉଛି, ଏକ ବିଭ୍ରାନ୍ତ, ପ୍ରବଞ୍ଚନା ଓ ପ୍ରହେଳିକାର ବାତାବରଣ ସୃଷ୍ଟି କରି ନିଜର ଦାୟିତ୍ବରୁ ଓହରିଯିବା ପାଇଁ ବିଜେପି ଚାହୁଁଛି। ଏବେ ଓଡ଼ିଶାରେ ୩ଟି ପ୍ରକଳ୍ପର କାର୍ଯ୍ୟ ଯଥା- ଖୋର୍ଦ୍ଧାରୋଡ଼-ବଲାଙ୍ଗୀର, ଲାଞ୍ଜିଗଡ଼ ରୋଡ଼-ଜୁନାଗଡ଼ ଏବଂ ନୂଆପଡ଼ା-ଗୁଣୁପୁର ପାଇଁ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଥିଲା ବେଳେ ଆହୁରି ୩ଟି ପ୍ରକଳ୍ପର କାର୍ଯ୍ୟ ଆରମ୍ଭ ହେବାର ସୂଚନା ମିଳୁଛି। ଏପରି ସ୍ଥିତିରେ ଓଡ଼ିଶାରୁ ରେଳ ବିଦ୍ୟୁତକରଣ କାମ ସମ୍ପୂର୍ଣ୍ଣ ହୋଇଛି ବୋଲି ଦର୍ଶାଇ ବିଦ୍ୟୁତକରଣ ୟୁନିଟକୁ ସ୍ଥାନାନ୍ତର କରିବା ପାଇଁ ନିଷ୍ପତ୍ତି ନେଇ ଓଡ଼ିଶା ପ୍ରତି ଉଦାସୀନ ମନୋଭାବକୁ ଦର୍ଶାଉଛି।
ଶ୍ରୀମଙ୍ଗରାଜ ଆହୁରି ଦର୍ଶାଇଛନ୍ତି, ସାଧାରଣ ନିର୍ବାଚନର ଅବ୍ୟବହିତ ପୂର୍ବରୁ ଆନ୍ଧ୍ରପ୍ରଦେଶର ଭୋଟ ହାତେଇବା ପାଇଁ ତରବରିଆ ଭାବରେ ବିଜେପି ସରକାର ଦକ୍ଷିଣତଟ ରେଳବାଇ ଡିଭିଜନ୍ ଗଠନ କରି ଓଡ଼ିଶାର ପୂର୍ବତଟ ରେଳବାଇକୁ କୁଠାରଘାତ କରିଥିଲା। ସେହିକ୍ରମରେ କର୍ଣ୍ଣାଟକରେ ଭୋଟ ହାତେଇବା ପାଇଁ ନିର୍ବାଚନ ଆଚରଣ ବିଧି ଲାଗୁ ହୋଇଥିବା ବେଳେ ବିଜେପି ସରକାର ଏ ଅଫିସକୁ ବେଙ୍ଗାଲୁରୁ ସ୍ଥାନାନ୍ତର କରୁଛି।