ବଙ୍ଗୋପସାଗରରେ ପୁଣି ଘୂର୍ଣ୍ଣିବଳୟ, ଦୁଇ ଦିନ ବର୍ଷା : ମୌସୁମୀ ପ୍ରତ୍ୟାବର୍ତନରେ ବିଳମ୍ବ ହେବ, ଶୀତ ବି ଡେରିରେ ଆସିପାରେ
ଭୁବନେଶ୍ବର : ଉତ୍ତର-ପୂର୍ବ ବଙ୍ଗୋପସାଗରରେ ପୁଣି ଏକ ଘୂର୍ଣ୍ଣିବଳୟ ସୃଷ୍ଟି ହୋଇଛି। ଯାହାକି ଆସନ୍ତା ୨୪ ଘଣ୍ଟା ମଧ୍ୟରେ ଅଧିକ ଘନୀଭୂତ ହୋଇ ଲଘୁଚାପର ରୂପ ନେବ। ପ୍ରଭାବରେ ଖୋର୍ଦ୍ଧା, ପୁରୀ, କଟକ, ଢେଙ୍କାନାଳ, କେନ୍ଦୁଝର, ମୟୂରଭଞ୍ଜ, ବୌଦ୍ଧ, ବାଲେଶ୍ୱର ଜିଲ୍ଲାର ଗୋଟିଏ ଦୁଇଟି ସ୍ଥାନରେ ଘଡ଼ଘଡ଼ି ସହ ବର୍ଷା ହୋଇପାରେ। ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ଅନୁଯାୟୀ କେନ୍ଦୁଝର ଓ ସୁନ୍ଦରଗଡ଼ର କେତେକ ସ୍ଥାନରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ସମ୍ଭାବ୍ୟ ଲଘୁଚାପ ଯୋଗୁଁ ୨୯ ଓ ୩୦ ତାରିଖରେ ଉତ୍ତର ବଙ୍ଗୋପସାଗରରେ ସମୁଦ୍ର ଅଶାନ୍ତ ରହିବ। ଘଣ୍ଟାପ୍ରତି ୪୦ରୁ ୫୦ କିମି ବେଗରେ ପବନ ବୋହିବ। ତେଣୁ ମତ୍ସ୍ୟଜୀବୀମାନେ ସମୁଦ୍ର ମଧ୍ୟକୁ ନ ଯିବା ପାଇଁ ସତର୍କ ସୂଚନା ଜାରି କରାଯାଇଛି। ଗତ ୧୨ ଘଣ୍ଟା ମଧ୍ୟରେ ପାରାଦୀପରେ ସର୍ବାଧିକ ୪୬.୪ ମିମି ବର୍ଷା ହୋଇଥିବା ବେଳେ ବାରିପଦାରେ ୧୪, ଅନୁଗୁଳରେ ୧୨, କଟକରେ ୧୦.୬, କେନ୍ଦୁଝର ଓ ଭବାନୀପାଟଣାରେ ୧୦ ମିମି ଲେଖାଏ, ବାଲେଶ୍ବରରେ ୮, ଚାନ୍ଦବାଲିରେ ୫ ମିମି ବର୍ଷା ରେକର୍ଡ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକଙ୍କ କହିବାନୁଯାୟୀ ଉତ୍ତର ଭାରତରେ ଏକ ଘୂର୍ଣ୍ଣିବଳୟ ରହିଥିବାରୁ ଓଡ଼ିଶାକୁ ଦକ୍ଷିଣରୁ ସାମୁଦ୍ରିକ ପବନ ବୋହୁଛି। ଏହାଦ୍ବାରା ରାଜ୍ୟରେ ବିଭିନ୍ନ ସ୍ଥାନରେ ବର୍ଷା ହେବ। ତେବେ ବଙ୍ଗୋପସାଗରରେ ଏକ ଗୁରୁଚାପ ବଳୟ ରହିଛି। ୩୦ ବେଳକୁ ଏହା ଅଧିକ ବିସ୍ତୁତ ହେବ। ତେଣୁ ପଶ୍ଚିମ ଭାରତରୁ ରାଜ୍ୟକୁ ପବନ ବୋହିବ। ଯାହାଦ୍ବାରା କି ବର୍ଷା କମିଯିବ। ୨୮ରେ ମୟୂରଭଞ୍ଜ, କେନ୍ଦୁଝର ଓ ବାଲେଶ୍ବରର ଗୋଟିଏ ଦୁଇଟି ସ୍ଥାନରେ ପ୍ରବଳ ବର୍ଷା ହୋଇପାରେ। ଆଭ୍ୟନ୍ତରୀଣ ଦକ୍ଷିଣ ଓ ପଶ୍ଚିମ ଓଡ଼ିଶାରେ ମଧ୍ୟମ ଧରଣର ବର୍ଷା ଓ ଉପକୂଳରେ ସ୍ବଳ୍ପ ବର୍ଷା ହେବାର ସମ୍ଭାବନା ରହିଛି। ୨୯ ଓ ୩୦ରେ ପଶ୍ଚିମ ଓଡ଼ିଶାରେ ସ୍ବଳ୍ପ ବର୍ଷା ଓ ଅକ୍ଟୋବର ୧ରୁ ୩ ଯାଏ କାଁ ଭାଁ ବର୍ଷା ହେବ। ତେବେ ୨୯ ତାରିଖରେ ଉପକୂଳ ସମେତ ରାଜ୍ୟର ବାକି ଅଞ୍ଚଳରେ ପାଗ ମେଘୁଆ ରହିବ। ଏବର୍ଷ ଉତ୍ତର ପଶ୍ଚିମ ଭାରତରୁ ମୌସୁମୀ ପ୍ରତ୍ୟାବର୍ତନରେ ବିଳମ୍ବ ହୋଇଛି।
ଅନ୍ୟପକ୍ଷରେ ସେପ୍ଟେମ୍ବର ମାସ ସରିବାକୁ ବସିଲାଣି ତଥାପି ଦେଶରୁ ମୌସୁମୀ ପ୍ରତ୍ୟାବର୍ତ୍ତନର ନାଁ ଧରୁନି। ସାଧାରଣତଃ ସେପ୍ଟେମ୍ବର ୨୪ରେ ଉତ୍ତର ପଶ୍ଚିମ ଭାରତରୁ ମୌସୁମୀ ଛାଡ଼ିବା ଆରମ୍ଭ କରିଥାଏ। ଏହାପରେ ଶୀତ ଆସେ। ଏଥର କିନ୍ତୁ ବର୍ତମାନ ପର୍ଯ୍ୟନ୍ତ ସେଭଳି ସଙ୍କେତ ଦେଖିବାକୁ ମିଳୁନି। ପାଣିପାଗ ବିଶେଷଜ୍ଞମାନଙ୍କ କହିବା କଥା ହେଉଛି ଯେ ବଙ୍ଗୋପସାଗର ଓ ଆରବସାଗର ଉପରେ ଘୂର୍ଣ୍ଣିବଳୟ ସୃଷ୍ଟି ହେଉଛି। ଯାହାକି ମୌସୁମୀକୁ ଅଧିକ ସକ୍ରିୟ କରୁଛି। ତେଣୁ ଫେରିବାରେ ବିଳମ୍ବ ହେଉଛି। ଏଥର ମଧ୍ୟ ସେହି ସମୟରେ ମୌସୁମୀ ଫେରିବାର ସମ୍ଭାବନା ରହିଛି।