ପୁରୀ: ପୁରୀ ଶ୍ରୀମନ୍ଦିର ବାହାର ରତ୍ନ ଭଣ୍ଡାରର ଉତ୍ତର ପାର୍ଶ୍ୱର ସ୍ଥିତି ବିଶେଷଜ୍ଞ ଟିମ୍ ଯାଞ୍ଚ କରୁଛି । ଶ୍ରୀମନ୍ଦିର କୋର କମିଟିର ସଦସ୍ୟଙ୍କ ସହ ପ୍ରତ୍ନତତ୍ୱ ବିଭାଗର ୨ ଜଣ ସଦସ୍ୟ ଏହି ଯାଞ୍ଚରେ ସାମିଲ ଅଛନ୍ତି।
Sambad is now on WhatsApp
Join and get latest news updates delivered to you via WhatsApp
ବିଶେଷଜ୍ଞଙ୍କ କହିବା କଥା, ଯଦି ବାହାର ରତ୍ନ ଭଣ୍ଡାରର ସ୍ଥିତି ଭଲ ଥିବ, ତାହେଲେ ଭିତର ଭଣ୍ଡାରର ଯାଞ୍ଚ କରିବାର ଆବଶ୍ୟକତା ନାହିଁ । ସୋମବାର ସଂଧ୍ୟାରେ ବସିବାକୁ ଥିବା ସବକମିଟି ବୈଠକରେ ଆଲୋଚନା ପରେ ପରବର୍ତ୍ତୀ ପଦକ୍ଷେପ ସ୍ଥିର କରାଯିବ । ସେପଟେ ରତ୍ନଭଣ୍ଡାର ଖୋଲିବା ପାଇଁ ଓଡିଶା ସରକାରଙ୍କ ଠାରୁ ମଗାଯାଇଥିବା ଅନୁମତି ସଂପର୍କରେ କୌଣସି ଉତ୍ତର ଏଯାବତ୍ ଆସିନାହିଁ ।
ଅନ୍ୟପଟେ, ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ନା ନାହିଁ ସେ ନେଇ ସୋମବାର ବସିବ ରତ୍ନଭଣ୍ଡାର ସବ କମିଟିର ଜରୁରୀ ବୈଠକ । ଯେଉଁଥିରେ ଭଣ୍ଡାର ଘର ଖୋଲିବା ନେଇ ନିଷ୍ପତି ନିଆଯିବ। ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ରତ୍ନଭଣ୍ଡାର ସବ୍ କମିଟି ସଦସ୍ୟ ଉପସ୍ଥିତ ରହିବେ । ସନ୍ଧ୍ୟାରେ ବୈଠକ ପରେ ରତ୍ନଭଣ୍ଡାର ଖୋଲିବା ନେଇ ସ୍ପଷ୍ଟ କରିବେ ମୁଖ୍ୟ ପ୍ରଶାସକ । ତେବେ ଶ୍ରୀମନ୍ଦିର ପ୍ରଶାସନ, ରତ୍ନଭଣ୍ଡାର ନଖୋଲି ବିକଳ୍ପ ଉପାୟରେ ସ୍ଥିତି ଯାଞ୍ଚ କରିବାକୁ ବିଚାର କରୁଥିବା ଚର୍ଚ୍ଚା ହେଉଛି । କୁହାଯାଉଛି, ନାଭିକଟା ମଣ୍ଡପରୁ ଏଏସଆଇ ବିଶେଷଜ୍ଞ ଦଳ ରତ୍ନଭଣ୍ଡାର ଛାତ ଯାଞ୍ଚ କରିବାକୁ ଯୋଜନା କରୁଛନ୍ତି। ବୈଠକ ପରେ ପ୍ରଶାସନ ଆସନ୍ତା ୨୯ତାରିଖ ଦିନ ତାର ନିଷ୍ପତି ହାଇକୋର୍ଟଙ୍କୁ ଜଣାଇବା ସମ୍ଭାବନା ରହିଛି ।