କଟକ: ଏସସିବିରୁ ବିଚାରାଧୀନ କଏଦୀ ଚମ୍ପଟ ମାରିବା ଘଟଣାରେ ପ୍ରତିକ୍ରି୍ୟା ରଖିଛନ୍ତି କଟକ ଡିସିପି ପିନାକ ମିଶ୍ର। ସେ କହିଛନ୍ତି, ପୁଲିସ ଖୋଜାଖୋଜି ଆରମ୍ଭ କରିଛି। କଟକ ମଙ୍ଗଳାବାଗ ଥାନାରେ ଏନେଇ ହୋଇଥିବା ମାମଲାର ତଦନ୍ତ ଜାରି ରଖିଛି ପୁଲିସ। ଖୁବ ଶୀଘ୍ର ତାକୁ ଗିରଫ କରିବୁ। ଆମେ ଜେଲ୍ କର୍ତ୍ତୃପକ୍ଷଙ୍କୁ ଆଗକୁ ଚିଠି ଲେଖିବୁ ଯଦି କଏଦୀ ଏସସିବିରେ ଥିଲା ବେଳେ ସୁରକ୍ଷା ଅଧିକ ଆବଶ୍ୟକ ପଡ଼େ, ତେବେ ଜେଲ କର୍ତ୍ତୃପକ୍ଷ କମିସନରେଟ ପୁଲିସକୁ ଜଣାଇପାରିବେ। ଆବଶ୍ୟକ ଡ଼ିଲେ ଆମେ ଅଧିକ ସୁରକ୍ଷା ଯୋଗାଇ ଦେଇପାରିବୁ। ସିସିଟିଭି ଉପରେ ନଜର ଅଛି ତଥାପି ଏସସିବିରେ ପ୍ରବଳ ଗହଳି ରହୁଥିବା ହେତୁ ଫୁଟେଜରୁ ନିର୍ଦ୍ଧିଷ୍ଟ ଜଣାପଡ଼ିବା ସେତେ ସହଜ ନୁହେଁ। ବେଶ ବଦଳେଇ କଏଦୀ ଫେରାର ହୋଇଯାଇଥିବା କଥା ଏବେ ଯାଏଁ ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଜଗତସିଂହପୁର ଜିଲ୍ଲା ନାଉଗାଁ ବ୍ଲକ ନହଡ଼ିପଡ଼ାର ସାଜନ ଦାସ(୨୮) ନିଆଳି ଅଞ୍ଚଳରେ ଚୋରି କରିବା ଅଭିଯୋଗରେ ଗିରଫ ହୋଇଥିଲା। କୋର୍ଟ ଚାଲାଣ ପରେ ତାକୁ ଚୌଦ୍ବାର ଜେଲକୁ ଅଣା ଯାଇଥିଲା। ସେଠାରେ ସେ ପେଟ ଜନିତ ସମସ୍ୟା ଓ ବାତ ରୋଗରେ ଆକ୍ରାନ୍ତ ଥିବାରୁ ଯନ୍ତ୍ରଣା ଅନୁଭବ କରିଥିଲା। ଅନେକ ସମୟରେ ସାଜନ ଜେଲ ୱାର୍ଡ ଭିତରେ ପଡ଼ିଯାଉଥିଲା। ଏଭଳି ସମସ୍ୟା ବାରମ୍ବାର ଦେଖାଯିବାରୁ ଗଲା ମେ ୨୯ ତାରିଖରେ ଚୌଦ୍ବାର ଜେଲ୍ କର୍ତ୍ତୃପକ୍ଷ ସାଜନକୁ କଟକ ବଡ଼ ଡାକ୍ତରଖାନାକୁ ଦିନ ପ୍ରାୟ ୧୧ଟା ବେଳେ ଆଣିଥିଲେ। ଡାକ୍ତରଙ୍କ ପରାମର୍ଶ ଅନୁଯାୟୀ ତାକୁ ନ୍ୟୁ ମେଡିସିନ୍ ୱାର୍ଡର ଦ୍ବିତୀୟ ମହଲାରେ ଥିବା ବେଡ ନଂ ୧୭୨ରେ ଭର୍ତ୍ତି କରାଯାଇଥିଲା।
ଗତକାଲି ସକାଳ ପ୍ରାୟ ୧୦ଟା ବେଳେ ସାଜନ ୱାର୍ଡରେ ଶୌଚ ଯିବାକୁ କହିଥିଲା। ତା ସହିତ ସୁରକ୍ଷା ଦାୟିତ୍ବରେ ଥିବା ଚୌଦ୍ବାର ଜେଲର ତିନି ଜଣ ୱାର୍ଡର ବି ଥିଲେ। ୱାର୍ଡରଙ୍କ ଉପସ୍ଥିତି ସତ୍ତ୍ବେ ସାଜନ ସେଠାରୁ ଖସିଯାଇଥିଲା। ସାଜନ ସହ ଥିବା ଚୌଦ୍ବାର ଜେଲ୍ ୱାର୍ଡର ପ୍ରଭାତ କୁମାର ନାୟକ ମଙ୍ଗଳାବାଗ ଥାନାରେ ଦେଇଥିବା ବୟାନ ଅନୁଯାୟୀ ସାଜନ ଓଲଡ ମେଡିସିନ୍ ୱାର୍ଡରେ ଗାଧୋଉଥିବା ସମୟରେ ସେଠାରେ କିଛି ମହିଳା ବି ଗାଧୋଉଥିଲେ। ତେଣୁ ପ୍ରଭାତ ସେଠାରୁ ଦୂରକୁ ପଳାଇ ଆସିଥିଲେ। ଏହାର ସୁଯୋଗ ନେଇ ସାଜନ ଖସିଯାଇଛି ବୋଲି ୱାର୍ଡର ପ୍ରଭାତ ପୁଲିସ ନିକଟରେ ବୟାନ ରଖିଛନ୍ତି।
ୱାର୍ଡର ପ୍ରଭାତ କୁମାର ନାୟକଙ୍କ ଅଭିଯୋଗ ଆଧାରରେ ପୁଲିସ ଦଫା ୨୨୪ରେ ଏକ ମାମଲା ରୁଜୁ କରିଥିବା ବେଳେ ଜଗତସିଂହପୁର ଓ ନିଆଳି ଅଞ୍ଚଳରେ ଚଢଉ ଜାରି ରଖିଛି। ବଡ଼ ଡାକ୍ତରଖାନା ଓଲଡ ମେଡିସିନ ୱାର୍ଡରେ ଥିବା ଶୌଚାଳୟରୁ ସାଜନର ସାର୍ଟ, ପ୍ୟାଣ୍ଟ, ଗାମୁଛା ପୁଲିସ ଜବତ କରିଛି।