ନିର୍ବାଚନ ପ୍ରଶିକ୍ଷଣରେ ଅନୁପସ୍ଥିତ ଥିବା ୧୨ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ସୁପାରିସ

ବିଂଝାରପୁର : ଆଜି ବିଂଝାରପୁର ବ୍ଲକ୍‌ ବରୁଣେଶ୍ଵର ମହାବିଦ୍ୟାଳୟରେ ପଞ୍ଚାୟତ ନିର୍ବାଚନ ପାଇଁ ପ୍ରଶିକ୍ଷଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଶିବିରରେ ୧୨ ଜଣ ପ୍ରଶିକ୍ଷାର୍ଥୀ ଅନୁପସ୍ଥିତ ଥିଲେ। ଏଥିପାଇଁ ୧୧୯ ପ୍ରଶିକ୍ଷାର୍ଥୀଙ୍କୁ ଚିଠି କରାଯାଇଥିବା ବେଳେ ୧୦୭ ଜଣ ଯୋଗ ଦେଇଥିଲେ।

ଶିବିରକୁ ଉପଜିଲ୍ଲାପାଳ ଶରତ ଚନ୍ଦ୍ର ମହାପାତ୍ର ତଦାରଖ କରିଥିଲେ। ବିଡିଓ ମିନତି ଜଗଦେବ ଓ ତହସିଲଦାର ଦୀପକ କୁମାର ରାଉତ ଯୋଗଦେଇଥିବା ବେଳେ ଅତିରିକ୍ତ ତହସିଲଦାର ଆର୍ଯ୍ୟଦୀପ୍ତ ଆରଣ୍ୟକ ସାମନ୍ତରାୟ, ସହକାରୀ ଯନ୍ତ୍ରୀ ରଂଜନ କୁମାର ସାମଲ, ବିଏସଏସଓ ଧର୍ମେନ୍ଦ୍ର କୁମାର ସାହୁ, କନିଷ୍ଠ ଯନ୍ତ୍ରୀ ଅମୂଲ୍ୟ ତ୍ରିପାଠୀ, ପ୍ରଶାନ୍ତ କୁମାର ଦାସ, ରାହାସ ବିହାରୀ ଜେନା ପ୍ରମୁଖ ପ୍ରଶିକ୍ଷଣ ଦେଇଥିଲେ। ଅନୁପସ୍ଥିତ ଥିବା ୧୨ ଜଣ ପ୍ରଶିକ୍ଷାର୍ଥୀଙ୍କ ସଂପର୍କରେ ଜିଲ୍ଲାପାଳଙ୍କୁ ଦର୍ଶାଯାଇଛି। ସେ ଯାହା କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ବିଡିଓ ଶ୍ରୀମତୀ ଜଗଦେବ କହିଛନ୍ତି।