ଯୁବକଙ୍କ ଝୁଲନ୍ତା ଶବ ଉଦ୍ଧାର

ଯୁଯୁମୁରା : ଯୁଯୁମୁରା ଥାନା ଅନ୍ତର୍ଗତ ଡଙ୍ଗାପାଳ ହରିଜନପଡ଼ାର ନିଜ ଘର ସମ୍ମୁଖରେ ଥିବା ଏକ ସଜନା ଗଛରୁ ଗୁରୁବାର ସକାଳେ ଜଣେ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି। ମୃତକ ହେଲେ ସେହି ପଡ଼ାର ମୋତିଲାଲ ମାଝୀ(୩୮)। ଖବରପାଇ ଯୁଯୁମୁରା ପୁଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ନିମନ୍ତେ ବୁର୍ଲା ପଠାଇଛି। ସଜନା ଗଛରେ ଚଢ଼ି ଆତ୍ମହତ୍ୟା କରିବା ଏବଂ ତାଙ୍କ ପାଦ ତଳେ ଲାଗିଥିବାରୁ ମୃତ୍ୟୁକୁ ନେଇ ସନ୍ଦେହ ପ୍ରକାଶ ପାଇଛି। ସେ ଆତ୍ମହତ୍ୟା କରିଛନ୍ତି କି ଅନ୍ୟ କିଛି କାରଣ ଘଟିଛି ତାହାକୁ ନେଇ ଭିନ୍ନ ଆଲୋଚନା ହୋଇଛି।

ପ୍ରାପ୍ତ ସୂଚନା ଅନୁଯାୟୀ, ମୋତିଲାଲ ସଦର ଥାନା ଅନ୍ତର୍ଗତ ସିନ୍ଦୁରପଙ୍କ ଶାଶୂ ଘରେ ରହୁଥିଲେ। କିଛି ଦିନ ତଳେ କୌଣସି କାମରେ ଗାଁକୁ ଆସିଥିଲେ। ବୁଧବାର ସକାଳେ ସ୍ଥାନୀୟ ଲୋକେ ଉଠିବା ପରେ ତାଙ୍କୁ ସଜନା ଗଛରେ ଲୁଙ୍ଗି ସହ ପ୍ଲାଷ୍ଟିକ୍‌ ଦଉଡ଼ିରେ ଝୁଲୁଥିବାର ଦେଖି ପୁଲିସକୁ ଖବର ଦେଇଥିଲେ। ଖବରପାଇ ମୋତିଲାଲଙ୍କ ସ୍ତ୍ରୀ ଓ ଭଉଣୀ ଘଟଣାସ୍ଥଳରେ ପହଞ୍ଚିବା ପରେ ପୁଲିସ ଗଛରୁ ଶବ ଓହ୍ଲାଇ ବ୍ୟବଚ୍ଛେଦ ପାଇଁ ପଠାଇଛି। ଏ ସଂପର୍କରେ ଯୁଯୁମୁରା ଥାନା ଅଧିକାରୀ ରାଜକୁମାର ବିଶ୍ବାଳଙ୍କୁ ପଚାରିବାରେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଘଟଣାର ସତ୍ୟତା ଉନ୍ମୋଚନ ହେବ ବୋଲି କହିଥିଲେ।