ଚାଉଳ ସବ୍ସିଡି କେନ୍ଦ୍ର ଠିକ୍ ସମୟରେ ଦେଉନି
ଭୁବନେଶ୍ବର : ଜାତୀୟ ଖାଦ୍ୟ ସୁରକ୍ଷା ଯୋଜନା ଓ ଅନ୍ୟାନ୍ୟ କେନ୍ଦ୍ରୀୟ ଯୋଜନାରେ ରାଜ୍ୟରେ ବିନିଯୋଗ ହୋଇଥିବା ଚାଉଳ ବାବଦରେ କେନ୍ଦ୍ର ସରକାର ସବ୍ସିଡି ଆକାରରେ ଆର୍ଥିକ ସହାୟତା ପ୍ରଦାନ କରିଥାନ୍ତି। କେନ୍ଦ୍ର ସରକାରଙ୍କ ସହ ହୋଇଥିବା ବୁଝାମଣା ଅନୁସାରେ ଅଗ୍ରିମ ରିହାତି ରାଶି ତ୍ରୈମାସିକ ଭିତ୍ତିରେ ରାଜ୍ୟ ପାଇବା କଥା। ହେଲେ ଏହା ବାସ୍ତବରେ କାର୍ଯ୍ୟକାରୀ ହେଉନି ବୋଲି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ବିଧାୟକ ଭୂପିନ୍ଦର ସିଂହଙ୍କ ଏକ ଲିଖିତ ପ୍ରଶ୍ନର ଉତ୍ତର ଦେଇ ମନ୍ତ୍ରୀ ଶ୍ରୀ ସ୍ବାଇଁ କହିଛନ୍ତି ଯେ, ଚଳିତବର୍ଷ (କେଏମ୍ଏସ୍)ସବ୍ସିଡି ବାବଦକୁ କେନ୍ଦ୍ର ସରକାରଙ୍କ ଠାରୁ ୧୭୮୫.୦୫କୋଟି ଟଙ୍କା ମିଳିଛି। ଜୁନ୍ ୨୦୨୧ ପର୍ଯ୍ୟନ୍ତ ଆବଣ୍ଟିତ କେଏମ୍ଏସ୍ ୨୦୨୦-୨୧ ଚାଉଳ ବାବଦରେ ୧୮୭୫.୪୨କୋଟି ଟଙ୍କା କେନ୍ଦ୍ର ସରକାରଙ୍କ ଠାରୁ ପାଇବାର ଅଛି। ଏହାବ୍ୟତୀତ ଜୁଲାଇ-ସେପ୍ଟେମ୍ବର ତ୍ରୈମାସିକ ପାଇଁ ଅଗ୍ରିମ ସବ୍ସିଡି ବାବଦରେ ୨୬୪୪.୪୯କୋଟି ଟଙ୍କା କେନ୍ଦ୍ର ସରକାରଙ୍କ ଠାରୁ ପାଇବାର ଅଛି।
ସେହିପରି ଅଗଷ୍ଟ ୩୧ ସୁଦ୍ଧା ଯୋଗାଣ ନିଗମ ୧୫.୧୬ ଲକ୍ଷ ମେଟ୍ରିକ ଟନ୍ ବଳକା ଚାଉଳ ଏଫ୍ସିଆଇକୁ ପ୍ରଦାନ କରିଛି। ଏଫ୍ସିଆଇକୁ ହସ୍ତାନ୍ତରିତ ଚାଉଳ ମୂଲ୍ୟ ବାବଦକୁ ୩୫୦୫.୫୨କୋଟି ମିଳିଥିବାବେଳେ ୧୨୪୫.୫୧କୋଟି ପାଇବାକୁ ବାକି ଅଛି।
ଅପରପକ୍ଷେ ୨୦୨୦-୨୧ରେ ରାଜ୍ୟରେ ମୋଟ୍ ୭୭ଲକ୍ଷ ୩୨ହଜାର ୭୧୫ମେଟ୍ରିକ ଟନ୍ ଧାନ କିଣାଯାଇଛି। ଏଥିରୁ ଖରିଫ ଋତୁରେ ୧୧,୯୧,୧୨୦ ଜଣ ଚାଷୀଙ୍କ ଠାରୁ ମୋଟ୍ ୬୨,୮୯,୫୫୫ ମେଟ୍ରିକ ଟନ୍ ଧାନ ସଂଗ୍ରହ କରାଯାଇଥିଲା। ରବି ଋତୁରେ ୨,୦୩,୫୨୭ ଜଣ ଚାଷୀଙ୍କ ଠାରୁ ୧୪,୪୩,୧୬୦ ମେଟ୍ରିକ ଟନ୍ ଧାନ ସଂଗ୍ରହ କରାଯାଇଛି। ଧାନର ସହାୟକ ମୂଲ୍ୟ ବାବଦ କ୍ବିଣ୍ଟାଲ ପିଛା ୧୮୬୮ଟଙ୍କା ହିସାବରେ ମୋଟ୍ ୧୪ହଜାର ୪୪୪କୋଟି ୭୧ଲକ୍ଷ ଟଙ୍କା ପ୍ରଦାନ କରାଯାଇଛି। ଏହି ଅର୍ଥ ପାଇଁ ଏଫ୍ସିଆଇରୁ ମିଳିଥିବା ୩୫୦୫.୫୨େକାଟି, କେନ୍ଦ୍ର ସରକାରଙ୍କ ସବ୍ସିଡି ବାବଦକୁ ମିଳିଥିବା ୧୭୮୫.୦୫କୋଟି, ରାଜ୍ୟ ସରକାରଙ୍କ ସବ୍ସିଡି ୪୩୯.୧୨କୋଟି ଏବଂ ବ୍ୟାଙ୍କରୁ ଋଣ ଆସିଥିବା ୮୭୧୫.୦୨କୋଟି ଟଙ୍କା ପ୍ରଦାନ କରାଯାଇଛି।