ବୁଲେଟ ଚକରେ ହାତ ଫସିଯାଇ ଛିଣ୍ଡିଗଲା କୁନି ଝିଅର ଡାହାଣ ହାତ

ଉତ୍କେଲା: କଳାହାଣ୍ଡି ଜିଲ୍ଲା କେସିଙ୍ଗା ଥାନା ଉତ୍କେଲା ଫାଣ୍ଡି ଅନ୍ତର୍ଗତ ଜାତୀୟ ରାଜପଥ ୨୬ ଉପରେ ଥିବା ଉତ୍କେଲା ଗ୍ରାମର ଇଣ୍ଡିଆନ ଅଏଲ ପେଟ୍ରୋଲ ପମ୍ପ ସାମ୍ନାରେ ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି | ଏକ ବୁଲେଟ ଗାଡି ଯୋଗେ ବାପାଙ୍କ ସହିତ ଯାଉଥିବା ସମୟରେ ବୁଲେଟ ଗାଡି ଚକରେ ହାତ ଫସିଯାଇ ଜଣେ କୁନି ଝିଅଙ୍କ ଡାହାଣ ହାତ ସମ୍ପୂର୍ଣ୍ଣ ଛିଣ୍ଡି ଯାଇଥିବା ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି | ଛିଣ୍ଡି ଯାଇଥିବା କୁନି ଝିଅ ଜୟପାଟଣା ଥାନା ଅନ୍ତର୍ଗତ ମଙ୍ଗଳପୁର ଗ୍ରାମର କୁନା ସାହୁଙ୍କ ଝିଅ ଅଞ୍ଜଳି ସାହୁ (୧୨) ବୋଲି ଜଣାପଡିଛି |

ପ୍ରାପ୍ତ ସୂଚନାରୁ ପ୍ରକାଶ ଯେ,ଏକ ପରିବାର ବୁଲେଟ ଗାଡି ଯୋଗେ ଭବାନୀପାଟଣା ଅଭିମୁଖେ ଯାଉଥିଲେ | ସକାଳ ୭ଟା ସମୟରେ ଉତ୍କେଲା ଗ୍ରାମରେ ଥିବା ଇଣ୍ଡିଆନ ଓଏଲ ପେଟ୍ରୋଲ ପମ୍ପ ସାମ୍ନାରେ କୁନି ଝିଅଙ୍କ ହାତ ଗାଡି ଚକରେ ଫସି ଯାଇଥିଲା | ଫଳରେ ତାଙ୍କ ଡାହାଣ ହାତ ସମ୍ପୂର୍ଣ୍ଣ ଭାବେ ଛିଣ୍ଡି ଯାଇଥିଲା | ଛିଣ୍ଡି ଯାଇଥିବା ଡାହାଣ ହାତକୁ ବୁଲା କୁକୁର ନେଇ ପଳେଇ ଯାଇଛି | ସଙ୍ଗେ ସଙ୍ଗେ ତାଙ୍କୁ ପରିବାର ଲୋକେ ଭବାନୀପାଟଣା ମୁଖ୍ୟ ଚିକିତ୍ସାଳୟକୁ ନେଇଛନ୍ତି | ସେଠାରେ ତାଙ୍କର ଚିକିତ୍ସା ହେଉଥିବା ଜଣାପଡିଛି |