ଖୋର୍ଦ୍ଧା ସହର ରାସ୍ତାକଡ଼; ଜୀବଜନ୍ତୁଙ୍କ ପାଇଁ ପାଳଟିଛି କାଳ
ଖୋର୍ଦ୍ଧା: ଖୋର୍ଦ୍ଧା ଏସ୍ଡିପିଓଙ୍କ କାର୍ଯ୍ୟାଳୟ ନିକଟ ଶ୍ରୀରାମ ନଗର ରାସ୍ତାର ସନ୍ତୋଷୀ ଲେନ୍- ଚକ୍ଷୁ ଚିକିତ୍ସାଳୟ ଛକ ୫-୬ଟି ଗାଈ, ଷଣ୍ଢ ରାସ୍ତାକଡ଼ରେ ପଡ଼ିଥିବା ଆବର୍ଜନାରେ ଚରୁଥିଲେ। ଏହି ସମୟରେ ହଠାତ୍ ଏକ ୫-୬ଫୁଟ ଉଚ୍ଚର ଷଣ୍ଢଟି ସେହି ଆବର୍ଜନା ମଧ୍ୟରେ ଗଳିପଡ଼ିଲା। ଏହା ଦେଖି ଆଖପାଖର କେତେକ ଯୁବକ ଦମକଳ ବାହିନୀକୁ ଖବର ଦେଇଥିଲେ। ଦମକଳ ବାହିନୀ ଆସି ଷଣ୍ଢଟିକୁ ଉଦ୍ଧାର କରିଥିଲା। ଗତକାଲିର ଏହି ଘଟଣାରେ ପରେ ଆଜି ପୁଣି ଅପରାହ୍ଣରେ ଅନୁରୂପ ଘଟଣାରେ ସେହି ଖାତରେ ଗଳି ପଡ଼ିଥିବା ଆଉ ଏକ ଷଣ୍ଢକୁ ଲୋକମାନେ ଉଦ୍ଧାର କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଗତକାଲି ସକାଳ ପ୍ରାୟ ସାଢ଼େ ୧୦ଟା ବେଳେ ୫-୬ଟି ଗାଈ ଓ ଷଣ୍ଢ ଚରୁଥିଲେ । ହଠାତ୍ ଏକ ଷଣ୍ଢଟି ସନ୍ତୋଷୀ ଲେନ୍ ରାସ୍ତା କଡ଼ରେ ଥିବା ଆବର୍ଜନା ଖାତରେ ଗଳି ପଡ଼ିଥିଲା। ସେଠାରେ ଥିବା କେତେକ ଯୁବକ ଷଣ୍ଢଟିକୁ ଉପରକୁ ଉଠାଇବାକୁ ଚେଷ୍ଟା କରିଥିଲେ, କିନ୍ତୁ ଉଠାଇନପାରି ଦମକଳ ବାହିନୀକୁ ଖବର ଦେଇଥିଲେ । ଖୋର୍ଦ୍ଧା ଦମକଳ ବାହିନୀ ୧୧ଟାରେ ଆସି ପହଂଚିଲା ଓ ଦୀର୍ଘ ୪୫ ମିନିଟ୍ ପରିଶ୍ରମ ପରେ ଷଣ୍ଢଟିକୁ ଉଦ୍ଧାର କରାଯାଇଥିଲା। ଆଜି ମଧ୍ୟ ସେହି ଘଟଣାର ପୁନରାବୃତ୍ତି ଘଟିଛି। ଅପରାହ୍ଣ ପ୍ରାୟ ସାଢ଼େ ୨ଟା ବେଳେ ଆଉ ଏକ ଷଣ୍ଢ ସେହି ଖାତରେ ପଡ଼ିରହିଥିବା ଦେଖି ସ୍ଥାନୀୟ ଲୋକ ଉଦ୍ଧାର କରିଛନ୍ତି।
ଏନେଇ ସ୍ଥାନୀୟ ବାସିନ୍ଦା ସ୍ୱରାଜ ମିଶ୍ର କହିଛନ୍ତିି ଯେ ଏଠାରେ ପୂର୍ବେ ବେଆଇନ ମାଙ୍କଡ଼ାପଥର ଖଣିଟିଏ ଥିଲା। ବନ୍ଦ ହୋଇଯିବା ପରେ ପୌର ପରିଷଦ ନିଜର ଆବର୍ଜନା ଆଣି ଜମା କରୁଥିଲା। ବର୍ଷା ହେବା ଫଳରେ ଆବର୍ଜନା ଗୁଡ଼ିକ ଉପରକୁ ଉଠିଆସିଲା। ଏଠାରେ ଆବର୍ଜନା ନପକାଇବାକୁ ଓ ଆବଶ୍ୟକ ସୁରକ୍ଷା ବ୍ୟବସ୍ଥା କରିବାକୁ ଶ୍ରୀରାମ ନଗର ବାସିନ୍ଦାଙ୍କ ପକ୍ଷରୁ ଅନେକ ଥର ଲିଖିତ ଅନୁରୋଧ କରାଯାଇଥିଲେ ମଧ୍ୟ ପୌର ପରିଷଦ ପକ୍ଷରୁ କୌଣସି ପଦକ୍ଷେପ ନିଆଯାଇନାହିଁ ।
ସେହିଭଳି ଅଂଚଳର କୃପାସିନ୍ଧୁ ସାହୁ, ମଧୁସୂଦନ କର, ଶକ୍ତି, ଅମୀୟ ରଘୁ ଓ ଭାଟି ସାହୁ କହିଛନ୍ତିି ଯେ ରାସ୍ତାର ଠିକ୍ କଡ଼ରେ ଗୋଟିଏ ପଟ ୧୨-୧୫ ଫୁଟ ଗଭୀର ଖାତ ଏହି ଖାତରେ ପୌର ପରିଷଦର ଆବର୍ଜନା ପକାଯାଉଛି। ଏନେଇ ସେମାନେ ବିରୋଧ କରିଛନ୍ତି, କିନ୍ତୁ ପୌର ପ୍ରଶାସନ ଶୁଣୁନାହିଁ ବର୍ଷା ହେଲେ ରାସ୍ତାରେ ୨-୩ଫୁଟ ପାଣି ଜମୁଛିି ଦୁଇ ଦିନ ପୂର୍ବେ ଭୁବନେଶ୍ୱରରେ ଜଣେ ସ୍କୁଲ ଛାତ୍ର ଖୋଲା ନାଳରେ ଭାସିଗଲା। ଏଠାରେ ତ ଟିକିଏ ଅସାବଧାନ ହେଲେ ସଂପୂର୍ଣ୍ଣ ଭାବେ ଆବର୍ଜନା ଖାତରେ ଡୁବିଯିବେ ଏଣୁ ପୌର ପ୍ରଶାସନ ତୁରନ୍ତ ଦୃଷ୍ଟି ଦେଇ ପଦକ୍ଷେପ ଗ୍ରହଣ ନକଲେ ସ୍ଥାନୀୟ ବାସିନ୍ଦା ପୌର କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି ସେମାନେ କହିଛନ୍ତି।