ବଢ଼ୁଛି ଆର୍ଟି-ପିସିଆର ପରୀକ୍ଷା
ଭୁବନେଶ୍ବର : ରାଜ୍ୟରେ ଏବେ ଦିନକୁ ଦିନ ଆର୍ଟି-ପିସିଆର ପରୀକ୍ଷା ସଂଖ୍ୟା ବୃଦ୍ଧି ପାଇବାରେ ଲାଗିଛି। ଗତ ୨୪ଘଣ୍ଟାରେ ରାଜ୍ୟରେ ୪୨,୯୮୩ କୋଭିଡ୍ ନମୁନା ପରୀକ୍ଷା ହୋଇଥିବା ବେଳେ ତହିଁରେ ୧୮,୦୧୩ ଆର୍ଟି-ପିସିଆର ନମୁନା ରହିଛି। ଯାହାକି ସମୁଦାୟ ପରୀକ୍ଷଣର ୪୧ ପ୍ରତିଶତରୁ ଅଧିକ। ଆଗାମୀ ଦିନରେ ରାଜ୍ୟରେ ଦୈନିକ ୨୫ହଜାର ଆର୍ଟି-ପିସିଆର ନମୁନା ପରୀକ୍ଷା କରାଯିବ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି। ଭୁବନେଶ୍ବରରେ ସର୍ବାଧିକ ୨୮ଶହ ଆର୍ଟି-ପିସିଆର ନମୁନା ପରୀକ୍ଷା ହୋଇଥିବା ବେଳେ କଟକରେ ୧୮୯୧, ସୁନ୍ଦରଗଡ଼ ୧୨୨୨, ମୟୂରଭଞ୍ଜ ୬୯୩, ମାଲକାନଗିରି ୬୮୭, ଅନୁଗୁଳ ୬୭୨ ଓ ନବରଙ୍ଗପୁରରେ ସର୍ବନିମ୍ନ ଗୋଟିଏ ଆର୍ଟି-ପିସିଆର ନମୁନା ପରୀକ୍ଷା କରାଯାଇଛି। ରାଜ୍ୟରେ ଏବେ ୭ଟି ମେଡିକାଲ କଲେଜ ଓ ୬ଟି ଜିଲ୍ଲା ଚିକିତ୍ସାଳୟରେ ଆର୍ଟି-ପିସିଆର ନମୁନା ପରୀକ୍ଷା କରାଯାଉଛି। ଆଗକୁ ଆହୁରି ୨ଟି ଜିଲ୍ଲାରେ ଏହି ନମୁନା ପରୀକ୍ଷା ହେବ ବୋଲି ସ୍ବାସ୍ଥ୍ୟ ବିଭାଗ ସୂତ୍ରରୁ ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
କିଛିଦିନ ପୂର୍ବରୁ ରାଜ୍ୟ ସରକାର ଦୈନିକ ୧୦ହଜାର ୧୫୦ ଆର୍ଟି-ପିସିଆର ନମୁନା ପରୀକ୍ଷା କରିବା ଲାଗି ଜିଲ୍ଲାମାନଙ୍କୁ ନିର୍ଦେଶ ଦେଇଥିଲେ। ମାତ୍ର ଦ୍ବିତୀୟ ଲହରରେ ଦ୍ରୁତ ସଂକ୍ରମଣକୁ ନଜରରେ ରଖି ରାଜ୍ୟ ସରକାର ଅଧିକ ସଂଖ୍ୟାରେ ଆର୍ଟି-ପିସିଆର ନମୁନା ପରୀକ୍ଷା ଆରମ୍ଭ କରିଛନ୍ତି। ଯେଉଁ ସବୁ କେନ୍ଦ୍ରରେ ଆର୍ଟି-ପିସିଆର ମେସିନ୍ ରହିଛି ସେସବୁର କ୍ଷମତା ବୃଦ୍ଧି କରିବା ଲାଗି ନିଷ୍ପତ୍ତି ନିଆଯାଇଛି।
କୋଭିଡ ପାଇଁ ପିସିସି ପକ୍ଷରୁ କଣ୍ଟ୍ରୋଲ ରୁମ୍
ଭୂୁବନେଶ୍ବର : ରାଜ୍ୟରେ ଭୟଙ୍କର ସ୍ଥିତି ସୃଷ୍ଟି କଲାଣି କୋଭିଡ ମହାମାରୀ। ଏଥିରେ ସାଧାରଣ ଲୋକଙ୍କୁ ସାହାଯ୍ୟ କରିବା ପାଇଁ ଏଆଇସିସି ନିର୍ଦ୍ଦେଶରେ ପ୍ରଦେଶ କଂଗ୍ରେସ କମିଟି ପକ୍ଷରୁ କୋଭିଡ କଣ୍ଟ୍ରୋଲ ରୁମ୍ ଖୋଲାଯାଇଛି। ଏହି ଅବସରରେ ପିସିସି ସଭାପତି ନିରଞ୍ଜନ ପଟ୍ଟନାୟକ ୫ ଜଣିଆ କମିଟି ଗଠନ କରିଛନ୍ତି। ଏହି କଣ୍ଟ୍ରୋଲ ରୁମ୍ର ସୁପରିଚାଳନା ପାଇଁ ଶ୍ରୀ ପଟ୍ଟନାୟକ ମଧ୍ୟ ନିର୍ଦ୍ଦେଶ ଦେଇଛନ୍ତି। ଏହି କଣ୍ଟ୍ରୋଲ ରୁମ୍ ସକାଳ ୯ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ କାର୍ଯ୍ୟ କରିବ। କମିଟିରେ ପଦ୍ମାକର ଗୁରୁ (ମୋବାଇଲ ନମ୍ବର-୬୩୭୦୯୬୫୯୭୮) ସଂଯୋଜକ ଥିବାବେଳେ ସୁବ୍ରତ ମହାପାତ୍ର (ମୋବାଇଲ-୯୧୩୨୭୮୫୬୨୪), ଲିଙ୍ଗରାଜ ସାହୁ ( ମୋବାଇଲ-୯୨୩୭୦୧୦୯୩୯), ପ୍ରମୋଦ କୁମାର ସାହୁ ( ମୋବାଇଲ- ୭୦୦୮୭୮୮୬୭୭) ଓ ତରୁଣକାନ୍ତ ମିଶ୍ର ( ମୋବାଇଲ-୯୪୩୭୧୯୨୧୬୧) ପ୍ରମୁଖ ସଦସ୍ୟ ରହିଛନ୍ତି।