ଭୁବନେଶ୍ବର : ସାହିତ୍ୟ ମୋ ପାଇଁ ମନୋରଞ୍ଜନର ମାଧ୍ୟମ କିମ୍ବା କଳ୍ପନା ବିଳାସ ନୁହେଁ। ଏହା ସାମାଜିକ ବ୍ୟବସ୍ଥା ଉପରେ ମୋର ହସ୍ତକ୍ଷେପ। ମୁଁ ଚିରଦିନ ମଣିଷ ସପକ୍ଷରେ, ଶ୍ରଦ୍ଧା, ସମାନୁଭୂତି ଓ କରୁଣାର ପକ୍ଷରେ। ଶତ ଅନ୍ଧାର, ଦୁର୍ବିପାକ, ବିପର୍ଯ୍ୟୟ ଓ ବିଭାଜନର ଷଡ଼ଯନ୍ତ୍ର ସତ୍ତ୍ବେ, ଧ୍ବସଂ ସ୍ତୂପ ଭିତରୁ ସବୁଜିମାର ଅଙ୍କୁରୋଦ୍ଗମ ହେବା ପରି ମଣିଷପଣିଆ ବଞ୍ଚି ରହିବ ଓ ତା’ର ଏହି ଯୁଯୁତ୍ସାରେ ସାହିତ୍ୟ ସୂର୍ଯ୍ୟାଲୋକ ପରି ସହାୟକ ହେବ। କେନ୍ଦ୍ର ସାହିତ୍ୟ ଅକାଦେମି ପକ୍ଷରୁ ଶନିବାର ଦିନ ଭାରତୀୟ ବିଦ୍ୟାଭବନଠାରେ ଆୟୋଜିତ ‘ଲେଖକଙ୍କ ସହିତ’ କାର୍ଯ୍ୟକ୍ରମରେ ଯୋଗଦେଇ ବିଶିଷ୍ଟ କଥାକାର ଗୌରହରି ଦାସ ନିଜ ଜୀବନ ଓ ସାହିତ୍ୟାନୁଭୂତି ସମ୍ପର୍କରେ ଏହା କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ ଶ୍ରୀ ଦାସ ତାଙ୍କର ପ୍ରଥମ ଗଳ୍ପ ‘କ୍ଷୀଣାଲୋକ’ରୁ ଆରମ୍ଭ କରି ପ୍ରଥମ ପୁସ୍ତକ ‘ଜୁଆର ଭଟ୍ଟା’ ପର୍ଯ୍ୟନ୍ତର କାହାଣୀ ଓ ଅନୁଭୂତି ବର୍ଣ୍ଣନା କରିଥିଲେ। ସେ କହିଥିଲେ ଯେ ବାପାଙ୍କ ଆଲମିରାର ବହି, ପ୍ରାଥମିକ ଶିକ୍ଷକ ଧନେଶ୍ବର ଓଝା, ମାଇନର୍ ସ୍କୁଲ ଶିକ୍ଷକ ପ୍ରଭାକର ସାହୁ ଓ ହାଇସ୍କୁଲ ଶିକ୍ଷକ ନିତ୍ୟାନନ୍ଦ ବଳ ତାଙ୍କ ସାହିତ୍ୟ ଯାତ୍ରାର ଆଦ୍ୟ ପ୍ରେରଣା ଥିଲେ। ଗାଁର ମନ୍ତେଇ ନଈ, ଅର୍ଜୁନ ବାଆଜୀ ମଧ୍ୟ ତାଙ୍କ ପ୍ରେରଣାର ଉତ୍ସ ବୋଲି ରୋଚକ ଢଙ୍ଗରେ ବର୍ଣ୍ଣନା କରିଥିଲେ।
ଗାଁର ସୁନ୍ଦରୀ ବୋହୂ ବନ୍ଧ୍ୟା ଅପବାଦ ସହି ନ ପାରି ଆତ୍ମହତ୍ୟା କରିବା, ଯୌଥ ପରିବାର ବିଭାଜନ ଓ ଭାଇ ଭାଗର ଛଳନା ଓ ପ୍ରତାରଣାପୂର୍ଣ୍ଣ ବ୍ୟବହାର, ଗାଁ ନାଟକରେ ଅଭିନୟ କରିଥିବା ଝିଅଟିକୁ କଳଙ୍କିନୀ ସଜାଇ ଦେବା ଓ ପରେ ତା’ର ଆତ୍ମହତ୍ୟା, ଅର୍ଜୁନ ବାଆଜୀର ଟଙ୍କା ଉଧାର ଦେବା ଓ ଫେରସ୍ତ ପାଇବାର ଅଦ୍ଭୁତ ଉପାୟ ଏବଂ ସମାଜରୁ ବିଭିନ୍ନ ସମୟରେ ମିଳିଥିବା ଉପେକ୍ଷା, ଅନାଦର, ଈର୍ଷା, ଅସୂୟା ଓ ସ୍ନେହ, ଶ୍ରଦ୍ଧା ଆଦି ଉପାଦାନ ତାଙ୍କ ମନକୁ ପ୍ରଭାବିତ କରିଥିଲା। ଏହି ଭାବନା ସବୁ ପରେ ଶବ୍ଦର ରୂପ ନେଇ କାଗଜକୁ ଉତ୍ତରିଥିଲେ ବୋଲି ସେ କହିଥିଲେ।
କବି ଗିରିଜା କୁମାର ବଳିୟାରସିଂହ, ବିଖ୍ୟାତ ଲେଖକ ସୁରେନ୍ଦ୍ର ମହାନ୍ତି, ମନୋଜ ଦାସ ଓ ‘ସମ୍ବାଦ’ର ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକଙ୍କ ସହ ତାଙ୍କ ପରିଚୟ, ତାଙ୍କୁ ଲେଖକ ଭାବେ ଗଢ଼ିବାରେ ଦାୟୀ ବୋଲି ସେ କହିଥିଲେ। ସେହିପରି ନାଟ୍ୟକାର ଅନନ୍ତ ମହାପାତ୍ର ଓ ଲଲାଟେନ୍ଦୁ ରଥଙ୍କ ପ୍ରୋତ୍ସାହନରେ ସେ ନାଟକ ଲେଖିବା ଆରମ୍ଭ କରିଥିଲେ ବୋଲି କହିଥିଲେ। ସେ କହିଥିଲେ, ଦୁଃଖ ଜୀବନ ଗଛର ଚେର, ସୁଖ ଯେ ଗଛର ଶାଖାପ୍ରଶାଖା। ବୃକ୍ଷର ପଲ୍ଲବନ ଓ ପ୍ରସାର ପାଇଁ ଚେର ଗଭୀରକୁ ଯିବା ପ୍ରୟୋଜନ। ଜୀବନରେ ବହୁ ଦୁଃଖ ଓ ଉପେକ୍ଷା ପାଇଥିବାରୁ ସେ ଜୀବନକୁ ଅଧିକ ହୃଦୟଙ୍ଗମ କରି ପାରିଛନ୍ତି ଓ ସାହିତ୍ୟରେ ଢାଳି ପାରିଛନ୍ତି ବୋଲି କହିଥିଲେ। ଏଣୁ ତାଙ୍କୁ ଜଣେ ଲେଖକ ହିସାବରେ ସମାଜ ହିଁ ଗଢ଼ି ତୋଳିଛି ବୋଲି ସେ କହିଥିଲେ। ଶେଷରେ ଶ୍ରୀ ଦାସ ସ୍ବରଚିତ ଏକ ଗଳ୍ପ ଓ କବିତା ପାଠ କରିଥିଲେ।
କାର୍ଯ୍ୟକ୍ରମରେ ଅକାଦେମିର ଓଡ଼ିଆ ଉପଦେଷ୍ଟାମଣ୍ଡଳୀ ଆବାହକ ବିଜୟାନନ୍ଦ ସିଂହ ପ୍ରାରମ୍ଭିକ ସୂଚନା ଓ ସଚିବ କେ. ଶ୍ରୀନିବାସ ରାଓ ସ୍ବାଗତ ଭାଷଣ ଦେଇଥିଲେ। ପ୍ରଖ୍ୟାତ କବି ସୀତାକାନ୍ତ ମହାପାତ୍ର, ରମାକାନ୍ତ ରଥ, ପ୍ରତିଭା ଶତପଥୀ, ରାଜେନ୍ଦ୍ର କିଶୋର ପଣ୍ଡା, ଅମରେଶ ପଟ୍ଟନାୟକ, ଆଦିକନ୍ଦ ସାହୁ, ଧନେଶ୍ବର ସାହୁ, ଅର୍ଚ୍ଚନା ନାୟକ, ମହେନ୍ଦ୍ର ପ୍ରତାପ, ସୁନନ୍ଦା ପ୍ରଧାନ ଓ କ୍ଷେତ୍ରବାସୀ ନାୟକ ପ୍ରମୁଖ ଉପସ୍ଥିତ ଥିଲେ। ଶେଷରେ ଡ. ଦାସ ପାଠକମାନଙ୍କ କିଛି ପ୍ରଶ୍ନର ଉତ୍ତର ରଖିଥିଲେ। ଅକାଦେମିର ଓଡ଼ିଆ ଉପଦେଷ୍ଟା ମଣ୍ଡଳୀର ସଦସ୍ୟ ପ୍ରଫେସର ବିଜୟ କୁମାର ଶତପଥୀ ଧନ୍ୟବାଦ ଦେଇଥିଲେ।