ମେଡିକାଲ କଲେଜ ଶିକ୍ଷକଙ୍କ ଦରମା ବଢ଼ିଲା

ଭୁବନେଶ୍ବର: ଓଡ଼ିଶା ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅଧୀନରେ କାର୍ଯ୍ୟରତ ନିର୍ଦ୍ଦିଷ୍ଟ ଠିକା କର୍ମଚାରୀଙ୍କ ଦରମା ବୃଦ୍ଧି କରାଯାଇଛି। ବୁଧବାର ପ୍ରକାଶିତ ବିଭାଗୀୟ ବିଜ୍ଞପ୍ତି ଅନୁସାରେ ସରକାରୀ ମେଡିକାଲ କଲେଜ ଓ ହସ୍ପିଟାଲଗୁଡିକରେ କାର୍ଯ୍ୟରତ ଠିକା ପ୍ରଫେସର, ଆସୋସିଏଟ ପ୍ରଫେସର ଓ ଆସିଷ୍ଟାଣ୍ଟ ପ୍ରଫେସରଙ୍କ ଦରମା ବୃଦ୍ଧି ପାଇଛି।

ପୂର୍ବରୁ ପ୍ରଫେସରମାନେ ମାସିକ ୧ ଲକ୍ଷ ୨୫ ହଜାର ଓ ବର୍ଷକୁ ୩ ପ୍ରତିଶତ ଲେଖାଏଁ ବୃଦ୍ଧିରେ ଦରମା ପାଉଥିଲେ। ବର୍ତ୍ତମାନ ସେମାନେ ମାସିକ ୨ ଲକ୍ଷ ୩୦ ହଜାର ଦରମା ପାଇବେ ଓ ତା’ ସହିତ ୫ ପ୍ରତିଶତ ଲେଖାଏଁ ବର୍ଷକୁ ବୃଦ୍ଧି କରାଯିବ। ସେହିପରି ଆସୋସିଏଟ ପ୍ରଫେସରମାନେ ପୂର୍ବରୁ ୧ ଲକ୍ଷ ଓ ବର୍ଷକୁ ୩ ପ୍ରତିଶତ ଲେଖାଏଁ ବୃଦ୍ଧିରେ ଦରମା ପାଉଥିଲେ। ବର୍ତ୍ତମାନ ସେମାନେ ୨ ଲକ୍ଷ ସହିତ ବର୍ଷକୁ ୫ ପ୍ରତିଶତ ଲେଖାଏଁ ବୃଦ୍ଧିରେ ଦରମା ପାଇବେ।

ସେହିପରି ଆସିଷ୍ଟାଣ୍ଟ ପ୍ରଫେସରମାନେ ପୂର୍ବରୁ ୭୫ ହଜାର ଓ ବର୍ଷକୁ ୩ ପ୍ରତିଶତ ଲେଖାଏଁ ବୃଦ୍ଧିରେ ଦରମା ପାଉଥିଲେ। ବର୍ତ୍ତମାନ ସେମାନେ ୧ ଲକ୍ଷ ୨୦ ହଜାର ସହିତ ବର୍ଷକୁ ୫ ପ୍ରତିଶତ ବୃଦ୍ଧିରେ ଦରମା ପାଇବେ ବୋଲି ବିଜ୍ଞପ୍ତିରେ ଉଲ୍ଲେଖ ରହିଛି। ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ରିସୋଲ୍ୟୁସନ ନଂ. ୮୯୬୭ ତା ୨୫.୪.୨୦୨୨ରେ ପ୍ରକାଶିତ ବିଜ୍ଞପ୍ତି ଅନୁସାରେ ଅନେକ ଠିକା ଶିକ୍ଷକ ମେଡିକାଲ କଲେଜଗୁଡିକରେ କାର୍ଯ୍ୟରତ ଅଛନ୍ତି। ସେମାନେ ଏହି ଦରମା ପାଇବେ। ଏଭଳି ଦରମା ବୃଦ୍ଧିକୁ ଅର୍ଥ ବିଭାଗ ପକ୍ଷରୁ ମଂଜୁରୀ ମିଳିଛି।

ସମ୍ବନ୍ଧିତ ଖବର