ସମ୍ବଲପୁର: ଅଟୋ-ଟ୍ରକ୍‌ ଧକ୍କା ଯୋଗୁଁ ୫ ଛାତ୍ରୀଙ୍କ ସମେତ ଅନେକ ଆହତ

ଯୁଯୁମରା: ବୁଧବାର ସକାଳ ୧୦: ୩୦ ସମୟରେ ଯୁଯୁମରା ଥାନା ଅନ୍ତର୍ଗତ ଝାଙ୍କରପାଲି ଛକଠାରେ ଗୋଟାଏ ଅଟୋରିକ୍ସା ଓ ଗୋଟିଏ ଟ୍ରକ୍‌ ମଧ୍ୟରେ ଧକ୍କା ହେବାରୁ କେତେକ ଯାତ୍ରୀ ଆହତ ହୋଇଛନ୍ତି।

ଅଟୋରେ ଥିବା ଯାତ୍ରୀମାନଙ୍କ ମଧ୍ୟରୁ ଅଧିକାଂଶ ଫୁଲଝରନସ୍ଥିତ ପାର୍ବତୀ ଗିରି ମହାବିଦ୍ୟାଳୟର ଛାତ୍ରୀ। ସେମାନଙ୍କ ମଧ୍ୟରୁ ୫ ଜଣ ଆହତ ହେଇଛନ୍ତି। ଅଟୋ ଚାଳକ ଓ ଅନ୍ୟ ଜଣେ ବୟସ୍କା ମହିଳା ମଧ୍ୟ ଆହତ ହୋଇଛନ୍ତି।

ଅଟୋରିକ୍ସାଟି ବହୁସଂଖ୍ୟକ ଯାତ୍ରୀଙ୍କୁ ବସାଇ ମାନେଶ୍ୱରରୁ ଫୁଲଝରନ ଅଭିମୁଖେ ଯାଉଥିବା ବେଳେ ପଛପଟୁ ଆସୁଥିବା ଏକ ୧୦ ଚକିଆ ଟ୍ରକ୍‌ ତାକୁ ଧକ୍କା ଦେଇଥିଲା। ଧକ୍କାର ପ୍ରଭାବରେ ଅଟୋରିକ୍ସାଟି ଘଟନାସ୍ଥଳରେ ଓଲଟି ପଡ଼ିଥିଲା।

ଏହି ସମୟରେ ସେ ବାଟ ଦେଇ ଯାଉଥିବା ରେଢ଼ାଖୋଲ୍‌ ଏସ୍‌ଡିପିଓ ହାଡ଼ିବନ୍ଧୁ ସ୍ୱାଇଁ ସ୍ଥାନୀୟ ଲୋକଙ୍କ ସହାୟତାରେ ତାଙ୍କ ଗାଡ଼ିରେ ଆହତ ଛାତ୍ରୀମାନଙ୍କୁ ଆଣି ସଦର ଡାକ୍ତରଖାନାରେ ଭର୍ତ୍ତି କରିଥିଲେ।

ପୁଲିସ ଘଟନାସ୍ଥଳରେ ପହଞ୍ଚି ଉଭୟ ଗାଡ଼ିକୁ ଜବତ କରି ଟ୍ରକ୍‌ ଚାଳକଙ୍କୁ ଗିରଫ କରିଛି।