ସମ୍ବଲପୁର ଆର୍ପିଏଫ୍ ହାତରେ ଧରାପଡିଲେ ୨ ହତ୍ୟାକାରୀ
କେରଳରେ ହତ୍ୟା କଲେ, ସମ୍ବଲପୁରରୁ ଧରାପଡ଼ିଲେ
ସମ୍ବଲପୁର : କେରଳର ଇଡ୍ଡୁକି ଜିଲ୍ଲା ମୁନ୍ନାର ଥାନା ଅଧୀନ ଅଞ୍ଚଳରେ ଘଟିଲା ହତ୍ୟାକାଣ୍ଡ। ହତ୍ୟା କରିବା ପରେ ୨ ଅଭିଯୁକ୍ତ ପୁଲିସ ଆଖିରେ ଧୂଳି ପକାଇ ଓଡ଼ିଶା ଚାଲି ଆସିଲେ। ଓଡ଼ିଶାର ରାଉରକେଲାରେ ଭଦ୍ରବ୍ୟକ୍ତି ଭଳି ରହିବାକୁ ସବୁ ପ୍ରକାର ବ୍ୟବସ୍ଥା ବି ହୋଇଥିଲା। କିନ୍ତୁ ବାଟରେ ସମ୍ବଲପୁର ଡିଭିଜନ୍ର ରେଳ ସୁରକ୍ଷା ବଳ (ଆର୍ପିଏଫ୍) ହାବୁଡରେ ପଡ଼ିଗଲେ ୨ ଅଭିଯୁକ୍ତ। ସମ୍ବଲପୁର ଆର୍ପିଏଫ୍ ଟିମ୍ ୨ ଅଭିଯୁକ୍ତଙ୍କୁ ଧରିବା ସହ କେରଳ ପୁଲିସକୁ ହସ୍ତାନ୍ତର କରିଛି।
Sambad is now on WhatsApp
Join and get latest news updates delivered to you via WhatsApp
ଆର୍ପିଏଫ୍ ସମ୍ବଲପୁର ପକ୍ଷରୁ ମିଳିଥିବା ସୂଚନା ଅନୁଯାୟୀ, ଗତ ବୁଧବାର ଦିନ ୨ ଅଭିଯୁକ୍ତ କେରଳର ମୁନ୍ନାର ଥାନା ଅଧୀନ ଅଞ୍ଚଳରେ ହତ୍ୟା କରି ଟ୍ରେନ୍ରେ ଫେରାର୍ ହୋଇଥିବା ଖବର ଆସିଲା। ଘଟଣାର ବିବରଣୀ ଓ ଅଭିଯୁକ୍ତଙ୍କ ଫଟୋ ବି ମିଳିଗଲା। ତାପରେ ଆକ୍ସନ୍ ମୁଡ୍କୁ ଆସିଥିଲା ସମ୍ବଲପୁର ଆର୍ପିଏଫ୍। ୨ ଅଭିଯୁକ୍ତ ଟ୍ରେନ୍ ନଂ ୧୩୩୫୨ରେ ତିରୁପୁର୍ରୁ ରାଉରକେଲା ଆସୁଥିଲେ। ଟ୍ରେନ୍ଟି ଗୁରୁବାର ସମ୍ବଲପୁର ରେଳ ଷ୍ଟେସନ୍ରେ ଅଟକିବା ପରେ ଆର୍ପିଏଫ୍ ଆଇଆଇସି ଏମ. ଯାଦବ ଓ ବିବେକ କୁମାରଙ୍କ ନେତୃତ୍ବରେ ସମ୍ବଲପୁର ଆର୍ପିଏଫ୍ର ସ୍ବତନ୍ତ୍ର ଟିମ୍ ଟ୍ରେନ୍କୁ ଯାଞ୍ଚ କରିବା ସହ ୨ ଅଭିଯୁକ୍ତ ସହଦେବ ଲାଙ୍ଗ ଓ ଦବୁଇ ଚାମ୍ପିଆକୁ ଧରିବାରେ ସଫଳ ହୋଇଥିଲେ। ସମ୍ବଲପୁର ଆର୍ପିଏଫ୍ ପକ୍ଷରୁ ଶୁକ୍ରବାର ଦିନ ୨ ଅଭିଯୁକ୍ତଙ୍କୁ କେରଳ ପୁଲିସର ଏକ ଟିମ୍କୁ ହସ୍ତାନ୍ତର କରାଯାଇଛି।