ସମ୍ବଲପୁର: ଲଗାଣ ବର୍ଷା ସାରା ରାଜ୍ୟରେ ଜାରି ରହିଥିବା ବେଳେ ସମ୍ବଲପୁର ସହର ଉପକଣ୍ଠ ମାଳତୀ ଗୁଣ୍ଡେରପୁରସ୍ଥିତ ମାଳତି ନଦୀ ପୋଲ ପାଣିରେ ବୁଡ଼ିଯିବା କାରଣରୁ ୧୫ ନମ୍ବର ରାଜ୍ୟ ରାଜପଥ ଦେଇ ସମ୍ବଲପୁର-ସୋନପୁର ମଧ୍ୟରେ ଯୋଗାଯୋଗ ବିଛିନ୍ନ ହୋଇଯାଇଛି। ହୀରାକୁଦର ୨୪ଟି ଗେଟ୍ ଖୋଲିବା ପରେ ମହାନଦୀ ପାଣି ଏହାର ଉପନଦୀ ମାଳତୀକୁ ପଶି ଆସିଥିଲା। ମାଳତୀରେ ପଛୁଆ ପାଣି ଆସି ଗୁଣ୍ଡେରପୁର ଲିମ୍ସରିଏନ୍ଠାରେ ଥିବା ପୋଲ ଉପରେ ଚାଲିଥିଲା। ଦିନ ୧୧ଟା ବେଳକୁ ଉକ୍ତ ପୋଲ ଉପରକୁ ପାଣି ଚଢ଼ି ସଂଧ୍ୟା ବେଳକୁ ଛାତିଏ ଉଚ୍ଚରେ ପାଣି ଚାଲିଥିଲା। ଫଳରେ ଉକ୍ତ ରାସ୍ତା ଦେଇ ଯାତାୟତ ସଂପୂର୍ଣ୍ଣ ବନ୍ଦ ହୋଇ ଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଆଜି ସକାଳୁ ଧମା ପଟୁ ସମ୍ବଲପୁର ସହରକୁ ପାଠ ପଢ଼ିବାକୁ ଆସିଥିବା ସ୍କୁଲ୍ କଲେଜ୍ ଛାତ୍ରଛାତ୍ରୀ, ଶିକ୍ଷକ ଓ କର୍ମଚାରୀ ମାନେ ଫେରିବାରେ ସମସ୍ୟା ହୋଇଥିଲା। ସବୁ ଗାଡ଼ି ଗୁଡ଼ିକ ଅବଶ୍ୟ ମାନେଶ୍ବର ଦେଇ ବୁଲି ଯିବା ଆସିବା କରିଥିଲେ। ମାଳତୀ ଗୁଣ୍ଡେରପୁରଠାରେ ଏକ ଉଚ୍ଚ ସେତୁ ନିର୍ମାଣ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଘୋଷଣାକୁ ସାଢ଼େ ତିନି ବର୍ଷ ବିତି ଯାଇଥିଲେ ବି ଏ ପର୍ଯ୍ୟନ୍ତ ସରକାର ଏ ଦିଗରେ କୌଣସି ପଦକ୍ଷେପ ନେଇ ନାହାନ୍ତି। ଫଳରେ ସାମାନ୍ୟ ବଢ଼ି ହେଲେ ବା ହୀରାକୁଦରେ ୨୫ରୁ ଅଧିକ ଗେଟ୍ ଖୋଲିଲେ ଏହି ପୋଲ ଉପରେ ପାଣି ଚାଲେ ଓ ଯାତାୟତ ଠପ୍ ହୋଇଯାଏ। ପ୍ରତି ବର୍ଷ ବର୍ଷା ଋତୁରେ ଏକାଧିକ ବାର ଏଭଳି ସ୍ଥିତି ସୃଷ୍ଟି ହୁଏ।