ଭୁବନେଶ୍ୱର: ଜେଲରୁ ବାହାରିବା ପରେ ସନ୍ତୋଷ ରାଉଳ ତଥା ଭଣ୍ଡବାବା ସାରଥିଙ୍କ ଉପରେ କ୍ରାଇମବ୍ରାଞ୍ଚର କଡ଼ା ନଜର ରହିବ। ଚେଷ୍ଟା କଲେ ବି ଆତ୍ମଘୋଷିତ ବାବା ସାରଥି ଖସିପାରିବେ ନାହିଁ । ସାରଥିଙ୍କ ସମସ୍ତ ଗତିବିଧି ଉପରେ ନଜର ରଖିବ କ୍ରାଇମବ୍ରାଞ୍ଚ । କେବଳ ଏତିକି ନୁହେଁ, ଜାମିନ ସର୍ତ୍ତ ଖିଲାପ ଅଭଯୋଗ ଆସିଲେ ସାରଥିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯିବ ।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ, ୪ବର୍ଷ ପରେ ଗତକାଲି ଚୌଦ୍ୱାର ଜେଲରୁ ସନ୍ତୋଷ ରାଉଳ ଓରଫ ସାରଥି ବାହାରିଥିଲେ। ତେବେ ଖବର ଅନୁସାରେ, ଜେଲରୁ ବାହାରିବା ପରେ ସାରଥି ଅଜଣା ସ୍ଥାନକୁ ଚାଲିଯାଇଛନ୍ତି । ସାରଥୀଙ୍କ ବାରିମୂଳ ଆଶ୍ରମ ଯିବା ଉପରେ କୋର୍ଟ କଟକଣା ଜାରି କରିଛନ୍ତି । ତେଣୁ ସାରଥି ଏବେ କେଉଁଠି ତାକୁ ନେଇ ଏବେ ଅନେକ ପ୍ରଶ୍ନ ଉଙ୍କି ମାରିଛି ।
ପୂର୍ବରୁ ଦୁଇଟି ମାମଲାରେ ଜାମିନ ମିଳିଥିବା ବେଳେ ସୋମବାର, ସାରଥିଙ୍କୁ ତୃତୀୟ ମାମଲାରେ ହାଇକୋର୍ଟ ଜାମିନ୍ ଦେଇଥିଲେ । ୨ ଲକ୍ଷ ଟଙ୍କା ଓ ଦୁଇ ଜଣ ଜାମିନଦାରଙ୍କ ବଦଳରେ ଜାମିନ୍ରେ ଯିବାକୁ ଅନୁମତି ଦେଇଥିଲେ ହାଇକୋର୍ଟ । ତେବେ ଜାମିନ୍ ମଂଜୁର କରିବା ସହ ସର୍ତ୍ତ ରଖିଥିଲେ ଉଚ୍ଚ ନ୍ୟାୟାଳୟ । ତଦନ୍ତରେ ସହଯୋଗ କରିବା ପାଇଁ ସର୍ତ ରଖାଯାଇଥିବା ବେଳେ ତଳ କୋର୍ଟ ଅନ୍ୟ ସର୍ତ ରଖିବାକୁ ନିର୍ଦ୍ଦେଶ ଦେଇଥିଲେ ହାଇକୋର୍ଟ।
ସର୍ତ ମୁତାବକ, ସାରଥି କେନ୍ଦ୍ରାପଡ଼ା ବାରିମୂଳ ଆଶ୍ରମକୁ ଯିବେ ନାହିଁ । ଧାର୍ମିକ ସମାବେଶ ଓ କାର୍ଯ୍ୟକ୍ରମରେ ଯୋଗଦେବେ ନାହିଁ । ରାଜ୍ୟ ବାହାରକୁ ଯାଇପାରିବେ ନାହିଁ । ସାକ୍ଷୀଙ୍କୁ ପ୍ରଭାବିତ କରିବେ ନାହିଁ ଏବଂ ତଦନ୍ତରେ ସହଯୋଗ କରିବେ ।