୬ ବର୍ଷ ପରେ ଘରକୁ ଫେରିଲା ଅପରେସନ୍ ମୁସ୍କାନ୍ରୁ ଉଦ୍ଧାର ‘ସୀମା’
ଖୋର୍ଦ୍ଧା: ଶିଶୁ ଶ୍ରମିକ ନିୟୋଜନ ବିରୋଧୀ ଅପରେସନ୍ ମୁସ୍କାନ୍ ଭୁବନେଶ୍ୱରରୁ ଉଦ୍ଧାର ହୋଇଥିଲେ ସୀମା (ଛଦ୍ମନାମ) । ସେତେବେଳକୁ ତାଙ୍କୁ ୧୧ ବର୍ଷ । ଏପରିକି ସେ ନିଜର ଘର ପରିବାର ଠିକଣା କହିବାରେ ମଧ୍ୟ ଅକ୍ଷମ ଥିଲେ । କିଏ ଜାଣିଥିଲା, ୬ ବର୍ଷ ପରେ ସେ ଜଣେ ଶିକ୍ଷିତ ଓ ସ୍ୱାବଲମ୍ବୀ ହେବାର ସକ୍ଷମ ସହ ନିଜ ପରିବାରକୁ ଫେରିପାଇବେ । କିନ୍ତୁ ସୀମାଙ୍କ ଆଶା ପୂରଣ ହୋଇଛି, ଜିଲ୍ଲା ଶିଶୁ ସୁରକ୍ଷା କମିଟିର ସହାୟତାରେ । ସୀମା ସୁଦୂର କେନ୍ଦୁଝର ବାଂଶପାଳର ତଳକଇଁସାରୀ ଗ୍ରାମକୁ ଯାଇ ନିଜର ପରିବାର ସଦସ୍ୟଙ୍କୁ ଭେଟିଛନ୍ତି ।
Sambad is now on WhatsApp
Join and get latest news updates delivered to you via WhatsApp
୨୦୧୬ରେ ଅପରେସନ୍ ମୁସ୍କାନ୍ ଯୋଜନାରେ ପୁଲିସ ଭୁବନେଶ୍ୱର ଏୟାର୍ ଫିଲ୍ଡ ଥାନା ଅଧୀନ ପୋଖରୀପୁଟର ଜଣେ ପଦସ୍ଥ ସରକାରୀ ଅଧିକାରୀଙ୍କ ଘରୁ ସୀମାଙ୍କୁ ଉଦ୍ଧାର କରିଥିଲେ । ଏହାପରେ ଶିଶୁ ମଙ୍ଗଳ ସମିତିର ନିର୍ଦ୍ଦେଶ କ୍ରମେ ସୀମାଙ୍କୁ ସୁଭଦ୍ରା ମହତାବ ସେବା ସଦନରେ ରଖାଯାଇଥିଲା । କାଉନ୍ସିଲିଂରେ ସେ ନିଜର ଘର ଘାଗରା ଓ କରଂଜିଆ ବୋଲି କହିଥିଲେ । ତେବେ ଉଭୟ କେନ୍ଦୁଝର ଓ ମୟୂରଭଂଜ ଜିଲ୍ଲାର ଶିଶୁ ମଙ୍ଗଳ ସମିତିକୁ ଠିକଣା ଚିହ୍ନଟ କରିବାକୁ ସହଯୋଗ ଲୋଡ଼ାଯାଇଥିଲେ ମଧ୍ୟ ବିଫଳ ହୋଇଥିଲା । ଏଣୁ ସେବା ସଦନରେ ରଖାଯାଇ ତାଙ୍କର ପାଠ ପଢ଼ିବାର ବ୍ୟବସ୍ଥା କରାଯାଇଥିଲା । ଏହା ମଧ୍ୟରେ ୬ ବର୍ଷ ଅତିକ୍ରମ ହୋଇଯାଇଛି । ସୀମା ପାଠଶାଠ ପଢ଼ି ଏକ ସରକାରୀ ଆଇଆଇଟିରେ ସ୍ମାର୍ଟ ହେଲ୍ଥ କେୟାର୍ ପ୍ରଶିକ୍ଷଣ ନେଉଛନ୍ତି । ନିଜର ଘର ପରିବାର କଥା ମନେ ପଡ଼ିବାରୁ ସେ ସେବାସଦନର ହୋମ୍ ମ୍ୟାନେଜମେଣ୍ଟ ବୈଠକରେ ନିଜ ପରିବାର ସଦସ୍ୟଙ୍କୁ ଭେଟିବାକୁ ଅନୁରୋଧ କରିଥିଲେ ।
ଅନୁରୋଧ ପରେ ଅତିରିକ୍ତ ଶିଶୁ ମଙ୍ଗଳ ସମିତିର ନିର୍ଦ୍ଦେଶକ୍ରମେ ପୁଣି ଖୋର୍ଦ୍ଧା ଶିଶୁ ସୁରକ୍ଷା କମିଟି ପକ୍ଷରୁ ଠିକଣା ଚିହ୍ନଟ ଅଭିଯାନ ଆରମ୍ଭ ହୋଇଥଇଲା । କମିଟିର ଅଧିକାରୀ ବାଣିଶ୍ରୀ ପଟ୍ଟନାୟକଙ୍କ ତତ୍ୱାବଧାନରେ ସମାଜକର୍ମୀ ରଂଜନ କୁମାର ଗୋଚ୍ଛାୟତ ମହତାବ ସେବା ସଦନର ଅଧ୍ୟକ୍ଷା ସୀମାରାଣୀ ସାହୁ, ରୁଚିକା ସଂଗଠନର ପ୍ରିୟଦର୍ଶିନୀ ରାଉତରାୟ ଓ ଅନ୍ୟ ସଦସ୍ୟମାନେ କେନ୍ଦୁଝରର ସାନ ଘାଗରା, ବଡ଼ ଘାଗରା ନିକଟସ୍ଥ ବିଭିନ୍ନ ଗାଁ ଯାଇ ଅନୁସନ୍ଧାନ କରିଥିଲେ । ଶେଷରେ ବାଂଶପାଳ ପଂଚାୟତସମିତି ଅଧୀନ ତଳ କଇଁସାରୀ ଗାଁରେ ସୀମାଙ୍କ ପରିବାର ସଦସ୍ୟ, ଅଜା ଓ ଆଇଙ୍କୁ ଭେଟିଥିଲେ । ଏହାପରେ ସୀମାଙ୍କୁ ନେଇ ଗାଁକୁ ଯାଇଥିଲେ । ସେଠାରେ ସୀମା ନିଜର ଗାଁ ଲୋକ, ପରିବାର ସଦସ୍ୟଙ୍କୁ ଭେଟିଛନ୍ତି ।