୧ କୋଟି ୬ ଲକ୍ଷ ଟଙ୍କାର ବ୍ରାଉନ୍‌ସୁଗାର ଜବତ: ୨ ନିଶା ମାଫିଆଙ୍କୁ ମାଡ଼ିବସିଲା ଏସ୍‌ଟିଏଫ୍‌

ବାଲେଶ୍ବର: ଏସ୍‌ଟିଏଫ୍ ହାତରେ ଧରାପଡ଼ିଛନ୍ତି ବାଲେଶ୍ବରର ୨ କୁଖ୍ୟାତ ବ୍ରାଉନ୍‌ସୁଗାର୍‌ ମାଫିଆ। ସ୍ଥାନୀୟ ପୁଲିସ୍ ସହାୟତାରେ ଏସ୍‌ଟିଏଫ୍‌ର ଏକ ସ୍ବତନ୍ତ୍ର ଟିମ୍ ଆଜି ବାଲେଶ୍ବର ରେଳ ଷ୍ଟେସନ୍‌ ନିକଟରେ ଚଢ଼ାଉ କରି ୧ କେଜି ୬୦ ଗ୍ରାମ୍‌ ଓଜନର ବ୍ରାଉନ୍‌ସୁଗାର ଜବତ କରିଛି। ଜବତ ବ୍ରାଉନ୍‌ସୁଗାରର ମୂଲ୍ୟ ୧ କୋଟି ୬ ଲକ୍ଷ ଟଙ୍କା ହେବ ବୋଲି ଆକଳନ କରାଯାଇଛି। ଗିରଫ ହୋଇଥିବା ଦୁଇ ନିଶା ୨ ମାଫିଆ ହେଲେ ଏସ୍‌କେ ରାଜୁ ଓ ଅମ୍‌ଜାଦ ଖାନ୍‌। ରାଜୁର ଘର ବାଲେଶ୍ବର ସହରର ଆଜିମାବାଦ ଓ ଅମଜାଦ୍‌ର ଘର ସହଦେବଖୁଣ୍ଟା ଅଞ୍ଚଳରେ ବୋଲି ଜଣାପଡ଼ିଛି। ଉଭୟଙ୍କ ପାଖରୁ ଗୋଟିଏ ହିରୋ ସିଡି ଡିଲକ୍ସ ବାଇକ୍ ଓ ଅନ୍ୟାନ୍ୟ ଆପରାଧିକ ସାମଗ୍ରୀ ଜବତ କରାଯାଇଛି।

ସୂଚନାଥାଉକି, ନିକଟରେ ଜଳେଶ୍ବର ଓ କମର୍ଦ୍ଦା ଅଞ୍ଚଳରେ ଚଢ଼ଉ କରାଯାଇ ପାଖାପାଖି ୧ କେଜି ଓଜନର ବ୍ରାଉନ୍‌ସୁଗାର ଜବତ କରାଯାଇଥିଲା। ଯାହାର ମୂଲ୍ୟ ୧ କୋଟି ଟଙ୍କା ହେବ। ଏହି ଘଟଣାରେ ୩ ଜଣଙ୍କୁ ଗିରଫ କରିଥିଲା କେନ୍ଦ୍ରୀୟ ଅବକାରୀ ବିଭାଗ।