ହାଇପ୍ରୋଫାଇଲ ସେକ୍ସ ରାକେଟ ପର୍ଦ୍ଦାଫାଶ, ରାଣୀ ମହୁମାଛି ସମେତ ୫ ଯୁବକ ଗିରଫ, ୩ ଯୁବତୀ ଉଦ୍ଧାର
ଭିଡିଓରେ ଶୁଣନ୍ତୁ ରାଣୀ ମହୁମାଛିଙ୍କ ବୟାନ
ସମ୍ବଲପୁର: ଧନୁପାଲି ଥାନା ଅନ୍ତର୍ଗତ ଭତରା ମଠପାଲିରେ ସେକ୍ସ ରାକେଟ ଠାବ ହୋଇଛି। ଏଠାରେ ଥିବା ପ୍ରାଣୀ ସହାୟକ କେନ୍ଦ୍ର ପଛପାର୍ଶ୍ଵରେ ଚାଲିଥିବା ଏକ ହାଇପ୍ରୋଫାଇଲ୍ ସେକ୍ସ ରାକେଟକୁ ଠାବ କରିଛି ପୁଲିସ୍। ଏଠାରେ ଦୀର୍ଘ ୧ ବର୍ଷ ହେବ ସେକ୍ସ ରାକେଟ ଚାଲିଥିବା ପୁଲିସ ଜାଣିବାକୁ ପାଇଛି। ପୁଲିସ ଏହି ରାକେଟର ରାଣୀ ମହୁମାଛି ଓ ୫ ଜଣ ଯୁବକଙ୍କୁ ଗିରଫ କରିଥିବା ବେଳେ ୩ ଜଣ ଯୁବତୀଙ୍କୁ ଉଦ୍ଧାର କରିଛି।
Sambad is now on WhatsApp
Join and get latest news updates delivered to you via WhatsApp
ବିଶ୍ୱସ୍ତ ସୂତ୍ରରୁ ସୂଚନା ମିଳିବା ପରେ ପୁଲିସ ଏହି ହାଇପ୍ରୋଫାଇଲ୍ ସେକ୍ସ ରାକେଟ ଚାଲିଥିବା ସମୟରେ ଘଟଣାସ୍ଥଳରୁ ରାକେଟର ରାଣୀ ମହୁମାଛି ତପସ୍ୱିନୀ ଭୋଇ ଓ ୫ ଜଣ ଯୁବକଙ୍କୁ ଗିରଫ କରିଛି। ସେପଟେ, ଘଟଣାସ୍ଥଳରୁ ପୁଲିସ୍ ବାହାର ଜିଲ୍ଲାର ୩ ଜଣ ଯୁବତୀଙ୍କୁ ମଧ୍ୟ ଉଦ୍ଧାର କରିଛି। ଏଥି ସହିତ ପୁଲିସ ଉକ୍ତ ଘର ଭିତରୁ ବିପୁଳ ପରିମାଣର ଯୌନ ଉତ୍ତେଜକ ସାମଗ୍ରୀ ଜବତ କରିଛି। ଏସମ୍ପର୍କରେ ଧନୁପାଲି ପୁଲିସ୍ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି।
ଉଦ୍ଧାର ହୋଇଥିବା ୩ ଯୁବତୀଙ୍କ ବୟସ ୨୦-୨୨ ବର୍ଷ ହେବ ଓ ସେମାନେ ବରଗଡ଼, ଝାରସୁଗୁଡ଼ା ଓ ସୁନ୍ଦରଗଡ଼ ଜିଲ୍ଲାର ବୋଲି ଜଣାପଡ଼ିଛି। ଗିରଫ ହୋଇଥିବା ଯୁବକମାନେ ସମସ୍ତେ ସମ୍ବଲପୁରର ବୋଲି ଜଣାପଡ଼ିଛି। ଘଟଣାସ୍ଥଳରୁ ୩ଟି ବାଇକ୍, ୨ଟି ସ୍କୁଟି ଓ ୪ଟି ମୋବାଇଲକୁ ମଧ୍ୟ ପୁଲିସ୍ ଜବତ କରିଛି।
ଏସମ୍ପର୍କରେ ଧନୁପାଲି ପୁଲିସ୍ ବେଆଇନ୍ କାର୍ଯ୍ୟରେ ମାନବ ଚାଲାଣ ଆଇନ୍ ୧୯୫୮ ଓ ଭାରତୀୟ ଦଣ୍ଡବିଧି ଧାରା ୩୭୦ ଅନୁଯାୟୀ ମାମଲା ରୁଜୁ କରିଛି। ମାତ୍ର ଘଟଣା ତଦନ୍ତାଧୀନ ଥିବାରୁ ଏସମ୍ପର୍କରେ ପୁଲିସ୍ ଅଧିକ ତଥ୍ୟ ପ୍ରଦାନ କରିନାହିଁ।