ଓଡ଼ିଆ ଶାସ୍ତ୍ରୀୟ ଭାଷା ଦିବସ: ନିଃସହାୟ ଓଡ଼ିଆ ମହିଳାଙ୍କୁ ଓକିଲ ଯୋଗାଇଲେ ଷଢ଼େଇକଳା କୋର୍ଟ 

ରାଇରଙ୍ଗପୁର: ଝାଡ଼ଖଣ୍ଡର ଷଢ଼େଇକଳା କୋର୍ଟ ଜଣେ ଓଡ଼ିଆ ବିଧବା ମହିଳାଙ୍କୁ ଲଢ଼ିବା ପାଇଁ ଓଡ଼ିଆ ଓକିଲ ପ୍ରଦାନ କରିଛନ୍ତି। ସରକାରୀ ପ୍ରତାରଣାର ଶିକାର ଓଡ଼ିଆ ବିଧବା ମହିଳା ସବିତା ସାହୁ ତାଙ୍କୁ ଓଡ଼ିଆ ଭାଷାରେ ଜେରା ପାଇଁ କୋର୍ଟକୁ ନିବେଦନ କରିବା ପରେ ଓଡ଼ିଆ  ଶାସ୍ତ୍ରୀୟ ଭାଷା ଦିବସରେ ଷଢେଇକଳା କୋର୍ଟର ଏଭଳି ସହାୟତାକୁ ଓଡ଼ିଆ ସମୁଦାୟ ପ୍ରଶଂସା କରିଛନ୍ତି।

ଓଡ଼ିଶାର ବିଚ୍ଛିନ୍ନାଞ୍ଚଳ ଭାବେ ପରିଚିତ ରହିଛି ଷଢେଇକଳା, ଖରସୁଆଁ। ଦୀର୍ଘ ୭୦ ବର୍ଷ ହେଲା ଅଣ ଓଡ଼ିଆ ଅଫିସର ବର୍ଗଙ୍କ ବୈମାତୃକ ମନୋଭାବର ଶିକାର ହୋଇ ଆସୁଛନ୍ତି ଏମାନେ। ଗୁଡିଏ ମିଥ୍ୟା ଅଭିଯୋଗ କରାଯାଇ ମାମଲା ରୁଜୁ କରାଯାଉଛି। ଏନେଇ ୧୯୪୮ ଠାରୁ ରାଷ୍ଟ୍ରୀୟ ସ୍ତରରେ ମଧ୍ୟ ସ୍ବର ଉତ୍ତୋଳନ ହୋଇଛି। ହେଲେ କୈାଣସି ସମାଧାନ ଆଜି ଯାଏଁ  ଓଡ଼ିଆ ଜାତିକୁ ମିଳି ନାହିଁ। ଏବେ ସେହି ପ୍ରତାରଣାର ଶିକାର ଏକ ନିରିହ ମହିଳା ସବିତା ସାହୁଙ୍କ ପରିବାରର କାହାଣୀ ଲୋକ ଲୋଚନକୁ ଆସିବା ପରେ ଘଟଣାର ପର୍ଦ୍ଦାଫାସ ହୋଇଛି। ଖରସୁଆଁ ଖମାରଡିହ ଗାଁର ଏହି  ବିଧବା ମହିଳା ଅଙ୍ଗନବାଡ଼ି କର୍ମଚାରୀଙ୍କୁ ମାଡ଼ ମରାଯାଇ ଓ ବିଭିନ୍ନ ମିଥ୍ୟା ଅଭିଯୋଗ କରାଯାଇ (ରାଜଖରସୁଆ) ଫାଣ୍ଡିରେ ଅନେକ କେସ ତାଙ୍କ ପରିବାର ବର୍ଗଙ୍କ ନାମରେ ରୁଜୁ ହୋଇଛି।