ପ୍ରଦର୍ଶନୀ ପଡ଼ିଆରେ ବନ୍ଦ ହେଲା ‘ଶିଶିର ସରସ’ ମେଳା, ମନ ଦୁଃଖରେ ଫେରିଲେ ଦର୍ଶକ-ଗ୍ରାହକ
ଭୁବନେଶ୍ବର: ୟୁନିଟ-୩ସ୍ଥିତ ପ୍ରଦର୍ଶନୀ ପଡ଼ିଆରେ ପରିଚାଳିତ ହୋଇଥିବା ‘ଶିଶିର ସରସ’ ମେଳା ନିର୍ଦ୍ଧାରିତ ସମୟ ପୂର୍ବରୁ ବନ୍ଦ ହୋଇଛି। ଭୁବନେଶ୍ବର ସମେତ ରାଜ୍ୟରେ କୋଭିଡ ସଂକ୍ରମଣ ବୃଦ୍ଧି ହେବାରୁ ଲୋକମାନଙ୍କର କିପରି ଗହଳି ନହେବ ତାହାକୁ ଦୃଷ୍ଟିରେ ରଖି ବିଏମସି ଏହି ମେଳାକୁ ବନ୍ଦ କରିଛି। ବିଏମ୍ସି ପକ୍ଷରୁ ପ୍ରଦର୍ଶନୀ ପଡ଼ିଆର ମୁଖ୍ୟ ପ୍ରବେଶ ଦ୍ବାରରେ ବନ୍ଦ ନେଇ ଏକ ପୋଷ୍ଟର ଲଗାଇ ଦିଆଯାଇଛି। ଅଚାନକ ମେଳା ବନ୍ଦ ହୋଇଯିବା ଫଳରେ ଏଠାକୁ ବୁଲି ଆସିଥିବା ଏବଂ ଜିନିଷପତ୍ର କିଣିବାକୁ ଆସିଥିବା ଦର୍ଶକ ମାନଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି। ଆଗରୁ ଏହି ମେଳାକୁ ନେଇ ଅନେକ ଚର୍ଚ୍ଚା ହେଉଥିବା ବେଳେ ଏବେ ସ୍ୱାସ୍ଥ୍ୟଗତ ସୁରକ୍ଷା ଦୃଷ୍ଟିରୁ ଏଭଳି ପଦକ୍ଷେପ ନିଆଯାଇଛି ବୋଲି ବିଏମ୍ସି ପକ୍ଷରୁ କୁହାଯାଇଛି |
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ରାଜ୍ୟର ୩୦ ଜିଲ୍ଲା ସମେତ ଦେଶର ପ୍ରାୟ ୨୨ଟି ରାଜ୍ୟର ଗ୍ରାମୀଣ କାରିଗରୀ ଓ କଳାକୌଶଳକୁ ନେଇ ଗତମାସ ୨୮ ତାରିଖ ଠାରୁ ଶିଶିର ସରମ ମେଳା ଆରମ୍ଭ ହୋଇଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସନ୍ଧ୍ୟାରେ ଭର୍ଚୁଆଲ ମୋଡ଼ରେ ଉଦଘାଟନ କରିଥିଲେ। ଛତିଶଗଡ଼ର ଟସର, ଆସାମ ଓ ଉତ୍ତର ପୂର୍ବ ରାଜ୍ୟଗୁଡ଼ିକର ବେତ ତଥା ବାଉଁଶରୁ ପ୍ରସ୍ତୁତ ସାମଗ୍ରୀ, ପଶ୍ଚିମବଙ୍ଗର ହସ୍ତତନ୍ତ ଓ ଝୋଟ ସାମଗ୍ରୀ, ମଣିପୁରର ଡ୍ରାଏ ଫ୍ଲାୱାର, ଗୁଜରାଟ କାରିଗରଙ୍କ ଘର ସାଜସଜ୍ଜା ଓ ସାଲ୍ ସହ ପଞ୍ଜାବର ଫୁଲକରୀ, ବିହାରର ମଧୁବନି ପେଣ୍ଟିଂ, ଆନ୍ଧ୍ରପ୍ରଦେଶର ହସ୍ତତନ୍ତ ସାମଗ୍ରୀ ସହ ଅନ୍ୟ ରାଜ୍ୟଗୁଡ଼ିକର ମଧ୍ୟ ବିଭିନ୍ନ ଆକର୍ଷଣୀୟ ଘରକରଣା ଜିନିଷ ବିକ୍ରିବଟା ଚାଲିଥିଲା।
ଗ୍ରାମୀଣ କାରିଗରୀ ଓ ସାମଗ୍ରୀର ବିଶାଳ ସମ୍ଭାର ନେଇ ୨ବର୍ଷ ପରେ ଜାତୀୟସ୍ତରୀୟ ପ୍ରଦର୍ଶନୀ ‘ଶିଶିର ସରସ’ ଫେରିଥିଲା। ପ୍ରଦର୍ଶନୀ ପଡ଼ିଆରେ ଆୟୋଜିତ ଏହି ମେଳା ପରିସରରେ ମୋଟ୍ ୩୦୨ଟି ଷ୍ଟଲ୍ ପଡ଼ିଥିବା ବେଳେ ଫୁଡ୍କୋର୍ଟରେ ୧୦ଟି ଖାଦ୍ୟ ଷ୍ଟଲ୍ ପର୍ଯ୍ୟଟକଙ୍କୁ ଆକର୍ଷିତ କଥିଲା। ୩୯୨ଜଣ ମହିଳା ସ୍ବୟଂସହାୟିକା ଗୋଷ୍ଠୀ ଓ ଉତ୍ପାଦକ ଗୋଷ୍ଠୀ ଏଥିରେ ଅଂଶଗ୍ରହଣ କରିଥିବା ବେଳେ ୫୦୦ରୁ ଅଧିକ କାରିଗର ତଥା ବିକ୍ରେତା ଏଥିରେ ଅଂଶଗ୍ରହଣ କରିଥିଲେ।