ସମ୍ବଲପୁର: ଶତାବ୍ଦୀ ଶତାବ୍ଦୀ ଧରି ଚାଲି ଆସିଥିବା ଶୀତଳଷଷ୍ଠୀ ପରଂପରାରେ ପ୍ରଥମଥର ପାଇଁ ଦେବଦେବ ମହାଦେବଙ୍କ ବିବାହ ନିଜ ମନ୍ଦିର ପ୍ରାଙ୍ଗଣରେ ହିଁ ଅନୁଷ୍ଠିତ ହେବାକୁ ଯାଉଛି। ବରବେଶୀ ମହାଦେବ ଏଥର ବରଯାତ୍ରୀ ଶୋଭାଯାତ୍ରାରେ କନ୍ୟାଳୟକୁ ବାହାରିବେନି। ସହର ରାସ୍ତାରେ ବାଦ୍ୟ, ନାଚ, ଗୀତ ଦେଖିବାକୁ ମିଳି ନାହିଁ। ବରବେଶରେ ମହାଦେବଙ୍କ ପୂଜର୍ଚ୍ଚନା ଓ ଆଳତି ପରେ ବୁଧବାର ବିଳମ୍ବିତ ରାତିରେ ମନ୍ଦିର ପ୍ରାଙ୍ଗଣରେ ହିଁ ବିବାହ କାର୍ଯ୍ୟ ଆରମ୍ଭ ହେବାକୁ ଯାଉଛି।
Sambad is now on WhatsApp
Join and get latest news updates delivered to you via WhatsApp
ନନ୍ଦପଡ଼ାର ବଂବଂ ବରାଡ୍ ବାଲୁଙ୍କେଶ୍ବର ବାବାଙ୍କୁ ବୁଧବାର ସଂଧ୍ୟାରୁ ବରବେଶରେ ସଜାଇବା ଆରମ୍ଭ ହୋଇଛି। ସୁନା ଓ ରୁପା କାରୁକାର୍ଯ୍ୟରେ ସଜ୍ଜିତ ପରଭାରେ ଶୋଭିତ ବାଲୁଙ୍କେଶ୍ବରଙ୍କ ମନ୍ଦିର ସମ୍ମୁଖ ଆସ୍ଥାନରେ ମହା ଆଳତି ପରେ ବାଲୁଙ୍କଶ୍ବର କଲ୍ୟାଣ ମଣ୍ଡପସ୍ଥିତ ବାହା ବେଦୀକୁ ନିଆଯିବ। ସେଠାରେ ପୂର୍ବରୁ ଉପସ୍ଥିତ କନ୍ୟା ପକ୍ଷ ବରପକ୍ଷଙ୍କୁ ସ୍ବାଗତ କରିଥିଲେ। ମଧ୍ୟରାତ୍ରୀରେ ବିବାହ କାର୍ଯ୍ୟ ଆରମ୍ଭ ହେବାକୁ ଯାଉଛି।ଝାଡ଼ୁଆପଡ଼ାର ଲୋକନାଥ ବାବାଙ୍କୁ ମଧ୍ୟ ସଂଧ୍ୟାରୁ ବେଶ କରାଯିବ। ଆକର୍ଷଣୀୟ ପରଭାରେ ସଜ୍ଜିତ ଲୋକନାଥ ବାବାଙ୍କର ମନ୍ଦିର ପରିସରରେ ମହାଆଳତି ପରେ ଆରଣ୍ୟକ ମଣ୍ଡପରେ ସଜ୍ଜିତ ବାହା ବେଦୀକୁ ନିଆଯିବ। ସେଠାରେ ଉପସ୍ଥିତ କନ୍ୟା ପକ୍ଷ ମାତା ପାର୍ବତୀଙ୍କୁ ନବବଧୁ ରୂପରେ ସଜ୍ଜିତ କରାଯାଇଛି। ରାତିରେ ଆରଣ୍ୟକ ରୀତିନିତିରେ ବିବାହ କାର୍ଯ୍ୟ ଚାଲିବ। ମୁଦିପଡ଼ାର ଜାଗେଶ୍ବର ବାବାଙ୍କର ମଧ୍ୟ ଅନୁରୂପ ଢଙ୍ଗରେ ବେଶଭୂଷା, ପୂଜାର୍ଚ୍ଚନା ଓ ଆଳତି ହେବାକୁ ଯାଉଛି। ମନ୍ଦିର ପ୍ରାଙ୍ଗଣରେ ଲୋକାଚାର ଭିତ୍ତିରେ ମାନବୀୟ ରୀତିନୀତିରେ ବିବାହ କାର୍ଯ୍ୟ ଅନୁଷ୍ଠିତ ହେବାକୁ ଯାଉଛି।
ବଡ଼ବଜାରର ଶୀତଳେଶ୍ବର ବାବାଙ୍କ ବିବାହ ମଧ୍ୟ ମନ୍ଦିର ପରିପାର୍ଶ୍ବରେ ଅନୁଷ୍ଠିତ ହେବାକୁ ଯାଉଛି।। ବିବାହର ସମସ୍ତ ରୀତିନୀତି ପରେ ସଂଧ୍ୟାରୁ ବାବାଙ୍କୁ ବରବେଶରେ ସଜା ଯାଇଛି। ଅଳତୀ ଓ ପୂଜାର୍ଚ୍ଚନା ପରେ ସେହି ନିକଟରେ ପ୍ରସ୍ତୁତ ବିବାହ ବେଦୀରେ ବାହାଘର ଆରମ୍ଭ ହେବ। ବିଳମ୍ବିତ ରାତିରେ ହାତଗଣ୍ଠି ପଡ଼ିବ। ଠାକୁରପଡ଼ାର ଗୁପ୍ତେଶ୍ବର ବାବାଙ୍କ ବିବାହ ମଧ୍ୟ ମନ୍ଦିର ପରିସରରେ ଅନୁଷ୍ଠିତ ହେବ। ସଂଧ୍ୟାରେ ବାବାଙ୍କ ବେଶଭୂଷା, ପୂଜାର୍ଚ୍ଚନା, ମଙ୍ଗଳ ଆଳତି ହୋଇଛି। ସେହିପରି ବାଲିବନ୍ଧାର ସୋମନାଥ ବାବା, ବୁଢ଼ାରଜାର ପାହାଡେ଼ଶ୍ବର ବାବା, ଦୁର୍ଗାପାଲିର ଗୁଡେ଼ଶ୍ବର ବାବା, ଭତରାର ଶ˚କର ବାବା, ଗୋବିନ୍ଦତୋଲାର ସ୍ବପ୍ନେଶ୍ବର ବାବା, ସାକ୍ଷୀପଡ଼ାର ଓଁକାରେଶ୍ବର ବାବା, ସିନ୍ଦୁରପଙ୍କର ତାରକେଶ୍ବର ବାବା, କଟରଧୁଆର ମହାକାଳେଶ୍ବର ବାବାଙ୍କ ବିବାହ ଉତ୍ସବ ମଧ୍ୟ ନିରାଡ଼ମ୍ବରଭାବେ ଅନୁଷ୍ଠିତ ହେବ। ।