ଭୁବନେଶ୍ବର: ଆଗକୁ ପଞ୍ଚାୟତ ନିର୍ବାଚନ ଥିବା ବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତାକୁ ନେଇ ସଂଗୀତ ନିର୍ଦ୍ଦେଶକ ‘ଜାପାନୀ’ ଏକ ଗୀତ ସଂଯୋଜନା କରିଛନ୍ତି। ବଲିଉଡ୍‌ କଣ୍ଠଶିଳ୍ପୀ ଉଦିତ୍‌ ନାରାୟଣ ଏହି ଗୀତଟିକୁ ଗାଇଛନ୍ତି। ‘ବିଶ୍ବ ଦରବାରେ ଜଗନ୍ନାଥ ଦେଶ ସମ୍ମାନିତ ହୋଇଥିବ ହୋ ସମ୍ମାନିତ ହୋଇଥିବ..ଯେତେଦିନ ଦିନ ଆମ ନବୀନ ମୁଣ୍ଡରେ କାଳିଆର ହାତ ଥିବ.. ଜଗା କାଳିଆର ହାତ ଥିବ’ ଗୀତର ଟିଜର୍ ଆଜି ରିଲିଜ୍ ହୋଇଥିବା‌ ବେଳେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି। ଏହି ଗୀତଟିକୁ ତପୁ ନାୟକ ଲେଖିଛନ୍ତି। ନୂଆ ବର୍ଷରେ ଏହି ଗୀତଟି ରିଲିଜ୍ ହେବ ବୋଲି କୁହାଯାଇଛି। ଏହି ଗୀତର ପ୍ରଚାର କରିବାକୁ ଯାଇ ଉଦିତ୍‌ ନାରାୟଣ କହିଛନ୍ତି ଯେ ଭାରତର ସବୁଠୁ ଲୋକପ୍ରିୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ଲେଖା ହୋଇଥିବା ଗୀତ ଗାଇବାର ସୌଭାଗ୍ୟ ମୋତେ ମିଳିଛି। ଏହି ସୁନ୍ଦର ଗୀତରେ ମୁଖ୍ୟମନ୍ତ୍ରୀ କେତେ ଲୋକପ୍ରିୟ, କେତେ ସ୍ନେହୀ, କେତେ ସ୍ବଚ୍ଛ, ନିର୍ମଳ ସବୁ ବର୍ଣ୍ଣନା କରାଯାଇଛି।