ଧୋକାବାଜ ଭିଣୋଇ: ଭିଣୋଇର ମିଛ ପ୍ରେମ ପାଇଁ ଆତ୍ମହତ୍ୟା ଉଦ୍ୟମ କଲେ ଶାଳୀ!
ବାଲେଶ୍ୱର: ମିଛ ପ୍ରେମରେ ସମ୍ପର୍କୀୟ ଶାଳୀକୁ ଫସେଇଲେ ଭିଣୋଇ | କେବଳ ପ୍ରେମରେ ଫସେଇଲେ ନାହିଁ, ବରଂ ଶାରୀରିକ ସମ୍ପର୍କ ରଖିବା ପରେ ବିବାହର ପ୍ରତିଶୃତି ମଧ୍ୟ ଦେଲେ | କିନ୍ତୁ ଶେଷରେ ଶାଳୀକୁ ଭୁଆଁ ବୁଲାଇ ଅନ୍ୟ ଜାଗାରେ ବିବାହ ମଧ୍ୟ କଲେ | ଏ ବାବଦରେ ଜାଣିବା ପରେ ଶାଳୀ ଥାନାରେ ଅଭିଯୋଗ କଲେ, ତେବେ ପୁଲିସ ନିରବ ରହିବାରୁ ଶେଷରେ ଆତ୍ମହତ୍ୟା ଉଦ୍ୟମ କଲେ ଯୁବତୀ | ବାଲେଶ୍ୱର ଜିଲ୍ଲା ବସ୍ତା ବ୍ଲକରୁ ଏଭଳି ଏକ ପ୍ରେମ-ସମ୍ପର୍କ-ଧୋକାର କାହାଣୀ ଆସିଛି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ଅଭିଯୋଗ ମୁତାବକ ଏହି ଅଂଚଳର ସୁପ୍ରିୟା(ଛଦ୍ମନାମ)ଙ୍କୁ ତାଙ୍କ ଅଞ୍ଚଳର ରାମଚନ୍ଦ୍ର ନାମକ ସମ୍ପର୍କୀୟ ଭିଣୋଇ ନିଜ ପ୍ରେମ ଜାଲରେ ଫସାଇଥିଲେ | ଯୁବତୀଙ୍କ ପରିବାର ଗରିବ ଶ୍ରେଣୀର ହୋଇଥିବାରୁ ତାଙ୍କର ବିବାହ ହୋଇପାରୁନଥିଲା | ଆଉ ରାମଚନ୍ଦ୍ର ତାଙ୍କୁ ବିବାହର ପ୍ରତିଶୃତି ଦେଇ ସମ୍ପର୍କ ରଖିଥିଲେ | ବାରମ୍ବାର ସମ୍ପର୍କ ରଖିବା ପରେ ବି ବିବାହ ନ କରି ଅନ୍ୟ ସ୍ଥାନରେ ବିବାହ କରିଥିଲେ | ଏହା ଜାଣିବା ପରେ ଯୁବତୀ ଜଣକ ଥାନାରେ ଅଭିଯୋଗ କରିଥିଲେ |
ଥାନା ଅଧିକାରୀ ଉଭୟ ପକ୍ଷକୁ ଡ଼କାଇଥିବା ବେଳେ ପୁଅ ପକ୍ଷ ଆସିନଥିଲେ | ଫଳରେ ପୁଲିସ କୌଣସି କାର୍ଯ୍ୟାନୁଷ୍ଠାନ ନ ନେଇ ଚୁପ ହୋଇ ବସିରହିଥିଲା | ତେବେ ଅଭିଯୁକ୍ତ ଭିଣୋଇ ଯୁବତୀଙ୍କ ପରିବାରବର୍ଗଙ୍କୁ ବାରମ୍ବାର ଟଙ୍କା ମାଗୁଥିବାରୁ ଯୁବତୀ ଜଣକ ଶେଷରେ ହତାଶ ହୋଇ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ | ଗୁରୁତର ଅବସ୍ଥାରେ ଯୁବତୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ଝିଅର ପରିବାର ସଦସ୍ୟ ନ୍ୟାୟ ପାଇଁ ଦାବି କରିଛନ୍ତି |