ଭୁବନେଶ୍ୱର: ଭିଜନ୍ ଡକୁମେଣ୍ଟ ୨୦୩୬କୁ କାର୍ଯ୍ୟକାରୀ ପ୍ରକ୍ରିୟା ଆରମ୍ଭ ହୋଇଛି। ଲୋକମାନେ କିପରି ବିଭିନ୍ନ ସ୍ଥାନକୁ ଯାତାୟାତ କରିପାରିବେ, ସହରର ଭିଡ଼ କମିବ, ନୂତନ ବାଣିଜ୍ୟିକ କରିଡର୍‌ରେ ବିଭିନ୍ନ ଶିଳ୍ପସଂସ୍ଥାକୁ ଯୋଡ଼ିବା, ପର୍ଯ୍ୟଟନସ୍ଥଳୀ ଓ ବନ୍ଦରଗୁଡ଼ିକର ଯୋଗାଯୋଗ ସୁଦୃଢ ହେବ, ସେଥିଲାଗି ଏବେ ୧୪୯୨.୯୦ କୋଟି ଟଙ୍କା ବ୍ୟୟରେ ୪୮ କିମି ଦୀର୍ଘ ୧୦ଟି  ବାଇପାସ୍‌ ନିର୍ମାଣ କାର୍ଯ୍ୟ ଆଗେଇ ଚାଲିଛି। ଏତିକି ବେଳେ ୨୦୨୫-୨୬ ଆର୍ଥିକ ବର୍ଷ ଲାଗି ୨୭୭.୯୧ କୋଟି ଟଙ୍କା ବ୍ୟୟରେ ୩୨ କିମି ଦୀର୍ଘ ମୋଟ ୬ଟି ବାଇପାସ ନିର୍ମାଣକୁ ଅନୁମୋଦନ ମିଳିଛି।

Advertisment

୨୭୮ କୋଟି ଖର୍ଚ୍ଚ ଅନୁମୋଦନ
ଭାରୀଯାନ ପାଇଁ ନୂଆ କରିଡର୍‌
ସହରର ଭିଡ଼ ହ୍ରାସ ସହ ସବୁ ଶିଳ୍ପ ସଂସ୍ଥାକୁ ଯୋଡ଼ିବାକୁ ପ୍ରୟାସ
ବଡ଼ବଡ଼ ସହର ଲାଗି ଇନର୍‌ ଓ ଆଉଟର୍‌ ରିଂ ରୋଡ୍‌ ଯୋଜନା

ଏଥିରେ ବଲାଙ୍ଗୀର ଜିଲ୍ଲାରେ ୬.୮ କିମି ଦୀର୍ଘ ବଲାଙ୍ଗୀର ବାଇପାସ୍‌ ନିର୍ମାଣ ହେବାକୁ ଯାଉଛି। ଏହି ରାସ୍ତା ଜାତୀୟ ରାଜପଥ ୨୬ ଓ ରାଜ୍ୟ ରାଜପଥ ୪୨କୁ ସଂଯୋଗ କରିବା ସହ ଭାରୀଯାନଗୁଡ଼ିକର ଯାତାୟାତକୁ ସହଜ କରିବ। ବଲାଙ୍ଗୀର, ପାଟଣାଗଡ଼, ଖରିଆର ଟାଉନ୍‌ ଏବଂ  କଣ୍ଟାବାଞ୍ଜି ମଧ୍ୟରେ ଯିବାଆସିବାକୁ ସହଜ କରିବା ଲାଗି ୮.୫ କିମି ଦୀର୍ଘ ପାଟଣାଗଡ଼ ବାଇପାସ୍‌ ରାସ୍ତା ନିର୍ମାଣ ପ୍ରସ୍ତାବକୁ ଅନୁମୋଦନ ମିଳିଛି। ୪ କିମି ଦୀର୍ଘ ପାରଳାଖେମୁଣ୍ଡି ବାଇପାସ୍‌, ୩କିମି ଦୀର୍ଘ କାମାକ୍ଷାନଗର ଗେଙ୍ଗୁଟିଆ ବାଇପାସ୍‌, ଢେଙ୍କାନାଳ ମହୁଲପଡ଼ା ବାଇପାସ ପାଇଁ ମଧ୍ୟ ପ୍ରସ୍ତାବକୁ ଅନୁମୋଦନ ମିଳିଛି। ସର୍ବୋପରି ୮ କିମି ଦୀର୍ଘ କଟକ ଆଠଗଡ଼ ଆଉଟର୍‌ ରିଂ ରୋଡ୍‌ ପାଇଁ ପ୍ରସ୍ତାବକୁ ଅନୁମୋଦନ ମିଳିଛି। ଏହା କାର୍ଯ୍ୟକାରୀ ହେଲେ ଅଂଶୁପା ହ୍ରଦ, ଭଟ୍ଟାରିକା, ଧବଳେଶ୍ୱର ଓ ସିଂହନାଥ ପୀଠକୁ ଗମନଗମନ ସହଜ ହେବ।