ସାପ କାମୁଡ଼ାରେ ଚାଷୀଙ୍କ ମୃତ୍ୟୁ     

ବାମରା: ବାମରା ବ୍ଲକ୍‌ ଉଚ୍ଚକାପାଟ ପଞ୍ଚାୟତ ଅନ୍ତର୍ଗତ ଭଗପଡ଼ାରେ ସାପ କାମୁଡ଼ାରେ ଜଣେ ଚାଷୀଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ସୂଚନାନୁଯାୟୀ ମଙ୍ଗଳବାର ଦିନ ୧୨ ବେଳେ ଉଚ୍ଚକାପାଟ ଗ୍ରାମର ଚାଷୀ ପ୍ରହଲ୍ଲାଦ କେଛୁ (୪୭) ନିଜ ଜମିରେ କାମ କରୁଥିବା ବେଳେ ତାଙ୍କୁ ଏକ ମହାମଣ୍ଡଳ (ରସଲ୍‌ ଭାଇପର୍‌) ସାପ କାମୁଡି ଦେଇଥିଲା। ଘର ଲୋକେ ତାଙ୍କୁ ତୁରନ୍ତ ଡାକ୍ତରଖାନା ନେବା ପରିବର୍ତ୍ତେ ନିକଟସ୍ଥ ଗାଁ’ରେ ଜଣେ ଗୁଣିଆ ପାଖକୁ ନେଇ  ଝାଡ଼ଫୁଙ୍କ କରିଥିଲେ।

ମାତ୍ର ବୁଧବାର ସକାଳେ ଅବସ୍ଥା ଗୁରୁତର ହେବାରୁ ପରିବାର ଲୋକ ତାଙ୍କୁ ଗୋବିନ୍ଦପୁର ଡ଼ାକ୍ତରଖାନାକୁ ଆଣିଥିଲେ। କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ଅଭିଯୋଗ ପରେ ଗୋବିନ୍ଦପୁର ଥାନା ଏସଆଇ ବାସୁଦେବ ସେଠ ଡାକ୍ତରଖାନାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଥିବା ଜଣାପଡ଼ିଛି।