ମାତିଛନ୍ତି ମାଟି ମାଫିଆ: ତାଡ଼ିଦେଲେ ଗଙ୍ଗୁଆ ନଦୀବନ୍ଧ

ପିପିଲି : ଗଙ୍ଗୁଆର ବିରାଟ ନଦୀ ବନ୍ଧ ଆଉ ନାହିଁ। ଦୟାନଦୀକୁ ସଂଯୋଗ କରୁଥିବା ଗଙ୍ଗୁଆ ନଦୀବନ୍ଧକୁ ମାଟି ମାଫିଆମାନେ ତାଡ଼ି ନେଇଛନ୍ତି। ପ୍ରାୟ ୪ କୋଟିରୁ ଅଧିକ ଟଙ୍କାର ମାଟି ଲୁଟି ନେଇଛନ୍ତି ବୋଲି ଆକଳନ କରାଯାଇଛି। ରାତିସାରା ଏକାଧିକ ଜେସିବିରେ ବନ୍ଧ ତାଡ଼ି ଏମାନେ ହାଇୱା ଆଦି ବଡ଼ ଗାଡ଼ିରେ ବାହାରକୁ ମାଟି ଚାଲାଣ କରୁଛନ୍ତି। କିଛି ଅସାଧୁ ପ୍ରଶାସନିକ ଓ ପୁଲିସ ଅଧିକାରୀଙ୍କ ସହଯୋଗରେ ସେମାନେ ଏହି କାର୍ଯ୍ୟ କରୁଥିବା ସ୍ଥାନୀୟ ଲୋକେ କହିଛନ୍ତି।

ହାଇୱାରେ ମାଟି ଟ୍ରିପ୍‌ ୫ରୁ ୬ହଜାର ଟଙ୍କା ଲେଖାଏଁ ଏମାନେ ବିକ୍ରି କରୁଛନ୍ତି। ମାଟି ମାଫିଆମାନେ ସ୍ଥାନୀୟ ଅଂଚଳରୁ ପ୍ରାୟ ୪ କୋଟିରୁ ଅଧିକ ଟଙ୍କାର ମାଟି ଲୁଟି ନେଲେଣି ବୋଲି କୁହାଯାଉଛି। ଦୟାନଦୀ ବନ୍ଧରେ ପ୍ରତିଦିନ ଟ୍ରାକ୍ଟର, ୧୦ଚକିଆ ଓ ୧୬ଚକିଆ ହାଇୱା ମାଟି ଲୋଡ୍‌ କରି ଚଳପ୍ରଚଳ କରିବା ଫଳରେ କାକୁଡ଼ିଆ ଅରାଗଡ଼ ଦନୀବନ୍ଧ କେତେକ ସ୍ଥାନରେ ଦବି ଫାଟି ଗଲାଣି।

ସେହିପରି ମାଟି ମାଫିଆମାନେ ଦୟାନଦୀ ପାର୍ଶ୍ବରୁ ମାଟି ଖୋଳି ପ୍ରାୟ ୫ଫୁଟରୁ ଅଧିକ ଖାଲ କରିବା ଫଳରେ ସ୍ଥାନୀୟ ଗାଁମାନଙ୍କ ପ୍ରତି ବିପଦ ସୃଷ୍ଟି ହୋଇଛି। ବନ୍ୟା ଓ ବର୍ଷାରେ ଏହି ନଦୀବନ୍ଧ ଭାଙ୍ଗିବା ଆଶଙ୍କା ଦେଖାଦେଇଛି। ଏନେଇ ସ୍ଥାନୀୟ ଅଂଚଳବାସୀ ଚିନ୍ତିତ ଅଛନ୍ତି।