ବିରୋଧୀଙ୍କ ହଙ୍ଗାମା ପ‌ରେ ଅପରାହ୍ନ ୪ଟା ଯାଏଁ ଗୃହ ମୁଲତବୀ ରଖିଲେ ବାଚସ୍ପତି

ଶାସକ ବିଜେଡି ମମିତା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କ ଓକିଲ ମୋହନଲାଲ ଶର୍ମାଙ୍କ ଫଟୋ ପୋଷ୍ଟର ବିଧାନସଭା ଭିତରେ ଦେଖାଇଥିଲା । ମୋହନଲାଲ ବିଜେପିର ବଡ ବଡ ନେତାଙ୍କ ସହ ବସି ଫଟୋ ଉଠାଇଥିବାର ଫଟୋ ଦେଖିବାକୁ ମିଳିଥିଲା । ଗୋଟିଏ ପଟେ ମମିତାର ଅଭିଯୁକ୍ତଙ୍କୁ ଦଣ୍ଡ ଦେବାକୁ ଦାବି କରି ବିରୋଧୀ ବିଧାନସଭା ଚଲାଇ ଦେଉନଥିବା ବେଳେ ଅନ୍ୟପଟେ ଅଭିଯୁକ୍ତ ଗୋବିନ୍ଦ ସାହୁଙ୍କୁ ଜାମିନରେ ଆଣିବାକୁ ବିଜେପି ନେତା ମୋହନଲାଲ ଶର୍ମା ଉଦ୍ୟମ କରୁଥିବା ଅଭିଯୋଗ କରିଛି ବିଜେଡି । ଏପରିକି ଏହାର ପ୍ରମାଣ ମଧ୍ୟ ଗତକାଲି ସାମ୍ବାଦିକ ସମ୍ମିଳନୀରେ ରଖିଥିଲା ବିଜେଡି । ମମିତା ପ୍ରସଙ୍ଗରେ ବିଜେପି କୁମ୍ଭୀର କାନ୍ଦଣା କାନ୍ଦୁଛି ବୋଲି ବିଜେଡି କହିଛି । କାରଣ ମମିତା ପାଇଁ ବିଜେପି ଗୋଟିଏ ପଟେ ଲଢେଇ କରୁଥିବା କହୁଥିବା ବେଳେ ଅନ୍ୟପଟେ ଅଭିଯୁକ୍ତଙ୍କୁ ସୁରକ୍ଷା ଦେବାକୁ ବିଜେପି ନେତା ଆଗେଇ ଆସୁଥିବା ଦଳର ଦୋମୁହାଁ ନୀତିକୁ ପଦାରେ ପକାଇଛି ବୋଲି ବିଜେଡି କହିଛି । ତେବେ ବାରମ୍ବାର ଗୃହ ମୁଲତବୀ ହେଉଥିବା କାରଣରୁ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଆଲୋଚନା ହୋଇପାରୁନି । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି ।