ଭବାନୀପାଟଣାରେ ସ୍ୱତନ୍ତ୍ର ଶ୍ରମିକ ଟ୍ରେନ ପହଞ୍ଚିଲା, ଗୋଆରୁ ୧୬୩୭ ଜଣ ଶ୍ରମିକ ଆସିଲେ

ଭବାନୀପାଟଣା : ଗୋଆର କରମାଲି ଷ୍ଟେସନରୁ ୧୬୩୭ ଜଣ ପ୍ରବାସୀ ଓଡ଼ିଆଙ୍କୁ ନେଇ ଆସୁଥିବା ଏକ ସ୍ୱତନ୍ତ୍ର ଶ୍ରମିକ ଟ୍ରେନ ଆଜି ଅପରାହ୍ନ ୩.୪୦ରେ ଭବାନୀପାଟଣା ଷ୍ଟେସନ ରେ ପହଁଚିଥିଲା। ଏ ନେଇ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଥିଲା। ଶ୍ରମିକଙ୍କ ପଞ୍ଜିକରଣ, ଥର୍ମାଲ ସ୍କ୍ରିନିଂ କରାଯିବା ସହିତ ଭୋଜନର ବ୍ୟବସ୍ଥା କରାଯାଇଥିଲା।

ଏହି ଟ୍ରେନରେ ଅନୁଗୁଳ ଜିଲ୍ଲାର ୩ ଜଣ, ବଲାଙ୍ଗୀର ଜିଲ୍ଲାର ୨୫ ଜଣ, ବାଲେଶ୍ଵର ଜିଲ୍ଲାର ୩୩୬ ଜଣ, ବରଗଡ଼ ଜିଲ୍ଲାର ୩ ଜଣ, ଭଦ୍ରକ ଜିଲ୍ଲାର ଜଣେ, ବୌଦ୍ଧ ଜିଲ୍ଲାର ୮ ଜଣ, କଟକ ଜିଲ୍ଲାର ୧୪ ଜଣ, ଦେବଗଡ଼ ର ଜଣେ, ଢେଙ୍କାନାଳ ଜିଲ୍ଲାର ୧୪ ଜଣ, ଗଜପତି ଜିଲ୍ଲାର ୧୬ ଜଣ, ଗଞ୍ଜାମ ଜିଲ୍ଲାର ୩୯ ଜଣ, ଜଗତସିଂହପୁର ଜିଲ୍ଲାର ଜଣେ, ଯାଜପୁର ଜିଲ୍ଲାର ୧୦ ଜଣ, ଝାରସୁଗୁଡା ଜିଲ୍ଲାର ୮ ଜଣ, କଳାହାଣ୍ଡି ଜିଲ୍ଲାର ସର୍ବାଧିକ ୭୯୨ ଜଣ ,କନ୍ଧମାଳ ଜିଲ୍ଲାର ୪୮ ଜଣ, କେନ୍ଦ୍ରାପଡ଼ା ଜିଲ୍ଲାର ୫ ଜଣ, କେନ୍ଦୁଝର ଜିଲ୍ଲାର ଜଣେ, ଖୋର୍ଦ୍ଧା ଜିଲ୍ଲାର ୬ ଜଣ, ମାଲକାନଗିରି ଜିଲ୍ଲାର ୧୨ ଜଣ, ମୟୁରଭଞ୍ଜ ଜିଲ୍ଲାର ୩୨ ଜଣ, ନବରଙ୍ଗପୁର ଜିଲ୍ଲାର ୬୧ ଜଣ, ନୟାଗଡ଼ ଜିଲ୍ଲାର ୨ ଜଣ, ନୂଆପଡା ଜିଲ୍ଲାର ୮୬ ଜଣ, ପୁରୀ ଜିଲ୍ଲାର ୭ ଜଣ, ରାୟଗଡା ଜିଲ୍ଲାର ୧୧ ଜଣ, ସମ୍ବଲପୁର ଜିଲ୍ଲାର ୨ ଜଣ, ସୁବର୍ଣ୍ଣପୁର ଜିଲ୍ଲାର ୬ ଜଣ, ସୁନ୍ଦରଗଡ ଜିଲ୍ଲାର ୮୭ ଜଣ ସମେତ ୧୬୩୭ ଜଣ ପ୍ରବାସୀ ଏହି ଟ୍ରେନ ଯୋଗେ ଆସିଥିଲେ। ବଲାଙ୍ଗୀର ଠାରେ ପ୍ରାୟ ୩୦୦ ଜଣ ଶ୍ରମିକ ଓହ୍ଲାଇ ଥିଲେ। ସେମାନଙ୍କୁ ବସ ଯୋଗେ ବିଭିନ୍ନ ଜିଲ୍ଲାକୁ ପଠାଯିବାର ବ୍ୟବସ୍ଥା କରାଯାଇଥିଲା।

କରୋନା ସଂକ୍ରମଣକୁ ଏଡ଼ାଇବା ନେଇ ଗତକାଲି ରାତି ୧୨ଟା ରୁ ଆଜି ସନ୍ଧ୍ୟା ୬ଟା ପର୍ଯ୍ୟନ୍ତ ୧୪୪ ଧାରା ଜାରି କରାଯାଇଥିଲା । କିନ୍ତୁ ଟ୍ରେନ ଆସିବା ବିଳମ୍ବ ହେବା ଯୋଗୁଁ ଆଜି ୨୫ ମେ ସନ୍ଧ୍ୟା ୬ ଟାରୁ ଆସନ୍ତା କାଲି ମେ ୨୬ ସକାଳ ୬ ଟା ପର୍ଯ୍ୟନ୍ତ ୧୪୪ ଧାରା ଜାରି ସମୟସୀମାକୁ ବୃଦ୍ଧି କରାଯାଇଛି । ପୁଲିସ ପକ୍ଷରୁ ବ୍ୟାପକ ଫୋର୍ସ ମୁତୟନ କରାଯାଇଥିଲା। ଭବାନୀପାଟଣା ରେଳ ଷ୍ଟେସନ ଠାରେ ୨୦ଟି କାଉଣ୍ଟରରେ ୬୦ ରୁ ଉର୍ଦ୍ଧ୍ବ କର୍ମଚାରୀ ନିୟୋଜିତ ଥିଲେ। ସ୍ୱାସ୍ଥ୍ୟ ବିଭାଗ ପକ୍ଷରୁ ମଧ୍ୟ ସ୍ୱତନ୍ତ୍ର କାଉଣ୍ଟର ଖୋଲା ଯାଇଥିଲା।