ଜୁଲାଇ ୩୧ ଯାଏ ଚାଲିବ ସ୍ୱତନ୍ତ୍ର ଟ୍ରେନ୍
ଯାତ୍ରୀ ନ ହେବାରୁ ୩ ଟ୍ରେନ୍ ସପ୍ତାହକୁ ୩ ଥର ଚାଲିବ
ଭୁବନେଶ୍ବର : ପୂର୍ବତଟ ରେଳପଥ ପକ୍ଷରୁ ଓଡ଼ିଶା ଭିତରେ ଚାଲୁଥିବା ଟ୍ରେନ୍ଗୁଡ଼ିକ ଜୁଲାଇ ୩୧ ପର୍ଯ୍ୟନ୍ତ ଜାରି ରହିବ। ତେବେ ପୂର୍ବ ନିଷ୍ପତ୍ତିରେ କେତେକ ପରିବର୍ତନ କରାଯାଇଛି। ଯାତ୍ରୀ ହେଉ ନ ଥିବାରୁ ୩ଟି ଟ୍ରେନ୍ ସପ୍ତାହକୁ ୫ ଦିନ ବଦଳରେ ୩ ଦିନ ଚଲାଇବାକୁ ସ୍ଥିର ହୋଇଛି। ବାକି ଦୁଇଟି ଟ୍ରେନ୍ ପୂର୍ବଭଳି ଚାଲିବ ବୋଲି ପୂର୍ବତଟ ରେଳପଥ ପକ୍ଷରୁ ଆଜି ସୂଚନା ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ସମ୍ବଲପୁର-ଖୋର୍ଦ୍ଧାରୋଡ-ସମ୍ବଲପୁର ସ୍ୱତନ୍ତ୍ର ଟ୍ରେନ୍ ଏଣିକି ୫ ଦିନ ବଦଳରେ ସୋମବାର, ବୁଧବାର ଓ ଶୁକ୍ରବାର ଚଳାଚଳ କରିବ। ଉକ୍ତ ତିନି ଦିନ ସକଳ ୬ଟାରେ ସମ୍ବଲପୁରରୁ ଓ ଅପରାହ୍ନ ୪ଟା ୫୫ରେ ଖୋର୍ଧାରୋଡରୁ ଛାଡ଼ିବ। ଭୁବନେଶ୍ୱର-ବଲାଙ୍ଗୀର-ଭୁବନେଶ୍ୱର ସ୍ୱତନ୍ତ୍ର ଟ୍ରେନ୍ ପୂର୍ବଭଳି ୫ ଦିନ ଚାଲିବ। ତେବେ ଶନିବାର ଓ ରବିବାର ଚାଲିବ ନାହିଁ। ଭୁବନେଶ୍ୱର-ଭଦ୍ରକ-ଭୁବନେଶ୍ୱର ସ୍ୱତନ୍ତ୍ର ଟ୍ରେନ୍ ସପ୍ତାହକୁ ୫ ଦିନ ବଦଳରେ ୩ ଦିନ ଚାଲିବ। ଜୁଲାଇ ୩୦ ପର୍ଯ୍ୟନ୍ତ ସୋମବାର, ବୁଧବାର ଓ ଗୁରୁବାର ସନ୍ଧ୍ୟା ୬ଟାରେ ଭୁବନେଶ୍ବରରୁ ଛାଡ଼ିବ। ଜୁଲାଇ ୩୧ ପର୍ଯ୍ୟନ୍ତ ମଙ୍ଗଳବାର, ଗୁରୁବାର ଓ ଶୁକ୍ରବାର ଅପରାହ୍ନ ୫ଟା ୩୦ରେ ଭଦ୍ରକରୁ ଛାଡ଼ିବ। ଜୁଲାଇ ୧ରେ ଭଦ୍ରକରୁ ଏହି ଟ୍ରେନ୍ ଚାଲିବ ନାହିଁ ବୋଲି ସ୍ପଷ୍ଟ କରାଯାଇଛି।
ଭୁବନେଶ୍ୱର-ବ୍ରହ୍ମପୁର-ଭୁବନେଶ୍ୱର ସ୍ୱତନ୍ତ୍ର ଟ୍ରେନ୍ ମଧ୍ୟ ସପ୍ତାହକୁ ୩ ଥର ଚାଲିବ। ଜୁଲାଇ ୩୦ ଯାଏ ପ୍ରତି ସୋମବାର, ବୁଧବାର ଓ ଗୁରୁବାର ଅପରାହ୍ନ ୫ଟା ୩୦ରେ ଏହି ଟ୍ରେନ୍ ଭୁବନେଶ୍ବରରୁ ଛାଡ଼ିବାକୁ ଥିବା ବେଳେ ଜୁଲାଇ ୩୧ ପର୍ଯ୍ୟନ୍ତ ପ୍ରତି ମଙ୍ଗଳବାର, ଗୁରୁବାର ଓ ଶୁକ୍ରବାର ସକାଳ ୭ଟାରେ ବ୍ରହ୍ମପୁରରୁ ଛାଡ଼ିବ। ଜୁଲାଇ ୧ରେ ବ୍ରହ୍ମପୁରରୁ କୌଣସି ଟ୍ରେନ୍ ଛାଡ଼ିବ ନାହିଁ। ଭୁବନେଶ୍ୱର-କୋରାପୁଟ-ଭୁବନେଶ୍ୱର ସ୍ୱତନ୍ତ୍ର ଟ୍ରେନ୍(ଭାୟା କଟକ-ଅନୁଗୁଳ, ସମ୍ବଲପୁର-ଟିଟିଲାଗଡ଼-ରାୟଗଡ଼ା) ସପ୍ତାହକୁ ୩ ଥର ଚାଲିବ। ପ୍ରତି ସୋମବାର, ବୁଧବାର ଓ ଶୁକ୍ରବାର ଅପରାହ୍ନ ୬ଟା ୩୦ରେ ଭୁବନେଶ୍ବରରୁ ଛାଡ଼ିବ ଏବଂ ମଙ୍ଗଳବାର, ଗୁରୁବାର ଓ ରବିବାର ଅପରାହ୍ନ ୫ଟା ୩୦ରେ କୋରାପୁଟରୁ ଭୁବନେଶ୍ବର ଅଭିମୁଖେ ଛାଡ଼ିବ।