ରାଜ୍ୟ ଅମିନ ସଂଘର ନିଷ୍ପତ୍ତି: ୧ ତାରିଖରୁ କଳାବ୍ୟାଜ୍ ପିନ୍ଧିବେ ଓ ୧୧ ତାରିଖରେ ରାଲି
ଖୋର୍ଦ୍ଧା: ଖୋର୍ଦ୍ଧା ଠାରେ ରାଜ୍ୟ ଅମିନ ସଂଘର ଏକ ରାଜ୍ୟସ୍ତରୀୟ ବୈଠକ ଶନିବାର ଅନୁଷ୍ଠିତ ହୋଇଯାଇଛି । ବୈଠକରେ ପଦୋନ୍ନତି ଓ ଦରମାବୃଦ୍ଧିରେ ରାଜ୍ୟ ସରକାରଙ୍କ ଟାଳଟୁଳ ନୀତି ବିରୋଧରେ ଡିସେମ୍ବର ୧ ତାରିଖରୁ କଳାବ୍ୟାଜ୍ ପିନ୍ଧି ପ୍ରତିବାଦ କରିବା ସହ ୧୧ ତାରିଖରେ ଭୁବନେଶ୍ୱରେ ଏକ ପ୍ରତିବାଦ ରାଲି ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ସ୍ଥାନୀୟ ଜୟୀ ରାଜଗୁରୁ ଭବନ ଠାରେ ଅନୁଷ୍ଠିତ ବୈଠକରେ ସଂଗଠନର ରାଜ୍ୟ ସଭାପତି ମନୋଜ କୁମାର ଦାସ ଅଧ୍ୟକ୍ଷତା କରିଥିଲେ । ଖୋର୍ଦ୍ଧା ଜିଲ୍ଲା ସଂଗଠନର ସମ୍ପାଦକ ଦେବୀ ପ୍ରସାଦ ସାହୁ କାର୍ଯ୍ୟକ୍ରମର ସଂଯୋଜନା କରିଥିଲେ । ବୈଠକରେ ୩୦ଟି ଜିଲ୍ଲାର ୨ଶହରୁ ଉଦ୍ଧ୍ୱର୍ ରାଜସ୍ୱ ବିଭାଗର ଅମିନ ଯୋଗ ଦେଇଥିଲେ । ଏଥିରେ ୪ଟି ପ୍ରମୁଖ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା । ଗ୍ରେଡ୍ ପେ ୧୮ଶହରୁ ୨୮ଶହ କରିବା, ଅମିନଙ୍କ ସପକ୍ଷରେ ଏଲ୍ଆର୍ଏମ୍ଏସ୍ ଓ ଭୂନ୍କ୍ସା ଆଇଡି ପ୍ରଦାନ କରିବା, ସରକାରୀ ଅମିନଙ୍କ ନାମ ପରିବର୍ତନ କରି ଭୂ ନିରୀକ୍ଷକ ରଖିବା, ଶିକ୍ଷାଗତ ଯୋଗ୍ୟତା ଯୁକ୍ତ ଦୁଇରୁ ଯୁକ୍ତ ତିନିକୁ ବୃଦ୍ଧି କରିବା ।
ସଂଗଠନର ସଭାପତି ଶ୍ରୀ ଦାସ କହିଛନ୍ତି ଏହି ଦାବିଗୁଡ଼ିକ ସହ ପଦୋନ୍ନତି, ଜବ୍ ଚାର୍ଟ ପ୍ରକାଶ ଆଦି ନେଇ ପୂର୍ବେ ଅନେକ ଥର ରାଜସ୍ୱ ବିଭାଗର ସଚିବ ଓ ଅନ୍ୟ ବରିଷ୍ଠ ପଦାଧିକାରୀଙ୍କ ସହ ଆଲୋଚନା କରାଯାଇଥିଲା । ଆଲୋଚନାରେ ଦାବି ପୂରଣର ପ୍ରତିଶ୍ରୁତି ମଧ୍ୟ ମିଳିଥିଲା, କିନ୍ତୁ କୌଣସି ପ୍ରତିଶ୍ରୁତି ପାଳନ ହୋଇନାହିଁ । ଏହାର ପ୍ରତିବାଦ କାର୍ଯ୍ୟକ୍ରମରେ, ଡିସେମ୍ବର ୧ ତାରିଖରୁ ରାଜ୍ୟର ସମସ୍ତ ଅମିତ କାର୍ଯ୍ୟରେ ଯୋଗଦେବେ ଅଥଚ କଳାବ୍ୟାଜ୍ ପିନ୍ଧି ପ୍ରତିବାଦ ଜଣାଇବେ । ଏହାସତ୍ୱେ ସେମାନଙ୍କ ଦାବି ପୂରଣ ନହୁଏ ତେବେ ୧୧ ତାରିଖରେ ରାଜଧାନୀ ଭୁବନେଶ୍ୱରରେ ଏକ ବିଶାଳ ରାଲିର ଆୟୋଜନ କରିବେ ।