ଭୁବନେଶ୍ବର: ୨୦୧୮-୧୯ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟର ଋଣ ଭାର ରହିଛି ୭୯,୮୬୬.୦୮ କୋଟି ଟଙ୍କା। ଚଳିତ ଆର୍ଥିକ ବର୍ଷରେ ରାଜ୍ୟ ସରକାର ୨୩,୫୮୪ କୋଟି ଟଙ୍କା ଋଣ କରିବାକୁ ଓ ୪,୭୦୭ କୋଟି ଟଙ୍କା ସୁଝିବାକୁ ଲକ୍ଷ୍ୟ ରଖିଛନ୍ତି। ତେଣୁ ଚଳିତ ବର୍ଷର ନିଟ୍ ହିସାବରେ ୧୮,୮୭୭ କୋଟି ଟଙ୍କା ଋଣ କରାଯିବାର ଆକଳନ କରାଯାଇଛି। ବିଧାନସଭାରେ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ ଆଜି ଏହି ପ୍ରଶ୍ନ କରିଛନ୍ତି। ତାରାପ୍ରସାଦ ବାହିନୀପତି ଓ ଶଙ୍କର ଓରାମଙ୍କ ପୃଥକ ପୃଥକ ପ୍ରଶ୍ନରେ ମନ୍ତ୍ରୀ ଋଣ ସମ୍ପର୍କିତ ତଥ୍ୟ ପ୍ରଦାନ କରିଛନ୍ତି। ମନ୍ତ୍ରୀଙ୍କ ସୂଚନା ଅନୁଯାୟୀ ରାଜ୍ୟ ସରକାରଙ୍କ ନିଜସ୍ବ ଘରୋଇ ଉତ୍ପାଦର କେନ୍ଦ୍ର ସରକାରଙ୍କ ସ୍ଥିରୀକୃତ ୩.୫% ମଧ୍ୟରେ ଋଣ କରୁଛନ୍ତି। ଭାରତ ସରକାରଙ୍କ ଠାରୁ ୭୮୩୬.୫୪ କୋଟି, ଜାତୀୟ ସ୍ବଳ୍ପ ସଞ୍ଚୟ ପାଣ୍ଠିରୁ ୯୧୭୨.୯୯ କୋଟି, ଖୋଲା ବଜାରରୁ ୨୮୦୩୦.୯୦ କୋଟି, ଭାରତୀୟ କୃଷି ଓ ଗ୍ରାମ୍ୟ ଉନ୍ନୟନ ବ୍ୟାଙ୍କରୁ ୧୩,୦୯୨.୨୯ କୋଟି, ଜୀବନ ବୀମା ନିଗମରୁ ୦.୪୭ କୋଟି, ସାଧାରଣ ବୀମା ନିଗମରୁ ୬.୩୬ କୋଟି, ଜାତୀୟ ସମବାୟ ଉନ୍ନୟନ ନିଗମରୁ ୭.୩୦ କୋଟି, ଗ୍ରାମ୍ୟ ବିଦ୍ୟୁତିକରଣ ନିଗମ ଓ ଅନ୍ୟାନ୍ୟ ଉତ୍ସରୁ ୧୧୦.୭୧ କୋଟି ଏବଂ ଭବିଷ୍ୟନିଧି ପାଣ୍ଠିରୁ ୨୧,୬୦୮.୫୨ କୋଟି ଟଙ୍କା ଋଣ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ମନ୍ତ୍ରୀ ଆହୁରି ସୂଚନା ଦେଇଛନ୍ତି, ୨୦୧୮-୧୯ ଆର୍ଥିକ ବର୍ଷ ଶେଷରେ ରାଜ୍ୟର ମୁଣ୍ଡପିଛା ଋଣ ଭାର ୧୭,୬୩୦.୪୮ ଟଙ୍କା ଅଟେ। ଆମ ରାଜ୍ୟର ମୁଣ୍ଡପିଛା ଋଣ ଜାତୀୟ ତଥା ଅଧିକାଂଶ ରାଜ୍ୟର ମୁଣ୍ଡପିଛା ଋଣ ତୁଳନାରେ ଯଥେଷ୍ଟ କମ୍।