ଝିଅଙ୍କୁ ହଇରାଣ କଲେ ପୁଲିସ୍ ପଠାଇବ ନାଲିକାର୍ଡ, ସ୍ବତନ୍ତ୍ର ଆଇନ ବଳରେ ବର୍ଷେ ପାଇଁ ଯୁବକଙ୍କୁ କରାଯିବ ତଡ଼ିପାର
ମହିଳା ସଶକ୍ତିକରଣକୁ କମିଶନରେଟ୍ ପୁଲିସର ଗୁରୁତ୍ୱ
ଭୁବନେଶ୍ବର: ଏଣିକି ମହିଳାଙ୍କୁ କମେଣ୍ଟ କିମ୍ବା ହଇରାଣ ହରକତ କଲେ ଆଉ ନିସ୍ତାର ପାଇବେନି ରୋଡ୍ ରୋମିଓ। ଅଭିଯୋଗରେ ସତ୍ୟତା ଥିଲେ ଉକ୍ତ ଯୁବକଙ୍କୁ ବର୍ଷେ ପାଇଁ ତଡ଼ିପାର କରାଯିବ । ଆଜି କମିସନରେଟ୍ ପୁଲିସର ୧୨ତମ ପ୍ରତିଷ୍ଠା ଦିବସ ଅବସରରେ ମହିଳାଙ୍କ ସୁରକ୍ଷାକୁ ଅଧିକ ଗୁରୁତ୍ୱ ଦେଇ ଏଭଳି ଏକ କଠୋର ନିଷ୍ପତ୍ତି ଶୁଣାଇଛନ୍ତି ପୁଲିସ୍ କମିସନର ସୁଧାଂଶୁ ଷଡଙ୍ଗୀ।
Sambad is now on WhatsApp
Join and get latest news updates delivered to you via WhatsApp
ଏଥିପାଇଁ କମିସନରେଟ୍ ପୁଲିସ୍ ପକ୍ଷରୁ ସାଧାରଣ ମହିଳାଙ୍କୁ ନେଇ ଏକ ସ୍ବତନ୍ତ୍ର ପୁଲିସ ଅଫିସର ବା ଏସପିଓ ଭାବେ ନିଯୁକ୍ତି ଦିଆଯାଇଛି। ଯେଉଁଥିରେ ପାଖାପାଖି ୨୪୬ଜଣ ମହିଳା ସାମିଲ ହୋଇଛନ୍ତି। ତେବେ ବଡ଼ କଥା ହେଉଛି, ଏହି ଏସପିଓମାନେ ପୁଲିସକୁ ସବୁପ୍ରକାରର ସୂଚନା ଦେବେ। ଏପରିକି ସେମାନେ ଚାହିଁଲେ ଅଭିଯୁକ୍ତଙ୍କୁ ଗିରଫ ମଧ୍ୟ କରିପାରିବେ। ଏଥିପାଇଁ ଏମାନଙ୍କୁ ସାମିୟକ ଭାବେ ୩ମାସ ପାଇଁ ନିଯୁକ୍ତି ଦିଆଯାଇଛି। କାହାକୁ ସୁରକ୍ଷା ଦରକାର, କେଉଁଠି ମହିଳାଙ୍କ ଉପରେ ଅତ୍ୟାଚାର ହେଉଛି ଏସବୁ ଦିଗରେ କଡ଼ା ନଜର ରଖିବେ ଏସପିଓର ସଦସ୍ୟମାନେ।
ସେହିଭଳି ଯଦି କୌଣସି ଯୁବକ ଝିଅମାନଙ୍କୁ କମେଣ୍ଟ ବା ହଇରାଣ ହରକତ କରୁଥିବାର ନଜର ଆସନ୍ତି ତେବେ ତାକୁ ଏକ ନାଲିକାର୍ଡ ନୋଟିସ କରାଯିବା ସହ ଉକ୍ତ ଯୁବକର ଅଭିଭାବକ କିମ୍ବା ଓକିଲ ଏବାବଦରେ ଉତ୍ତର ରଖିବାକୁ ନିର୍ଦ୍ଦେଶ ଦିଆଯିବ। ଆଉ ଯଦି ସେମାନଙ୍କ ଉତ୍ତର ସନ୍ତୋଷଜନକ ନହୁଏ ତେବେ ଉକ୍ତ ଯୁବକ ଜଣକ ଯେଉଁ ଜାଗାରେ ମହିଳାଙ୍କୁ ହଇରାଣ ବା କମେଂଟ ମାରୁଥିଲେ ସେଠାରୁ ତାଙ୍କୁ ସ୍ବତନ୍ତ୍ର ଆଇନ ବଳରେ ବର୍ଷେ ଯାଏଁ ନ ଆସିବାକୁ ନିର୍ଦ୍ଦେଶ ଦିଆଯିବ ବା ବର୍ଷେ ପାଇଁ ଉକ୍ତ ସ୍ଥାନରୁ ତଡ଼ିପାର କରାଯିବ ବୋଲି କହିଛନ୍ତି ପୁଲିସ୍ କମିସନର ସୁଧାଂଶୁ ଷଡଙ୍ଗୀ।