ଝାରସୁଗୁଡ଼ା : ସଂପ୍ରତି ହୃଦ୍ରୋଗରେ ଅନେକ ଲୋକଙ୍କ ମୃତ୍ୟୁ ଘଟୁଛି। ଏହି ଚିକିତ୍ସାରେ ବହୁ ଅର୍ଥ ଖର୍ଚ୍ଚ ହେଉଥିବାରୁ ପଶ୍ଚିମ ଓଡ଼ିଶା ଭଳି ଅଞ୍ଚଳର ଲୋକେ ଚିକିତ୍ସା ଖର୍ଚ୍ଚ ଭରଣ କରିବାରେ ଅସମର୍ଥ ହୋଇ ପଡ଼ୁଛନ୍ତି। ଏହା ସହିତ ହୃଦ୍ରୋଗର ଚିକିତ୍ସା ପାଇଁ ଏଠାରେ କୌଣସି ସୁବିଧା ମଧ୍ୟ ନାହିଁ। ପଶ୍ଚିମ ଓଡ଼ିଶାରେ କେଉଁଠି ହାର୍ଟ ହସ୍ପିଟାଲଟିଏ ନାହିଁ। ଭୁବନେଶ୍ବରଠାରେ ଥିବା କିଛି ଘରୋଇ ହସ୍ପିଟାଲ୍କୁ ଛାଡ଼ି ଦେଲେ ରାଜ୍ୟରେ ବି ହାର୍ଟ ଚିକିତ୍ସା ପାଇଁ ସେପରି କିଛି ସୁବିଧା ନାହିଁ। ଏହି ସମସ୍ୟାକୁ ଆଖି ଆଗରେ ରଖି ରାଜ୍ୟର ପ୍ରଥମ ହାର୍ଟ ହସ୍ପିଟାଲ ନିର୍ମାଣ ପାଇଁ ଯୋଜନା କରାଯାଇଥିଲା ଓ ଏହାକୁ ପିପିପି ମୋଡ୍ରେ କରାଯାଇ ରାଜ୍ୟର ବିଭିନ୍ନ ଅଞ୍ଚଳରେ ଲୋକଙ୍କୁ ସୁବିଧା ଯୋଗାଇ ଦେବାର ଉଦ୍ୟମ କରାଯାଇଥିଲା। ଗତ ୨୦୧୮ ମସିହା ଡିସେମ୍ବର ମାସ ୨୫ ତାରିଖ ଦିନ ଏହି ହସ୍ପିଟାଲ୍ର ଶୁଭାରମ୍ଭ କରିଥିଲେ ଝାରସୁଗୁଡ଼ା ବିଧାୟକ ନବ ଦାସ। ଶହେ କୋଟି ଟଙ୍କା ବ୍ୟୟରେ ରାଜ୍ୟର ପ୍ରଥମ ହାର୍ଟ ହସପିଟାଲ ଝାରସୁଗୁଡ଼ାରେ ପ୍ରତିଷ୍ଠା ହେଉଛି। ବାଲିଯୋରିଠାରେ ମୁଖ୍ୟ ଚିକିତ୍ସାଳୟକୁ ଲାଗି ଏହି ହାର୍ଟ ହସ୍ପିଟାଲର ନିର୍ମାଣ କ୍ଷୀପ୍ର ଗତିରେ ଆଗେଇ ଚାଲିଥିଲେ ମଧ୍ୟ ନିର୍ମାଣ ସଂପୂର୍ଣ୍ଣ ପାଇଁ ଥିବା ନିର୍ଦ୍ଧାରିତ ତାରିଖ ଡେଇଁ ଯାଇଛି।
Sambad is now on WhatsApp
Join and get latest news updates delivered to you via WhatsApp
ହାର୍ଟଭଳି ଏକ ମାରାତ୍ମକ ରୋଗର ଚିକିତ୍ସା ବ୍ୟୟ ବହୁଳ ହୋଇଥିବା ବେଳେ ଜରୁରୀ ସମୟରେ ରୋଗୀକୁ ଦୂର ଦୂରାନ୍ତରେ ଥିବା ହସପିଟାଲ୍ରେ ପହଞ୍ଚାଇବା ସମ୍ଭବ ନଥାଏ। ଏଠାରେ ହାର୍ଟ ହସପିଟାଲ୍ ହେଲେ ଏହି ଅଞ୍ଚଳ ସମେତ ସାରା ପଶ୍ଚିମ ଓଡ଼ିଶାର ଲୋକ ଏଠାରେ ଉପକୃତ ହୋଇ ପାରିବେ ବୋଲି କୁହାଯାଉଛି। ଏହି ହାର୍ଟ ହସ୍ପିଟାଲ୍ ପାଇଁ ଏମ୍ସିଏଲ୍ ପକ୍ଷରୁ ଆର୍ଥିକ ସହାୟତା ଯୋଗାଇ ଦିଆଯାଇଥିବା ବେଳେ ଦୁଇ ବର୍ଷ ମଧ୍ୟରେ ଏହି ହସ୍ପିଟାଲ କାର୍ଯ୍ୟକ୍ଷମ ହେବ ବୋଲି ଲକ୍ଷ୍ୟ ରଖାଯାଇଥିଲା। ହସପିଟାଲ୍ କୋଠା ପାଇଁ ୩୨ କୋଟି ୪୨ ଲକ୍ଷ ୭୯୦ ଟଙ୍କା ବ୍ୟୟ ବରାଦ ହୋଇଛି।
ହାଇଦ୍ରାବାଦର ମଞ୍ଜିରା କନ୍ଷ୍ଟ୍ରକସନ୍ ଲିମିଟେଡ଼୍ ସହ ଚୁକ୍ତି ସ୍ବାକ୍ଷରିତ ହୋଇ ୨୦୧୮ ଅଗଷ୍ଟ ୨୮ ତାରିଖରେ କାର୍ଯ୍ୟ ଆରମ୍ଭ ହୋଇଥିଲା। ଏହା ୨୦୨୦ ଅଗଷ୍ଟ ୧୯ ତାରିଖରେ ସଂପୂର୍ଣ୍ଣ ହେବ ବୋଲି ଲକ୍ଷ୍ୟ ରଖାଯାଇଥିଲା। ବୈଷୟିକ ଜ୍ଞାନ କୌଶଳ ଏବଂ ଆବଶ୍ୟକୀୟ ଯନ୍ତ୍ରପାତି ଯୋଗାଇ ଦେବା ସହିତ ପରିଚାଳନା ଭାର ଗ୍ରହଣ କରିବାକୁ କ୍ବାଲିଟି କେୟାର ହସ୍ପିଟାଲ୍ ପ୍ରାଇଭେଟ୍ ଲିମିଟେଡ଼୍ ସହିତ ଚୁକ୍ତି ହୋଇ ସାରିଛି। ତିନି ମହଲା ବିଶିଷ୍ଟ ଏହି କୋଠାରେ ହୃଦ୍ରୋଗୀଙ୍କ ପାଇଁ ଏକଶହ ଶଯ୍ୟା ରହିବ। ରାଜ୍ୟରେ ସ୍ବାସ୍ଥ୍ୟସେବା ବ୍ୟବସ୍ଥା ଯେପରି ସ୍ଥିତିରେ ଅଛି ଏହି ହାର୍ଟ ହସ୍ପିଟାଲ କେତେ ଦୂର ସାଧାରଣ ଲୋକଙ୍କ ସେବାରେ ଆସିବ ତା’ ଉପରେ ଏବେ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। କଂଗ୍ରେସ ବିଧାୟକ ଥିବାବେଳେ ଶ୍ରୀ ଦାସଙ୍କ ଉଦ୍ୟମରେ ଏହି ପ୍ରକଳ୍ପ ଆରମ୍ଭ ହୋଇଥିଲା। ସୌଭାଗ୍ୟକୁ ଶ୍ରୀ ଦାସ ସଂପ୍ରତି ରାଜ୍ୟରେ ସ୍ବାସ୍ଥ୍ୟମନ୍ତ୍ରୀ ଅଛନ୍ତି। ଏହି ବିଭାଗ ଦାୟିତ୍ବ ନେବା ପରେ ନବଙ୍କ ଏହି ଡ୍ରିମ୍ ପ୍ରକଳ୍ପର ନିର୍ମାଣ କାର୍ଯ୍ୟ କିଭଳି ଶୀଘ୍ର ସଂପୂର୍ଣ୍ଣ ହେବ ଓ ହସ୍ପିଟାଲ୍ ଆରମ୍ଭ ହେବ ସେ ନେଇ ସାଧାରଣରେ ଉତ୍ସୁକତା ଦେଖା ଦେଇଛି। ଝାରସୁଗୁଡ଼ାରେ ବିମାନବନ୍ଦର ସୁବିଧା ଉପଲବ୍ଧ ହୋଇଥିବା ବେଳେ ହାତ ପାହାନ୍ତାରେ ହାର୍ଟ ହସପିଟାଲ ଝାରସୁଗୁଡ଼ା ଜିଲ୍ଲାର ଗୁରୁତ୍ବକୁ ଆହୁରି ବୃଦ୍ଧି କରିବ।