ଦୃଢ଼ ଶିକ୍ଷା ବ୍ୟବସ୍ଥା ପ୍ରଗତିଶୀଳ ସମାଜର ମୂଳଦୁଆ: ରାଜ୍ୟପାଳ

ଭୁବନେଶ୍ୱର: ଦୃଢ଼ ଶିକ୍ଷା ବ୍ୟବସ୍ଥା ଏକ ପ୍ରଗତିଶୀଳ ସମାଜର ମୂଳଦୁଆ। ରବିବାର ‘କନକ ନ୍ୟୁଜ୍’ ପକ୍ଷରୁ ଆୟୋଜିତ ଶିକ୍ଷା ସମ୍ମିଳନୀ-୨୦୨୫ ‘ଉତ୍କର୍ଷ’କୁ ଉଦ୍‌ଘାଟନ କରି ରାଜ୍ୟପାଳ ଡ. ହରିବାବୁ କମ୍ଭମ୍‌ପାଟି ଏହା କହିଛନ୍ତି। ସମାରୋହରେ ଉଦ୍‌ବୋଧନ ଦେଇ ରାଜ୍ୟପାଳ କହିଲେ, ଆଜିର ଶିକ୍ଷା ପାଠ୍ୟପୁସ୍ତକ ଓ ଶ୍ରେଣୀଗୃହ ଭିତରେ ସୀମିତ ନ ରହି ବାହାରକୁ ଯିବା ଉଚିତ। ବିଶେଷ କରି ଶିକ୍ଷା ପ୍ରତି ଛାତ୍ରଛାତ୍ରୀଙ୍କ କୌତୁହଳକୁ ଜାଗ୍ରତ କରିବା, ଜୀବନ କୌଶଳ ଶିଖାଇବା ଓ ଭଲ ଚରିତ୍ର ଗଠନରେ ଏହା ସହାୟକ ହେବା ଦରକାର। ଦ୍ରୁତ ପରିବର୍ତ୍ତନଶୀଳ ବିଶ୍ୱରେ ଆମ ଯୁବପିଢ଼ିଙ୍କୁ କେବଳ ଜ୍ଞାନରେ ସୀମିତ ରଖିବା ନାହିଁ। ବରଂ ଭଲ ଭାବେ ବିଚାର କରିବା, ନୂତନ ପରିସ୍ଥିତି ସହ ଖାପ ଖୁଆଇବା ଏବଂ ସାଧାରଣଙ୍କ ହିତ ପାଇଁ ଏକାଠି କାମ କରିବାର କ୍ଷମତା ସହ ସେମାନଙ୍କୁ ପ୍ରସ୍ତୁତ କରିବାକୁ ପଡ଼ିବ। ରାଜ୍ୟପାଳ ଆହୁରି କହିଲେ ଯେ ‘ଉତ୍କର୍ଷ’ କେବଳ ଆଲୋଚନା ପାଇଁ ଏକ ମଞ୍ଚ ନୁହେଁ।

ଏହା ଆମ ଶିକ୍ଷକ ଓ ଶିକ୍ଷାନୁଷ୍ଠାନଗୁଡ଼ିକୁ ଋଦ୍ଧିମନ୍ତ କରିବାର ଏକ ମାଧ୍ୟମ। ସେମାନଙ୍କ ଅବଦାନକୁ ସ୍ୱୀକୃତି ଜଣାଇ ଏବଂ ସଫଳ କାହାଣୀଗୁଡ଼ିକୁ ଆଲୋକପାତ କରି ଏହି ଶିକ୍ଷା ସମ୍ମେଳନ ଅନ୍ୟମାନଙ୍କୁ ପ୍ରେରଣା ଯୋଗାଇବ। କେବଳ ସେତିକି ନୁହେଁ, ଓଡ଼ିଶାରେ ଶିକ୍ଷାର ଭବିଷ୍ୟତ ପାଇଁ ମାର୍ଗ ଉନ୍ମୋଚନ କରିବ। ଶିକ୍ଷା ଓ ଯୁବପିଢ଼ିଙ୍କ ଭବିଷ୍ୟତ ଉପରେ ଆଲୋଚନା ପାଇଁ ଏହା ଏକ ଉକୃଷ୍ଟ ମଞ୍ଚ ପାଲଟିଛି। ଏଭଳି ସମ୍ମିଳନୀ ଆୟୋଜନ କରିବାରେ ‘କନକ ନ୍ୟୁଜ୍‌’ର ପ୍ରୟାସକୁ ରାଜ୍ୟପାଳ ପ୍ରଶଂସା କରିଥିଲେ।

ଉତ୍କର୍ଷର ଉପାସକ ନ ହେଲେ କୌଣସି ଜାତି ଆଗେଇ ପାରିବ ନାହିଁ: ସୌମ୍ୟରଂଜନ
ଆମର ପ୍ରତିଟି କାର୍ଯ୍ୟ ଉତ୍କର୍ଷ ମୁହାଁ ହେବା ଦରକାର: ତନୟା

ଇଷ୍ଟର୍ଣ୍ଣ ମିଡିଆ ଲିମିଟେଡ୍‌ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ସୌମ୍ୟରଂଜନ ପଟ୍ଟନାୟକ ଯୋଗ ଦେଇ କହିଲେ, ଉତ୍କର୍ଷର ଉପାସକ ନ ହେଲେ କୌଣସି ଜାତି ଆଗେଇପାରିବ ନାହିଁ। ସେଥିପାଇଁ ଆମକୁ ପ୍ରତିଟି କ୍ଷେତ୍ରରେ ଉତ୍କର୍ଷତା ହାସଲ କରିବାକୁ ପଡ଼ିବ। ଏହା ହୋଇପାରିଲେ ଦେଶର ପ୍ରଗତି ଓ ସମୃଦ୍ଧି ତ୍ୱରାନ୍ୱିତ ହେବ। ଏବେ ଚାଲିଥିବା ପ୍ରତିଯୋଗିତାରେ ସମସ୍ତେ ଉପରକୁ ଉଠିବାକୁ ଚାହୁଛନ୍ତି। ତେଣୁ ଛାତ୍ରଛାତ୍ରୀ ଚଳେଇନେବା ମନୋବୃତ୍ତିରୁ ନିବୃତ୍ତ ରୁହନ୍ତୁ ଏବଂ ନିଜ ଅପେକ୍ଷା ଏ ଜାତି, ସମାଜ କଥା‌ ମଧ୍ୟ ଚିନ୍ତା କରନ୍ତୁ।

‘କନକ ନ୍ୟୁଜ୍‌’ ଓ ‘ସମ୍ବାଦ’ ସମ୍ପାଦକ ତନୟା ପଟ୍ଟନାୟକ ସ୍ୱାଗତ ଭାଷଣ ଦେଇ କହିଲେ, ଆମର ପ୍ରତିଟି କାର୍ଯ୍ୟ ଉତ୍କର୍ଷମୁହାଁ ହେବା ଦରକାର। ଏଥିସହ ଦେଶ ପ୍ରତି ସେବା ମନସ୍କ ହେବାକୁ ସେ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ। ଏହି ଅବସରରେ ମାଟ୍ରିକ୍‌ ପରୀକ୍ଷାରେ ଶ୍ରେଷ୍ଠତ୍ବ ହାସଲ କରିଥିବା ବ୍ରହ୍ମପୁର ନୀଳକଣ୍ଠନଗର ସରସ୍ବତୀ ଶିଶୁ ବିଦ୍ୟାମନ୍ଦିରର ଅର୍ପିତା ଆଚାର୍ଯ୍ୟ, ମାଲକାନଗିରିଜିଲ୍ଲା ସାବେରୀ ସରକାରୀ ଉଚ୍ଚବିଦ୍ୟାଳୟର ଛାତ୍ର ଡାନିଏଲ୍‌ ଲେଙ୍କା ଓ ଡମ୍ବରୁ ଲେଙ୍କା, ଭୁବନେଶ୍ବର ବଡ଼ଗଡ଼ ଶିଶୁ ବିଦ୍ୟାମନ୍ଦିରର ଛାତ୍ର ସୌରଜିତ୍‌ ପ୍ରଧାନଙ୍କ ସମେତ ବିଭିନ୍ନ ଶିକ୍ଷାନୁଷ୍ଠାନର କର୍ମକର୍ତ୍ତାଙ୍କୁ ରାଜ୍ୟପାଳ ସମ୍ବର୍ଦ୍ଧିତ କରିଥିଲେ।