ଛାତ୍ରୀଙ୍କୁ ଦୁର୍ବ୍ୟବହାର, ପ୍ରଧାନଶିକ୍ଷକ ଗିରଫ

ଘଟଗାଁ : ପଞ୍ଚମ ଶ୍ରେଣୀ ଛାତ୍ରୀଙ୍କୁ ଦୁର୍ବ୍ୟବହାର ଘଟଣାରେ ଘଟଗାଁ ବ୍ଲକ୍‌ ଉପରଡିହା ପଞ୍ଚାୟତ ବାଲିଯୋଡ଼ି ୟୁଜିୟୁପି ସ୍କୁଲର ନିଲମ୍ବିତ ପ୍ରଧାନଶିକ୍ଷକ ସୁଧାଂଶୁ ଶେଖର ମହାନ୍ତି ଗିରଫ ‌ହୋଇଛନ୍ତି। ଛାତ୍ରୀ ଜଣଙ୍କ ବିଦ୍ୟାଳୟର ସ୍ବଳ୍ପବ୍ୟୟ ଛାତ୍ରାବାସରେ ରହୁଥିଲେ। ପ୍ରଧାନଶିକ୍ଷକ ଶ୍ରୀ ମହାନ୍ତି ତାଙ୍କୁ ଦୁର୍ବ୍ୟବହାର କରିଥିବା ନେଇ ଛାତ୍ରୀ ଜଣଙ୍କ ପରିବାର ଲୋକଙ୍କୁ ଜଣାଇଥିଲେ। ଏନେଇ ଛାତ୍ରୀଙ୍କ ବାପା ସକା ମୁଣ୍ତା ଫେବ୍ରୁଆରି ୨୦ରେ ଘଟଗାଁ ବିଇଓଙ୍କୁ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ବିଇଓ ଘଟଣାର ତଦନ୍ତ ନିର୍ଦେଶ ଦେଇଥିଲେ।

ସିଆର୍‌ସିସି ରୋହିତ କୁମାର ବେହେରା, ଏବିଇଓ ସଂଜୟ କୁମାର ପଲେଇ, ମହିଳା କର୍ମଚାରୀ ନିବେଦିତା ସାହୁ ଓ ନିବେଦିତା ବଳ ତଦନ୍ତ କରି ୨୪ ତାରିଖରେ ରିପୋର୍ଟ ପ୍ରଦାନ କରିଥିଲେ। ଏହାପରେ ଶ୍ରୀ ମହାନ୍ତିଙ୍କୁ ସେହିଦିନ କାର୍ଯ୍ୟରୁ ନିଲମ୍ବନ କରାଯାଇଥିଲା। ଗତକାଲି ଛାତ୍ରୀଙ୍କ ବାପା ଏ ସମ୍ପର୍କରେ ଘଟଗାଁ ଥାନାରେ ଅଭିଯୋଗ କରିବା ପରେ ପୁଲିସ ତତ୍କାଳ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଘଟଗାଁ ପୁଲିସର ଏକ ଟିମ୍‌ ଗତକାଲି ରାତିରେ ଚଢ଼ଉ କରି ପ୍ରଧାନଶିକ୍ଷକ ଶ୍ରୀ ମହାନ୍ତିଙ୍କୁ ତାଙ୍କ ବାସଭବନରୁ ଉଠାଇ ଆଣିଥିଲା। ଏନେଇ କେସ୍‌ ନମ୍ବର ୪୪/୨୦୨୩ ଦଫା ୩୫୪-କ, ୩୫୪-ଖ, ପୋକ୍ସୋ ଆକ୍ଟ, ଓ ୩୧ ଡବ୍ଲୁଆଇ/୩୨ ଭି ଏସ୍‌ସି,ଏସ୍‌ଟି ଆକ୍ଟରେ ମାମଲା ରୁଜୁ କରାଯାଇ ଆଜି ଅଭିଯୁକ୍ତ ପ୍ରଧାନଶିକ୍ଷକଙ୍କୁ ଆଜି କୋର୍ଟଚାଲାଣ କରାଯାଇଛି।