ନିଜାମୁଦ୍ଦିନ ଫେରନ୍ତା ନିର୍ଭୟ ହୋଇ ଲଜ୍ଜା ନ କରି ସରକାରଙ୍କୁ ସହଯୋଗ କରନ୍ତୁ, ନିଜ ପରିବାରକୁ ବଞ୍ଚାନ୍ତୁ : ସୁବ୍ରତ ବାଗଚୀ
ଭୁବନେଶ୍ୱର: ନିଜାମୁଦ୍ଦିନର ତବଲିଗିରେ ଅନୁଷ୍ଠିତ ଧାର୍ମିକ ସମାବେଶରେ ଯୋଗଦେଇ ଓଡ଼ିଶା ଫେରିଥିବା ବ୍ୟକ୍ତିମାନେ ନିର୍ଭୟ ଭାବେ ଲଜ୍ଜା ନ କରି ରାଜ୍ୟ ସରକାରଙ୍କ ୧୦୪ ହେଲ୍ପଲାଇନ ସହ ଯୋଗାଯୋଗ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିବେଦନ କରିଛନ୍ତି । ରାଜ୍ୟ ସରକାରଙ୍କ କୋଭିଡ-୧୯ ମୁଖ୍ୟ ସୁବ୍ରତ ବାଗଚୀ ଆଜି ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି । ନିଜ ବିଷୟରେ ତଥ୍ୟ ଲୁଚାଇଲେ ନିଜର କ୍ଷତି ହେବା ସହ ପରିବାର ଓ ସମାଜର ଅମଙ୍ଗଳ ହେବ । ନିଜାମୁଦ୍ଦିନକୁ ଯାଇଥିବା ବ୍ୟକ୍ତି ଏବଂ ସେମାନଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିି ୧୦୪ ସହ ଯୋଗାଯୋଗ କଲେ, ସେମାନଙ୍କୁ ସରକାର ମାଗଣାରେ ସମସ୍ତ ଚିକିତ୍ସା ସୁବିଧା ଯୋଗାଇବେ । ସଂପୃକ୍ତ ବ୍ୟକ୍ତିମାନଙ୍କର ସମସ୍ତ ଚିକିତ୍ସା ଦାୟିତ୍ୱ ନେବେ । ଯେଉଁ ବ୍ୟକ୍ତି ନିଜାମୁଦ୍ଦିନ ଯାଇଥିବେ ଓ ସେହି ବ୍ୟକ୍ତିମାନଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତି ବିନା ଭୟରେ ୧୦୪ ହେଲ୍ପଲାଇନକୁ କଲକରନ୍ତୁ । ନିଜାମୁଦ୍ଦିନ ଫେରନ୍ତାଙ୍କ ମା’ ଓ ଭଉଣୀଙ୍କୁ ନିବେଦନ କରାଯାଉଛି ଯେ, ସେମାନେ ନିଜର, ନିଜର ପରିବାର ଓ ସମାଜ କଲ୍ୟାଣ ପାଇଁ ୧୦୪କୁ କଲ କରନ୍ତୁ ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ଶ୍ରୀ ବାଗଚୀ କହିଛନ୍ତି ନିଜାମୁଦ୍ଦିନର ତବଲିଗିକୁ ସଂପୃକ୍ତ ବ୍ୟକ୍ତିମାନେ କରୋନା ସଂକ୍ରମଣ ଆଣିବାକୁ ଯାଇ ନଥିଲେ । ତେଣୁ ଏହା ଲଜ୍ଜା କିମ୍ବା ଭୟର କୌଣସି କାରଣ ନାହିଁ । ଏହାକୁ ଲୁଚାଇ ରଖିଲେ ନିଜ ପାଇଁ, ପରିବାର ଓ ସମାଜ ପାଇଁ ବିପଦ ହେବ । ଏଭଳି ଏକ ବିପଦ ସମୟରେ ସରକାରଙ୍କୁ ସମସ୍ତେ ସହଯୋଗ କରିବାର ଅଛି ।
ଜଣେ ବ୍ୟକ୍ତି ଯେତେବେଳେ କରୋନା ସଂକ୍ରମଣର ଶିକାର ହୁଏ, ସରକାରୀ କଳ କେମିତି କାମ କରେ ତାହା ସୁବ୍ରତ ବାଗଚୀ ସରଳତାର ସହିତ ସାମ୍ବାଦିକ ସମ୍ମିଳନୀରେ ବୁଝାଇଛନ୍ତି । ସେ କହିଛନ୍ତି, ରାଜ୍ୟ ସରକାର ସର୍ବ ପ୍ରଥମେ କରୋନା ସଂକ୍ରମିତ ବ୍ୟକ୍ତିଙ୍କ ଯାତ୍ରା ଇତିହାସ ଜାଣିବାକୁ ଚାହାନ୍ତି । ସଂପୃକ୍ତ ବ୍ୟକ୍ତି ବ୍ୟକ୍ତି ଯାତ୍ରା ସମୟରେ କେଉଁଠିକୁ ଯାଇଥିଲେ ଏବଂ ସେହି ସ୍ଥାନରେ କାହା କାହା ସହ ସଂସ୍ପର୍ଶରେ ଆସିଥିଲେ ଜାଣନ୍ତି । ଏହା ପରେ ସରକାର ସଂକ୍ରମିତ ବ୍ୟକ୍ତିଙ୍କୁ ଆଣିବା ପାଇଁ ରାତାରାତି କାମ କରିଥାନ୍ତି ।
Live Press Briefing on #Covid19 #Odisha 4th April, 2020 https://t.co/0XZvEgom22
— I & PR Department, Odisha (@IPR_Odisha) April 4, 2020
ପ୍ରଥମେ ସନ୍ଦିଗ୍ଧ ବ୍ୟକ୍ତିଙ୍କୁ ହସ୍ପିଟାଲ ଅଣାଯାଇଥାଏ । ନମୁନା ଯଦି ପଜିଟିଭ ବାହାରିଲା, ତାପରେ ସେମାନଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଆଣିବା ପାଇଁ ପୁଣି ଯୋଗାଯୋଗା କରୁ ବୋଲି ଶ୍ରୀ ବାଗଚୀ କହିଛନ୍ତି । ସରକାର ଏହି ପଦ୍ଧତିରେ କରୋନା ସଂକ୍ରମିତ ଓ ସେମାନଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଚିହ୍ନଟ କରାଯାଇଥାଏ । କିନ୍ତୁ ଏମତି କ୍ରମାଗତ ଭାବେ କାମ କରିବା ଶାସନ କଳ ପାଇଁ ବଡ଼ ବୋଝ ହେବ । ତେଣୁ ସରକାରଙ୍କୁ ସମସ୍ତେ ସହଯୋଗ କଲେ କରୋନା ସହିତ ମୁକାବିଲା କରିବା ସହଜ ହେବ ।
କୋଭିଡ ମୁଖ୍ୟ ଶ୍ରୀ ବାଗଚୀ କହିଛନ୍ତି, ଏ ପର୍ଯ୍ୟନ୍ତ ରାଜ୍ୟରେ ୨୦ ଜଣ ବ୍ୟକ୍ତି ପଜିଟିଭ ଚିହ୍ନଟ ହୋଇଛନ୍ତି । ଧରନ୍ତୁ ଯଦି ଜଣେ ବ୍ୟକ୍ତିଙ୍କ ସଂସ୍ପର୍ଶରେ ୫୦ ଜଣ ଆସିଛନ୍ତି । ହାରାହାରି ୧୦୦୦ ଜଣ ଲୋକ କରୋନା ସଂକ୍ରମିତ ହୋଇଥିବାର ଆଶଙ୍କା ଅଛି । କରୋନା ସଂକ୍ରମିତ ବ୍ୟକ୍ତିଙ୍କୁ ଆଣିବା ପାଇଁ ଗୋଟିଏ ଟିମରେ ମୋଟ ୧୦ ଜଣ ପ୍ରଶାସନିକ ଅଧିକାରୀ, ପୁଲିସ କର୍ମଚାରୀ ଓ ହସ୍ପିଟାଲ କର୍ମଚାରୀ ରହିବେ । ତେଣୁ ୨୦ଟି ଟିମ ଟ୍ରାକିଂ ପାଇଁ ୨୦୦ ଜଣ ରହିବେ । ରାତି ସାରା ୧୦୦୦ ଲୋକଙ୍କୁ ନେଇ ଆସିବା ପାଇଁ ୨୦୦୦ ଗାଡ଼ି ଦରକାର । କାରଣ ଜଣେ ବ୍ୟକ୍ତିଙ୍କୁ ଆଣିବା ପାଇଁ ୨ଟି ଗାଡ଼ି ଦରକାର । ଦଶ ପ୍ରତିଶତ ପଜିଟିଭ ବାହାରିଲେ ୧୦୦ ଜଣ ପଜିଟିଭ ବାହାରିବେ । ଯଦି ଏହି ଭଳି ଭାବରେ ରୋଗୀ ସଂଖ୍ୟା ବଢ଼େ ତାହେଲେ ୧୦୦ ଜଣ କରୋନା ରୋଗୀଙ୍କ ଠାରୁ ୧୦ ପ୍ରତିଶତ ରୋଗୀ ୫୦୦ରେ ପହଞ୍ଚିବ । ପୁଣି ଏହି ସଂଖ୍ୟା ୫୦୦୦ରେ ପହଞ୍ଚିବ । ଏବଂ ୫୦୦୦ କରୋନା ରୋଗୀଙ୍କୁ ହସ୍ପିଟାଲ ଆଣିବା ପାଇଁ ସରକାରଙ୍କ ଉପରେ .ବୋଝ ପଡ଼ିଯିବ । ତେଣୁ ଯେଉଁ ବ୍ୟକ୍ତି ନିଜକୁ ସନ୍ଦିଗ୍ଧ ମନେକରୁଛନ୍ତି, ସରକାରଙ୍କ ୧୦୪କୁ ଯୋଗାଯୋଗ କଲେ କରୋନା ମୁକାବିଲା ସହଜ ହେବ ।
ଶ୍ରୀ ବାଗଚୀ କହିଛନ୍ତି ଯେ, ଲୋକେ ଯେକୌଣସ ଅପପ୍ରଚାର କରନ୍ତୁ ନାହିଁ । ସନ୍ଦେହ ଜନକ ଟୁଇଟ କରିବା, ହ୍ୱାଟସପ କରିବା, ସୋସିଆଲ ମିଡିଆରେ ଅପବ୍ୟବହାର କରିବା ଏକ ଭୁଲ କାମ । ସମୁଦ୍ରର ଢେଉରେ ବେଳାଭୂମି ଉପରେ ଥିବା ଚିହ୍ନ ଲିଭିଯାଇଥାଏ । କିନ୍ତୁ ସୋସିଆଲ ମିଡିଆକୁ ଅପବ୍ୟବହାର କରୁଥିବା ଲୋକଙ୍କୁ ଧରିବା ଆମ ପାଇଁ ବଡ଼ କାମ ନୁହେଁ । ତେଣୁ ଆପଣ କେବେ ବି ଏଭଳି କାମ କରନ୍ତୁ ନାହିଁ ।